ಶುಲ್ಕ ಏರಿಕೆ: ದುಬಾರೆ ಸಾಕಾನೆ ಶಿಬಿರ ಪ್ರವೇಶ ದುಬಾರಿ!

ವಿಘ್ನೇಶ್ ಎಂ. ಭೂತನಕಾಡು

ಕೊಡಗಿನ ಪ್ರಮುಖ ಪ್ರವಾಸಿ ತಾಣ ದುಬಾರೆ ಸಾಕಾನೆ ಶಿಬಿರದ ಪ್ರವೇಶ ಶುಲ್ಕ ಏರಿಕೆ ಮಾಡಲಾಗಿದೆ. ಇದರಿಂದ ದುಬಾರೆ ಪ್ರವಾಸಿ ತಾಣ ಪ್ರವಾಸಿಗರಿಗೆ ತುಂಬಾ ದುಬಾರಿಯಾಗಿಯೂ ಪರಿಣಮಿಸಿದೆ.

ಕುಶಾಲನಗರ ಸಮೀಪದಲ್ಲಿರುವ ದುಬಾರೆ ಪ್ರವಾಸಿ ತಾಣ ಪ್ರವಾಸಿಗರ ಪಾಲಿನ ನೆಚ್ಚಿನ ತಾಣ. ಇಲ್ಲಿ ಸುಮಾರು 30ಕ್ಕೂ ಅಧಿಕ ಸಾಕಾನೆಗಳಿವೆ. ರಾಜ್ಯದ ವಿವಿಧಡೆ ಸೆರೆ ಹಿಡಿದ ಕಾಡಾನೆಗಳನ್ನು ಪಳಗಿಸುವ ಕೇಂದ್ರ ಕೂಡ ಆಗಿರುವುದರಿಂದ ಹೆಚ್ಚು ಪ್ರಸಿದ್ಧಿ ಪಡೆದಿದೆ. ಆನೆಗಳ ಆಟ-ತುಂಟಾಟ, ಆನೆಗಳನ್ನು ಸ್ನಾನ ಮಾಡಿಸುವುದು, ಆಹಾರ ನೀಡುವುದು ಸೇರಿದಂತೆ ಇತರೆ ಚಟುವಟಿಕೆಗಳು ಇಲ್ಲಿ ಇರುವುದರಿಂದ ಪ್ರವಾಸಿಗರನ್ನು ಮಾತ್ರವಲ್ಲದೆ ಸ್ಥಳೀಯರನ್ನು ಕೂಡ ದುಬಾರೆ ಸೆಳೆಯುತ್ತಿದೆ. ಆದರೆ ಶುಲ್ಕ ಏರಿಕೆ ಮಾಡಿರುವುದರಿಂದ ಸ್ಥಳೀಯರಿಗೆ ಹಾಗೂ ಪ್ರವಾಸಿಗರಿಗೆ ದುಬಾರೆ ಹೊರೆಯಾಗಿ ಪರಿಣಮಿಸಿದೆ.

ಪ್ರಸ್ತುತ ದುಬಾರೆಗೆ ಆಗಮಿಸುವ ಒಬ್ಬ ಪ್ರವಾಸಿಗರಿಗೆ ಬೋಟಿಂಗ್ ಸಹಿತ 180, ಶನಿವಾರ, ಭಾನುವಾರ ಹಾಗೂ ಸರ್ಕಾರಿ ರಜಾ ದಿನಗಳಲ್ಲಿ ರು.275 ನಿಗofಪಡಿಸಲಾಗಿದ್ದು, ಅರಣ್ಯ ಇಲಾಖೆಯ ಈ ನಿರ್ಧಾರಕ್ಕೆ ಸ್ಥಳೀಯರು ಹಾಗೂ ಕೆಲ ಪ್ರವಾಸಿಗರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಆದರೆ ಪ್ರವಾಸಿ ತಾಣಕ್ಕೆ ಶುಲ್ಕ ಏರಿಕೆ ಮಾಡಿರುವುದು ಸರ್ಕಾರದ ಉಚಿತ ಯೋಜನೆಯಿಂದ ಎಂದು ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಯಾವುದೇ ಅಭಿವೃದ್ಧಿ ಕಾರ್ಯ ಮಾಡದೆ ದಿಢೀರನೆ ಪ್ರವೇಶ ಶುಲ್ಕ ಏರಿಸಿರುವುದು ಪ್ರವಾಸಿಗರಲ್ಲಿ ಹಾಗೂ ಸ್ಥಳೀಯರಿಗೆ ತೀರಾ ತೊಂದರೆಯುಂಟಾಗಿದೆ. ಅಲ್ಲದೆ ಮಂಗಳವಾರ ದುಬಾರೆ ರಜೆಯ ದಿನವಾಗಿ ಆದೇಶಿಸಲಾಗಿದೆ. ಇದರಿಂದ ದುಬಾರೆಯಲ್ಲಿ ಪ್ರವಾಸಿಗರ ಸಂಖ್ಯೆ ತೀವ್ರ ಇಳಿಮುಖ ಕಾಣುತ್ತಿದ್ದು, ಇದನ್ನೇ ನಂಬಿ ಜೀವನ ಸಾಗಿಸುತ್ತಿರುವ ವ್ಯಾಪಾರಿಗಳು ಹಾಗೂ ನೌಕರರರು ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಈ ಬಗ್ಗೆ ಶಾಸಕರು ಆದಷ್ಟು ಕೂಡಲೇ ಸೂಕ್ತ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ.

ಶೀಘ್ರ ತೂಗು ಸೇತುವೆ ನಿರೀಕ್ಷೆ

ಕಳೆದ ಹಲವು ವರ್ಷಗಳಿಂದಲೂ ಕೂಡ ದುಬಾರೆಗೆ ತೂಗು ಸೇತುವೆ ಯೋಜನೆ ಪ್ರಸ್ತಾಪವಿದೆ. ಇದೀಗ ಈ ಯೋಜನೆಗೆ ಆದಷ್ಟು ಕೂಡಲೇ ಆಗಲಿದೆ ಎಂದು ಅರಣ್ಯ ಇಲಾಖೆಯ ಅಧಿಕಾರಿಗಳು ಹೇಳುತ್ತಿದ್ದು, ಆದಷ್ಟು ಶೀಘ್ರ ಆಗಲಿ ಎಂಬುದು ಹಲವರ ಬೇಡಿಕೆಯಾಗಿದೆ.

ದುಬಾರೆಯಲ್ಲಿನ ಅಭಿವೃದ್ಧಿ ಹಾಗೂ ಆನೆ ಮಾನವ ಸಂಘರ್ಷ ಪರಿಹಾರ ದೃಷ್ಟಿಯಿಂದಾಗಿ ದುಬಾರೆಯಲ್ಲಿ ಪ್ರವಾಸಿಗರಿಗೆ ಪ್ರವೇಶ ಶುಲ್ಕ ಹೆಚ್ಚಳ ಮಾಡಲಾಗಿದೆ. ಪ್ರವಾಸಿಗರು ದುಬಾರೆಗೆ ಆಗಮಿಸಲು ತೂಗು ಸೇತುವೆ ಕೂಡ ನಿರ್ಮಿಸಲಾಗುತ್ತಿದ್ದು, ಕ್ರಿಯಾ ಯೋಜನೆಗೆ ಅನುಮತಿ ದೊರಕಿದೆ. ಆದಷ್ಟು ಕೂಡಲೇ ಕಾಮಗಾರಿ ಆರಂಭಿಸಲಾಗುತ್ತದೆ.