ಸನಾತನ ಸಂಸ್ಕೃತಿಯನ್ನು ಮೈಗೂಡಿಸಿಕೊಳ್ಳಿ: ತ್ರಿನೇತ್ರ ಮಹಾಂತ ಶಿವಯೋಗಿ ಸ್ವಾಮೀಜಿ

ಕನ್ನಡಪ್ರಭ ವಾರ್ತೆ ಕಿಕ್ಕೇರಿ

ಹೋಬಳಿಯ ಲಿಂಗಾಪುರ ಗ್ರಾಮದಲ್ಲಿ ಲೋಕಾರ್ಪಣೆಗೊಂಡ ಬಸವೇಶ್ವರ ಹಾಗೂ ಲಕ್ಷ್ಮೀದೇವಿ ದೇಗುಲ ಸಮಾರಂಭದಲ್ಲಿ ಆಶೀರ್ವಚನ ನೀಡಿ ಮಾತನಾಡಿ, ಪೂರ್ವಿಕರು, ಋಷಿಮನಿಗಳು ಬಿಟ್ಟುಹೋಗಿರುವ ಸನಾತನ ಸಂಸ್ಕೃತಿ ವಿಶ್ವಕ್ಕೆ ಸನ್ಮಾರ್ಗ ತೋರಿಸುವ ಮಾರ್ಗವಾಗಿದೆ ಎಂದರು.

ದೇಗುಲದಲ್ಲಿ ಸಕಾರಾತ್ಮಕ ಸಾಮರಸ್ಯ ಬಿಂಬಿಸುವ ಶಕ್ತಿ ಇದೆ. ನೈತಿಕತೆ ಕುಸಿಯದಂತೆ ಶಾಂತಿ, ನೆಮ್ಮದಿಯ ತಾಣವನ್ನು ಕಟ್ಟಲು ಶ್ರೀಗಳು, ಮಠ ಮಾನ್ಯಗಳ ಪಾತ್ರ ದೊಡ್ಡದಾಗಿದೆ. ಇದನ್ನು ಪಾಲಿಸಲು ಗುರು - ಹಿರಿಯರು ಮುಂದಾಗಬೇಕಿದೆ. ಎಳೆಯ, ಯುವ ಮನಸ್ಸಿನಲ್ಲಿ ವೈಚಾರಿಕತೆಯ ಧಾರ್ಮಿಕ ಚಿಂತನೆ ಮೂಡಿಸಬೇಕಿದೆ ಎಂದು ನುಡಿದರು.

ಮಾನವನ ಅಂತರಂಗ, ಬಹಿರಂಗ ಶುದ್ಧಿಗೊಳಿಸಲು ಭಗವಂತನ ಆರಾಧನೆ ಮುಖ್ಯ. ಭಗವಂತನಿಗೆ ಬೇಕಿರುವುದು ಆಡಂಬರದ ಪೂಜೆಯಲ್ಲ. ಹಳ್ಳಿಯ ಜನರಲ್ಲಿ ಭಗವಂತನ ಮೇಲೆ ನಿರ್ಮಲ ಭಕ್ತಿಯಿದೆ .ಕಷ್ಟ, ಸುಖ ಎರಡರಲ್ಲೂ ದೈವವನ್ನು ನೆನೆಯುವ ಮುಗ್ಧ ಜನತೆ ಇವರಾಗಿದ್ದಾರೆ. ಯುವಕರು ಪಾಶ್ಚಾತ್ಯ ಸಂಸ್ಕೃತಿಗೆ ಮಾರು ಹೋಗದೆ, ಪೂರ್ವಜರು ಹಾಕಿಕೊಟ್ಟಿರುವ ಸಂಸ್ಕೃತಿ, ಪರಂಪರೆ ಉಳಿಸಿಕೊಂಡು ಯೋಗ, ಧ್ಯಾನದಲ್ಲಿ ಆಸಕ್ತಿ ತೋರಬೇಕಿದೆ ಎಂದು ತಿಳಿ ಹೇಳಿದರು.

ಸಮಾರಂಭದಲ್ಲಿ ಶಾಸಕ ಎಚ್.ಟಿ.ಮಂಜು, ಕಾಪನಹಳ್ಳಿ ಗವಿಮಠದ ಸ್ವತಂತ್ರ ಚನ್ನವೀರ ಸ್ವಾಮೀಜಿ, ಬೇಬಿಮಠ ರಾಮೇಶ್ವರಯೋಗಿ ಮಠದ ಬಸವ ಸ್ವಾಮೀಜಿ, ಆರ್‌ಟಿಒ ಮಲ್ಲಿಕಾರ್ಜುನ, ಕೆಪಿಸಿಸಿ ಸದಸ್ಯ ಸುರೇಶ್, ಅಖಿಲ ಭಾರತ ವೀರಶೈವ ಲಿಂಗಾಯತ ಮಹಾಸಭಾ ತಾಲೂಕು ಅಧ್ಯಕ್ಷ ಧನಂಜಯಕುಮಾರ್, ಮುಖಂಡರಾದ ದಿಂಕಾ ಮಹೇಶ್, ಈರಪ್ಪ, ಚಂದ್ರೇಗೌಡ, ಹರಳುಕುಪ್ಪೆ ಪ್ರತಾಪ್, ಲಿಂಗಾಪುರ ಗ್ರಾಮಸ್ಥರು, ಬಸವೇಶ್ವರ ಸ್ವಾಮಿ ದೇವಸ್ಥಾನದ ಟ್ರಸ್ಟಿಗಳು ಉಪಸ್ಥಿತರಿದ್ದರು.