ಬಳ್ಳಾರಿ ವಿವಿ ಅಂಕಪಟ್ಟಿಯಲ್ಲಿ ಗರಿಷ್ಠ ಅಂಕ ಮೀರಿ ನಮೂದು!

ಸೋಮರಡ್ಡಿ ಅಳವಂಡಿ

ಇದು, ಬಳ್ಳಾರಿ ಶ್ರೀ ಕೃಷ್ಣದೇವರಾಯ ವಿಶ್ವವಿದ್ಯಾಲಯದ ಪವಾಡ.

ಬಳ್ಳಾರಿ ವಿಶ್ವವಿದ್ಯಾಲಯದಲ್ಲಿ ಫಲಿತಾಂಶ ಪ್ರಕಟ ಮಾಡುವುದೇ ತಡವಾಗಿ, ಪರೀಕ್ಷೆ ಬರೆದು ಒಂದೂವರೆ ವರ್ಷವಾದರೂ ಕೆಲವು ಬಾರಿ ಫಲಿತಾಂಶ ಪ್ರಕಟ ಮಾಡುವುದಿಲ್ಲ. ಇನ್ನು ಫಲಿತಾಂಶ ಪ್ರಕಟ ಮಾಡಿದ ಮೇಲಿನ ದೋಷಗಳು ಅಷ್ಟಿಷ್ಟಲ್ಲ.

ಇಂತಹ ಸಾಲು ಸಾಲು ದೋಷಗಳನ್ನು ಅಂಕಪಟ್ಟಿಯಲ್ಲಿ ಕಾಣಬಹುದಾಗಿದೆ. 2021-22ನೇ ಸಾಲಿನಲ್ಲಿ ಪದವಿಗೆ ಪ್ರವೇಶ ಪಡೆದ ವಿದ್ಯಾರ್ಥಿಗಳು ಇಂದಿಗೂ ಅಂಕಪಟ್ಟಿಯ ದೋಷ ಸರಿಪಡಿಸಿಕೊಳ್ಳಲು ಹೆಣಗಾಡುತ್ತಿದ್ದಾರೆ. ಇದ್ಯಾವುದಕ್ಕೂ ಬಳ್ಳಾರಿ ವಿವಿಯಲ್ಲಿ ಉತ್ತರ ಹೇಳುವವರೇ ಇಲ್ಲ.

ಅಷ್ಟಕ್ಕೂ ಕಾಲೇಜು ಪ್ರಾಚಾರ್ಯರು ಖುದ್ದು ಭೇಟಿಯಾಗಿ ಕೇಳಿದರೆ ನೂರೆಂಟು ಪ್ರಶ್ನೆಗಳನ್ನು ಹಾಕುತ್ತಾರೆ. ಯಾರು ತಪ್ಪು ಮಾಡಿದ್ದಾರೆ ಅವರನ್ನೇ ಕೇಳಿ, ಯಾರು ಇದ್ದಾಗ ದೋಷವಾಗಿದೆಯೋ ಅವರನ್ನೇ ಕೇಳಿ ಎಂದು ದಬಾಯಿಸುತ್ತಾರೆ.

ಸಮಗ್ರ ತನಿಖೆಯಾಗಬೇಕು: ಬಳ್ಳಾರಿ ವಿಶ್ವವಿದ್ಯಾಲಯದ ಅವಾಂತರಗಳ ಕುರಿತು ಸಮಗ್ರ ತನಿಖೆಯಾಗಬೇಕಾಗಿದೆ. ಅಲ್ಲಿ ನಡೆಯುತ್ತಿರುವ ಅವಾಂತರಗಳು ಕೇವಲ ವಿದ್ಯಾರ್ಥಿಗಳಿಗೆ ಅಷ್ಟೇ ಅಲ್ಲ, ಇಡೀ ಶಿಕ್ಷಣ ವ್ಯವಸ್ಥೆಗೆ ಪೆಟ್ಟು ಬೀಳುವಂತೆ ಇವೆ.