ಸಮಾಜ ಒಗ್ಗೂಡಿಸುವ ಕಾರ್ಯ ನಡೆಯಬೇಕಿದೆ: ಮಾಳಶೆಟ್ಟಿ

ಗದಗ: ಇಂದು ಸಮಾಜಗಳು ವೈಯಕ್ತಿಕ ಪೀಠಗಳು ಹಾಗೂ ಟ್ರಸ್ಟ್‌ಗಳನ್ನು ಕಟ್ಟಿಕೊಂಡು ರಾಜಕಾರಣಿಗಳ ಕೈಗೆ ಸಿಲುಕಿ, ಜಾತಿಗಳ ನಡುವೆ ಒಡಕು ಮೂಡಿಸುವಂತಾಗಿದೆ. ಇಂತಹ ಸಂದರ್ಭದಲ್ಲಿ ಸಮಾಜಗಳನ್ನು ಒಗ್ಗೂಡಿಸುವ ಕಾರ್ಯಗಳು ನಡೆಯಬೇಕಿದೆ ಎಂದು ಪಂಚಮಸಾಲಿ ಸಮಾಜದ ಹಿರಿಯ ಮುಖಂಡ ಹಾಗೂ ಬಿಜೆಪಿ ಮಾಜಿ ಜಿಲ್ಲಾಧ್ಯಕ್ಷ ಮೋಹನ ಮಾಳಶೆಟ್ಟಿ ಹೇಳಿದರು.

ಚನ್ನಮ್ಮ ಹಾಗೂ ರಾಯಣ್ಣ ಅವರ ಭಾವಚಿತ್ರಗಳಿಗೆ ಪುಷ್ಪಾರ್ಚನೆ ಸಲ್ಲಿಸಿ ಮಾತನಾಡಿದ ಅವರು, ರಾಣಿ ಚನ್ನಮ್ಮ ಮತ್ತು ಸಂಗೊಳ್ಳಿ ರಾಯಣ್ಣ ಯಾವುದೇ ಒಂದು ಜಾತಿಗೆ ಸೀಮಿತವಾಗಿ ಹೋರಾಡಿದವರಲ್ಲ ಇಡೀ ದೇಶಕ್ಕಾಗಿ ತ್ಯಾಗ ಮಾಡಿದವರು. ಕುರುಬ ಸಮಾಜದ ಯುವಕರು ಪಂಚಮಸಾಲಿ ಸಮುದಾಯವನ್ನು ಒಟ್ಟಾಗಿ ಕರೆದೊಯ್ದು ಈ ಇಬ್ಬರು ಮಹನೀಯರ ಜಯಂತಿಯನ್ನು ಜಂಟಿಯಾಗಿ ಆಚರಿಸುತ್ತಿರುವುದು ಮಾದರಿ ನಡವಳಿಕೆ. ಮುಂದಿನ ದಿನಗಳಲ್ಲೂ ಎಲ್ಲ ಸಮುದಾಯಗಳು ಒಗ್ಗೂಡಿ ಇಂತಹ ಐತಿಹಾಸಿಕ ನಾಯಕರ ಜಯಂತಿಗಳನ್ನು ಆಚರಿಸಬೇಕು ಎಂದರು.

ನಗರಾಭಿವೃದ್ಧಿ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ಸಿದ್ದು ಪಲ್ಲೇದ ಮಾತನಾಡಿ, ಕುರುಬ ಮತ್ತು ಪಂಚಮಸಾಲಿ ಎರಡೂ ಪ್ರಮುಖ ಸಮಾಜಗಳು. ರಾಜಕೀಯ ಮೇಲಾಟಗಳಿಗೆ ಬಲಿಯಾಗದೆ, ಸೌಹಾರ್ದತೆಯಿಂದ ಮುನ್ನಡೆಯೋಣ ಎಂದರು.

ವೇದಿಕೆಯಲ್ಲಿ ನಾಗರಾಜ ಮೆಣಸಗಿ, ಪ್ರಕಾಶ ಕರಿ, ನಾಗಪ್ಪ ಗುಗ್ಗರಿ, ಚನ್ನಮ್ಮ ಹುಳಕಣ್ಣವರ, ಆಯೋಜಕರಾದ ಹೇಮಂತ ಗಿಡ್ಡಹನುಮಣ್ಣವರ, ಮುತ್ತು ಜಡಿ, ಸತೀಶ ಗಿಡ್ಡಹನುಮಣ್ಣವರ ಮೊದಲಾದವರು ಉಪಸ್ಥಿತರಿದ್ದರು. ಪ್ರೊ. ಮಾರುತಿ ಮಡ್ಡಿ ಸ್ವಾಗತಿಸಿದರು, ಬಸವರಾಜ ಶೆಲಿಯಪ್ಪನವರ ನಿರೂಪಿಸಿದರು. ಗುತ್ತಿಗೆದಾರ ನಾಗರಾಜ ಮಾಗಡಿ ಕ್ರಾಂತಿಗೀತೆಗಳನ್ನು ಹಾಡಿದರು. ಇದಕ್ಕೂ ಮುನ್ನ ಶ್ರೀಗುರೂಜಿ ಇವೆಂಟ್ಸ್ ತಂಡದಿಂದ ರಸಮಂಜರಿ ಕಾರ್ಯಕ್ರಮ ನಡೆಯಿತು.