ಹಿಂದಿ ಬಲವಂತದ ಹೇರಿಕೆಯಾದರೆ ಹೋರಾಟ: ಶಿವರಾಮೇಗೌಡ

ಕುರುಗೋಡು: ಹಿಂದಿ ಬಲವಂತದ ಹೇರಿಕೆಯಾದರೆ ಹೋರಾಟ ಮುಂದುವರೆಯುತ್ತದೆ ಎಂದು ಕರ್ನಾಟಕ ರಕ್ಷಣಾ ವೇದಿಕೆ ರಾಜ್ಯ ಅಧ್ಯಕ್ಷ ಶಿವರಾಮೇಗೌಡ ಎಚ್ಚರಿಸಿದರು.

ಹಿಂದಿ ಭಾಷೆ ಹೇರುವ ಮೊದಲು ಕೇಂದ್ರ ಸರ್ಕಾರದ ಕಚೇರಿಗಳು ಹಿಂದಿಮಯವಾಗಿವೆ. ಹಿಂದಿ ಕಡ್ಡಾಯಗೊಳಿಸಿದರೆ ರಾಜ್ಯದ ಕಚೇರಿಗಳಲ್ಲೂ ಹಿಂದಿ ಪ್ರಭಾವ ಹೆಚ್ಚಾಗುತ್ತದೆ ಎಂದು ಕಳವಳ ವ್ಯಕ್ತಪಡಿಸಿದರು.

ಶಾಸಕ ಜೆ.ಎನ್.ಗಣೇಶ್ ಮಾತನಾಡಿ, ಬಳ್ಳಾರಿ ಗಡಿ ಭಾಗದ ಅಡ್ಲಿಗೆ, ಬಸರಗೋಡು, ಕಚ್ಚಿಡು ಗ್ರಾಮಗಳ ವಸತಿ ಶಾಲೆಗಳಿಗೆ ಹೆಚ್ಚಿನ ಅನುದಾನ ಕೊಡುತ್ತೇನೆ. ಕನ್ನಡದ ಬಗ್ಗೆ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ನಡೆಸಿಕೊಡುತ್ತೇನೆ ಎಂದರು.

ಕರವೇ ಜಿಲ್ಲಾಧ್ಯಕ್ಷ ಕೆ.ರಾಜಶೇಖರ್, ಪುರಸಭೆ ಅಧ್ಯಕ್ಷ ಟಿ.ಶೇಖಣ್ಣ, ಉಪಾಧ್ಯಕ್ಷ ಚನ್ನಪಟ್ಟಣ ಮಲ್ಲಿಕಾರ್ಜುನ, ಕರವೇ ಯುವ ಜಿಲ್ಲಾಧ್ಯಕ್ಷ ಅಧ್ಯಕ್ಷ ಮೃತ್ಯುಂಜಯ, ರಾಯಚೂರು ಜಿಲ್ಲೆ ಕರವೇ ಜಿಲ್ಲಾಧ್ಯಕ್ಷ ಅಶೋಕ್, ಕರವೇ ತಾಲೂಕು ಅಧ್ಯಕ್ಷ ಗುಡಿಸಿಲಿ ರಾಜು, ಹಂಪಿ ಬಸವರಾಜ, ಲೋಕೇಶ್ ಯಾದವ್ ಇದ್ದರು.