ಕುರಿ ಹಟ್ಟಿ ಗುಡಿಸಲಿನಲ್ಲಿ ಪ್ರಥಮ ಪೂಜಿತನ ಆರಾಧನೆ

ಅಮರೇಶ್ವರಸ್ವಾಮಿ ಕಂದಗಲ್ಲಮಠ ಕುಕನೂರು

ತಾಲೂಕಿನ ಮಂಡ್ಲಿಗೇರಿ ಸೀಮಾದ ವ್ಯಾಪ್ತಿಯಲ್ಲಿ ಕುರಿಗಳನ್ನು ಮೇಯಿಸುತ್ತಾ ಬಂದಿರುವ ನಿಪ್ಪಾಣಿ ಕುರಿಗಾರರು ಗಣೇಶ ಹಬ್ಬದ ಪ್ರಯುಕ್ತ ಗಣೇಶನನ್ನು ವಿಶೇಷ ರೀತಿಯಲ್ಲಿ ಸ್ಥಾಪಿಸಿ ಭಕ್ತಿ ಮೆರೆದಿದ್ದಾರೆ.

ಐದು, ಆರು ದಿನ ಹೀಗೆ ತಾವಿರುವ ಜಮೀನಿನಲ್ಲಿ ಹಾಕಿರುವ ಗುಡಿಸಿಲಿನಲ್ಲಿ ಗಣೇಶನನ್ನು ಆರಾಧನೆ ಮಾಡುತ್ತಾರೆ. ಕುರಿ ಕಾಯುತ್ತಾ ಹಬ್ಬ ಹಾಗೂ ಭಕ್ತಿ ಪಾಲಿಸುತ್ತಾ ಬದುಕು ಕಟ್ಟಿಕೊಂಡಿದ್ದಾರೆ. ಗಣೇಶ ಹಬ್ಬಕ್ಕೆಂದು ತಮ್ಮ ಕುಟುಂಬ ವರ್ಗವನ್ನು ತಾವಿರುವ ಸ್ಥಳಕ್ಕೆ ಕರೆಯಿಸಿಕೊಂಡು ಗಣೇಶ ಮೂರ್ತಿ ವಿಸರ್ಜನೆ ದಿನದ ವರೆಗೂ ವಿಶೇಷವಾದ ಪ್ರಸಾದ ಮಾಡುತ್ತಾರೆ.ನಿತ್ಯ ಗಣೇಶನಿಗೆ ವಿಶೇಷ ನೈವೇದ್ಯ ಸಹ ಸಮರ್ಪಿಸಿ ಭಕ್ತಿ ಮೆರೆಯುತ್ತಿದ್ದಾರೆ.

ಕುರಿ ಕಾಯುತ್ತಾ ನಿತ್ಯದ ಜೀವನ ನಡೆಸುವುದು ಸಾಮಾನ್ಯ ಕೆಲಸವಲ್ಲ. ಈ ಮಧ್ಯೆ ಏಳು ದಿನ ಗಣೇಶನನ್ನು ಸ್ಥಾಪಿಸಿ ಕುರಿಗಾರರು ಪೂಜೆ ಮಾಡುತ್ತಿರುವುದು ನಿಜಕ್ಕೂ ಭಕ್ತಿಯ ಸಂಕೇತ. ಕುರಿಗಾರರ ಭಕ್ತಿ ನಿಜಕ್ಕೂ ಮಾದರಿ ಎಂದು ಮಂಡ್ಲಿಗೇರಿಯ ರೈತ ಮಹಿಳೆ ಶಿವಲೀಲಾ ದಳವಾಯಿ ಹೇಳಿದರು.