ಕೈ ಹಿಡಿಯದ ವಾಣಿಜ್ಯ ಬೆಳೆ, ಇಳುವರಿ ಕುಂಠಿತ: ರೈತರ ಆತಂಕ

ಬಿಂದುಮಾಧವ ಮಣ್ಣೂರ

ತಾಲೂಕಿನ ಮುಂಗಾರು ಹಂಗಾಮಿನ ಮುಖ್ಯ ವಾಣಿಜ್ಯ ಬೆಳೆಗ ಹೆಸರು ಉದ್ದು ಬೆಳೆ ನಿರೀಕ್ಷಿತ ಪ್ರಮಾಣದ ಇಳುವರಿ ಬಾರದಿರುವುದು ರೈತರನ್ನು ಚಿಂತೆಗೆ ದೂಡಿದೆ. ರೈತರು ಮುಂಗಾರು ಹಂಗಾಮಿನಲ್ಲಿ ಅಲ್ಪಾವಧಿಯಲ್ಲಿ ಬೆಳೆಯುವ ಹೆಸರು ಉದ್ದು ಬೆಳೆಗೆ ಇಳುವರಿ ಕಡಿಮೆಯಾಗಿದೆ ಜೊತೆಗೆ ಧಾರಣೆ ಕುಸಿತ ಕಂಡಿದೆ

ಪ್ರಸಕ್ತ ಸಾಲಿನಲ್ಲಿ ಹೆಸರು, ಉದ್ದು ಬಿತ್ತನೆ ಮಾಡಿದ್ದ ರೈತನಿಗೆ ಕಡಿಮೆ ಅವಧಿ ಅಂದರೆ ಕೇವಲ 45 ದಿನಗಳಲ್ಲಿ ಬರುವ ಫಸಲು ಇದು. ಹೆಸರು, ಉದ್ದು, ಬಂದರೆ ಮುಂಗಾರಿನ ಇತರ ಬೆಳೆಗಳ ಕಳೆ, ಗೊಬ್ಬರ, ಬೀಜ, ಬಿತ್ತನೆ ಖರ್ಚಿನ ಜತೆಗೆ ಜೀವನ ನಿರ್ವಹಣೆಗೂ ಆಸರೆಯಾಗುವುದು ಎಂಬ ಲೆಕ್ಕಾಚಾರ ರೈತರಲ್ಲಿತ್ತು. ಹೆಚ್ಚಿನ ಪ್ರಮಾಣದಲ್ಲಿ ಹೆಸರು ಉದ್ದು ಬಿತ್ತನೆ ಮಾಡಿದ್ದರು. ಆದರೆ, ಅದೂ ನಿರೀಕ್ಷಿತ ಪ್ರಮಾಣದಲ್ಲಿ ರೈತನ ಕೈಹಿಡಿಯಲಿಲ್ಲ. ನಾನಾ ರೋಗ, ರುಜಿನಗಳಿಗೆ ತುತ್ತಾಯಿತು.

ಒಂದು ಎಕರೆಗೆ 2 ರಿಂದ 3 ಕ್ವಿಂಟಾಲ್‌ ಗಿಂತ ಕಡಿಮೆ ಇಳುವರಿ ಬಂದಿದೆ. ರೈತರು ರಾಶಿ ಮಾಡುವ ಮೊದಲು ಹೆಸರು ಧಾರಣೆ 10000 ರುಪಾಯಿ ಹಾಗೂ 11000 ರುಪಾಯಿ ಇದ್ದು, ಉದ್ದು ಧಾರಣೆ ಈಗ ಏಕಾಏಕಿ 5000 ರಿಂದ 6000 ರುಪಾಯಿಗೆ ಧಾರಣೆ ಇಳಿದಿದೆ. ರೈತರು ಸಾಲ ಮಾಡಿ ಬಿತ್ತನೆ ಬೀಜ, ಬಾಡಿಗೆ ಗಳೆ, ರಾಸಾಯನಿಕ ಗೊಬ್ಬರ, ಆಳಿನ ಕೂಲಿ ಸೇರಿ ಅಪಾರ ಹಣ ವೆಚ್ಚ ಮಾಡಿದ್ದಾರೆ.