ಗವಿಮಠದ ದಾಸೋಹಕ್ಕಾಗಿಯೇ 1 ಎಕರೆ ಪಾಲಕ್ ಬೆಳೆದ ರೈತ

ಸೋಮರಡ್ಡಿ ಅಳವಂಡಿ ಕೊಪ್ಪಳ

ಹೌದು, ನಿತ್ಯವೂ 3 ಸಾವಿರ ಪಾಲಕ್ ಕಟ್ಟುಗಳನ್ನು ತಾಲೂಕಿನ ಚಿಕ್ಕಸಿಂದೋಗಿ ಗ್ರಾಮದ ರೈತ ಈರಣ್ಣ ರಡ್ಡೇರ ತಂದು ಅರ್ಪಿಸುತ್ತಿದ್ದಾರೆ. ದಾಸೋಹ ಪ್ರಾರಂಭವಾದ ದಿನದಿಂದ ನಿತ್ಯವೂ ತಮ್ಮ ಹೊಲದಲ್ಲಿ ದಾಸೋಹಕ್ಕಾಗಿಯೇ ಬೆಳೆದಿರುವ ಪಾಲಕ್‌ನ್ನು ತಾನೇ ಕೂಲಿಯಾಳ ಮೂಲಕ ಕಟಾವು ಮಾಡಿಕೊಂಡು ಬಂದು, ಅರ್ಪಿಸುತ್ತಿದ್ದಾರೆ. ಪ್ರಾರಂಭದಲ್ಲಿ 1, 2 ಸಾವಿರ ಕಟ್ಟು ತಂದು ಕೊಡುತ್ತಾರೆ. ಆನಂತರ ಅದನ್ನು ಕ್ರಮೇಣ ಹೆಚ್ಚಳ ಮಾಡುತ್ತಾ ಬಂದು ಕೊಡುತ್ತಿದ್ದಾರೆ. ರಥೋತ್ಸವದ ದಿನ ಮತ್ತು ನಂತರ ನಿತ್ಯವೂ ಮೂರು ಸಾವಿರ ಕಟ್ಟು ತಂದು ಕೊಡುತ್ತಾರೆ.

ಸೇವೆಗೆ ಪೈಪೋಟಿ: ಗವಿಸಿದ್ಧೇಶ್ವರ ಜಾತ್ರಾ ಮಹೋತ್ವದಲ್ಲಿ ಧನ, ಧಾನ್ಯ ತಂದು ಕೊಡುವ ಭಕ್ತರು ಪೈಪೋಟಿಯಲ್ಲಿ ಸೇವೆ ಮಾಡುತ್ತಾರೆ. ಲಕ್ಷ ಲಕ್ಷ ಭಕ್ತರಿಗೆ ಪ್ರಸಾದ ಬಡಿಸುವ ಈ ಮಹಾದಾಸೋಹದಲ್ಲಿ ಅಡುಗೆ ಸಿದ್ಧ ಮಾಡುವುದರಿಂದ ಹಿಡಿದು ಬಡಿಸುವುದು ಎಲ್ಲರೂ ಸೇವೆ ಮಾಡುವವರು. ಯಾವುದೇ ನಿರೀಕ್ಷೆ ಇಲ್ಲದೆ ನಿತ್ಯವೂ ಸಾವಿರಾರು ಜನರು ಸೇವೆ ಮಾಡುತ್ತಾರೆ. ಸೇವೆಗೆ ಅವಕಾಶ ನೀಡಿ ಎಂದು ದುಂಬಾಲು ಬಿದ್ದಿರುತ್ತಾರೆ.

ಈರಣ್ಣ ರಡ್ಡೇರ್ ಅವರಂತೆ ಅನೇಕರು ಪ್ರತಿ ವರ್ಷವೂ ಸೇವೆ ಮಾಡುತ್ತಾರೆ. ಹೀಗಾಗಿಯೇ ಮಹಾದಾಸೋಹದಲ್ಲಿ ಲಕ್ಷ ಲಕ್ಷ ಭಕ್ತರಿಗೆ ಪ್ರಸಾದ ಸಾಂಗವಾಗಿ ನಡೆಯುತ್ತದೆ ಎಂದು ಮಹಾದಾಸೋಹ ಉಸ್ತುವಾರಿ ರಾಮನಗೌಡ ತಿಳಿಸಿದ್ದಾರೆ.