ಉದ್ಘಾಟನೆಗಾಗಿ ಕಾಯುತ್ತಿರುವ ಅಗ್ನಿಶಾಮಕ ಠಾಣೆ

ಎಸ್.ಎಂ. ಸೈಯದ್ ಗಜೇಂದ್ರಗಡ

ಪಟ್ಟಣ ತಾಲೂಕು ಕೇಂದ್ರವಾದ ಬಳಿಕ ಅಗತ್ಯ ಕಚೇರಿಗಳ ಆರಂಭವಾಗಿಲ್ಲ ಎನ್ನುವ ಕೂಗಿನ ನಡುವೆಯೇ ಅಗ್ನಿಶಾಮಕ ಠಾಣೆ ಸಿದ್ಧವಾಗಿರುವುದು ಜನರಿಗೆ ಸಂತಸ ತಂದಿದೆಯಾದರೂ ಬೇಗ ಉದ್ಘಾಟನೆಯಾಗಲಿ ಎಂದು ಆಶಿಸುತ್ತಿದ್ದಾರೆ.

ಪಟ್ಟಣ ಸಮೀಪದ ರಾಮಾಪುರ ಗ್ರಾಪಂ ವ್ಯಾಪ್ತಿಯ ಕೊಡಗಾನೂರ ಗ್ರಾಮದ ಬಳಿ ಅಂದಾಜು ₹3 ಕೋಟಿ ವೆಚ್ಚದ ಅಗ್ನಿಶಾಮಕ ಠಾಣೆ ನಿರ್ಮಾಣ ಕಾರ್ಯ ಆರಂಭಿಸಲಾಯಿತು. ರಾಜ್ಯ ಪೊಲೀಸ್ ವಸತಿ ಮೂಲಭೂತ ಸೌಲಭ್ಯ ಅಭಿವೃದ್ಧಿ ನಿಗಮಕ್ಕೆ ಹಣ ಪಾವತಿಸಲಾಯಿತು. ೨೦೨೩ರ ಮೇ ೨೪ರಂದು ಕಾಮಗಾರಿ ಆರಂಭಿಸಿ ೨೦೨೪ರ ಸೆಪ್ಟೆಂಬರ್ ತಿಂಗಳಲ್ಲಿ ಮುಕ್ತಾಯಗೊಳಿಸಲಾಯಿತು. ಬಳಿಕ ಅಗ್ನಿಶಾಮಕ ಇಲಾಖೆಯ ವಶಕ್ಕೆ ಪಡೆಯುವಂತೆ ಸೂಚಿಸಲಾಗಿತ್ತು. ಕರ್ತವ್ಯ ನಿರ್ವಹಿಸಲು ಒಬ್ಬ ಅಗ್ನಿಶಾಮಕ ಠಾಣಾಧಿಕಾರಿ, ಇಬ್ಬರು ಸಹಾಯಕ ಅಗ್ನಿಶಾಮಕ ಠಾಣಾಧಿಕಾರಿ, ಆರು ಪ್ರಮುಖ ಅಗ್ನಿಶಾಮಕ ಸಿಬ್ಬಂದಿ, ನಾಲ್ವರು ಅಗ್ನಿಶಾಮಕ ಚಾಲಕರು, ಒಬ್ಬರು ಚಾಲಕ ತಂತ್ರಜ್ಞ, 16 ಅಗ್ನಿಶಾಮಕ ಸಿಬ್ಬಂದಿ, ಒಬ್ಬರು ದ್ವಿತೀಯ ದರ್ಜೆ ಸಹಾಯಕ ಹುದ್ದೆ ಸೃಜಿಸಲಾಯಿತು. ಜತೆಗೆ ಎರಡು ಜಲವಾಹನ, ಒಂದು ಕ್ಯೂಆರ್‌ವಿ, ಪೋರ್ಟಬಲ್ ಪಂಪು, ಒಂದು ಮೋಟಾರ ಸೈಕಲ್ (ಅಗ್ನಿ), ಒಂದು ಏರ್ ಕಾಂಪ್ರೆಸರ್‌ ಮಂಜೂರಾತಿ ನೀಡಲು ಕೋರಲಾಯಿತು.

ಗಜೇಂದ್ರಗಡ ತಾಲೂಕಿನಲ್ಲಿ ಅಗ್ನಿಶಾಮಕ ಠಾಣೆಯ ಕಟ್ಟಡ ಪೂರ್ಣವಾಗಿದ್ದು, ವಾಹನಗಳು ಲಭ್ಯವಾದಲ್ಲಿ, ತಿಂಗಳಾಂತ್ಯದಲ್ಲಿ ಅಗ್ನಿಶಾಮಕ ಠಾಣೆಯು ಉದ್ಘಾಟನೆಯಾಗಬಹುದು ಎಂದು ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ವಿ.ಎಸ್. ಟಕ್ಕೇಕರ ತಿಳಿಸಿದ್ದಾರೆ.