19ರಂದು ನೀರಿಗಾಗಿ ಬೃಹತ್‌ ಪ್ರತಿಭಟನೆಗೆ ರೈತರ ನಿರ್ಧಾರ

ಕಾರಟಗಿ:

ಕೆಳ ಭಾಗಕ್ಕೆ ಸಮರ್ಪಕ ನೀರು ಹರಿಸುವಂತೆ ಒತ್ತಾಯಿಸಿ ಮುಂಜಾಗ್ರತ ಕ್ರಮವಾಗಿ ಮಾ. ೧೯ರಂದು ಕಾರಟಗಿಯಲ್ಲಿ ಬೃಹತ್ ಪ್ರತಿಭಟನಾ ಕಾಲು ನಡೆಗೆ ಜಾಥಾ ನಡೆಸುವ ಮೂಲಕ ಸರ್ಕಾರದ ಗಮನ ಸೆಳೆದು ಏ. ೨೦ರ ವರೆಗೆ ನೀರು ಹರಿಸಿಕೊಳ್ಳೋಣ ಎಂದು ತೀರ್ಮಾನಿಸಿದರು.

ಎಡದಂಡೆ ನಾಲೆಗೆ ನಿತ್ಯ ೩೮೦೦ ಕ್ಯುಸೆಕ್ ಮತ್ತು ೩೧ ಮತ್ತು ೩೨ ವಿತರಣಾ ಕಾಲುವೆಗೆ ನಿತ್ಯ ೨೮೦ ಕ್ಯುಸೆಕ್ ನೀರು ಹರಿಸಿದರೆ ಮಾತ್ರ ಕೊನೆ ಮತ್ತು ಕೆಳಭಾಗಕ್ಕೆ ನೀರು ತಲುಪಸಲು ಸಾಧ್ಯ. ಆ ಪ್ರಕಾರವೇ ಕಾಲುವೆಯಲ್ಲಿ ನೀರು ಹರಿಸುವಂತೆ ಒತ್ತಾಯಿಸಿ ಕಾರಟಗಿಯ ನೀರಾವರಿ ಕಚೇರಿಯಿಂದ ತಹಸೀಲ್ದಾರ್ ಕಚೇರಿ ವರೆಗೆ ಕಾಲ್ನಡಿಗೆ ಜಾಥಾವನ್ನು ಶಾಂತಿಯುತವಾಗಿ ನಡೆಸುವ ಮೂಲಕ ರಾಜ್ಯ ಸರ್ಕಾರ ಮತ್ತು ನೀರಾವರಿ ಇಲಾಖೆ ಅಧಿಕಾರಿಗಳ ಗಮನ ಹರಿಸುವಂತೆ ಚರ್ಚಿಸಲಾಯಿತು.

೩೧ನೇ ವಿತರಣಾ ವ್ಯಾಪ್ತಿಯ ಬೂದುಗುಂಪಾ, ತಿಮ್ಮಾಪುರ, ಹಾಲಸಮುದ್ರ, ಯರಡೋಣಾ, ರಾಜಾಕ್ಯಾಂಪ್, ಈಳಿಗನೂರು, ಈಳಿಗನೂರು ಕ್ಯಾಂಪ್, ಕಿಂದಿಕ್ಯಾಂಪ್, ಚೆನ್ನಳ್ಳಿ, ಮಾವಿನಮಡ್ಗು ಸೇರಿದಂತೆ ಇನ್ನಿತರ ಕ್ಯಾಂಪ್‌ ಮತ್ತು ಹಳ್ಳಿಗಳ ರೈತರು ಸಭೆಯಲ್ಲಿ ಪಾಲ್ಗೊಂಡಿದ್ದರು. ರೈತರಾದ ಬಸವರಾಜ ಕಡೇಮನಿ, ಅನೀಲ ಶೇಷಗಿರಿಕ್ಯಾಂಪ್, ಬಸವರಾಜ ಡಂಬಳ, ಸುರೇಶ ಬೆಳ್ಳಿತಟ್ಟಿ, ಅಂಬಣ್ಣ ಹರಿಜನ, ಭೀಮನಗೌಡ ಖಂಡ್ರಿ, ಸುರೇಶ ರಾಜಾಕ್ಯಾಂಪ್ ಇದ್ದರು.