ಸೇನೆಯಲ್ಲಿ ಕೆಲಸ ಕೊಡಿಸುವುದಾಗಿ ಲಕ್ಷಾಂತರ ರುಪಾಯಿ ಹಣ ವಂಚನೆ

ಕ್ರೀಡಾ ಕೋಟಾದಡಿ ಕೆಲಸ ಕೊಡಿಸುವುದಾಗಿ ವಂಚಿಸುತ್ತಿದ್ದ ಮಾಜಿ ಸೈನಿಕನ ಬಂಧನಕನ್ನಡಪ್ರಭ ವಾರ್ತೆ ಹೊಸದುರ್ಗ

ಸೇನೆಯಲ್ಲಿ ಕೆಲಸ ಮಾಡುತ್ತಿದ್ದ ಹುಬ್ಬಳ್ಳಿ ಮೂಲದ ಶಿವರಾಜ್‌ ಎಂಬಾತ ಕ್ರಿಮಿನಲ್‌ ಪ್ರಕರಣದಲ್ಲಿ ಭಾಗಿಯಾಗಿ ಸೇನೆಯಿಂದ ವಜಾಗೊಂಡಿದ್ದ. ನಂತರ ಶ್ರೀರಾಂಪುರ ಸಮೀಪದ ಗವಿರಂಗಾಪುರ ಬೆಟ್ಟದಲ್ಲಿ ಸ್ಥಗಿತಗೊಂಡಿರುವ ಖಾಸಗಿ ಶಾಲಾ ಕಟ್ಟಡವನ್ನು ಬಾಡಿಗೆ ಪಡೆದು ಅಲ್ಲಿ ಶಿವಾಜಿ ರಾಜ್‌ ಕ್ರೀಡೆ ಮತ್ತು ಸ್ಪರ್ಧಾತ್ಮಕ ಅಕಾಡೆಮಿ ನಡೆಸುತ್ತಿರುವುದಾಗಿ ಹೇಳಿಕೊಂಡಿದ್ದ., ಇದರಲ್ಲಿ ತರಬೇತಿ ಪಡೆದವರಿಗೆ ಕ್ರೀಡಾ ಕೋಟಾದಲ್ಲಿ ಸೇನೆ ಮತ್ತು ರೇಲ್ವೆ ಇಲಾಖೆಯಲ್ಲಿ ಕೆಲಸ ಕೊಡಿಸುವುದಾಗಿ ನಂಬಿಸಿ ಅವರಿಂದ 10 ಸಾವಿರದಿಂದ 2 ಲಕ್ಷದವರೆಗೂ ಹಣ ಪೀಕಿದ್ದಾನೆ. ಯುವಕರಿಂದ ಪಡೆದ ಹಣವನ್ನು ಈತನ ಜತೆ ಕೈ ಜೋಡಿಸಿದ್ದ ಭೀಮವ್ವ ಎನ್ನುವವರ ಬ್ಯಾಂಕ್‌ ಖಾತೆಗೆ ಹಾಕಿಸಿಕೊಂಡು ಇಬ್ಬರೂ ಐಷಾರಾಮಿ ಜೀವನ ನಡೆಸುತ್ತಿದ್ದರು ಎನ್ನಲಾಗಿದೆ. ಈತನ ನಡವಳಿಕೆ ಬಗ್ಗೆ ಅನುಮಾನ ಬಂದ ಕೆಲ ಯುವಕರು ಮೊದಲು ನಮಗೆ ಕೆಲಸದ ಭರವಸೆ ಕೊಡಿಸಿ ನಂತರ ಹಣ ಕೊಡುತ್ತೇವೆ ಎಂದು ಹೇಳಿದ್ದಾರೆ. ಕೆಲ ಯುವಕರನ್ನು ಕರೆದುಕೊಂಡು ಕಳೆದ ತಿಂಗಳು ಬೆಂಗಳೂರಿನ ಸೇನಾ ಕಚೇರಿಗೆ ಕರೆದುಕೊಂಡು ಹೋಗಿದ್ದಾನೆ. ಆಗ ಯುವಕರನ್ನು ಕಚೇರಿಯ ಹೊರಗೆ ನಿಲ್ಲಿಸಿ ನಾನು ಅಧಿಕಾರಿಗಳೊಂದಿಗೆ ಮಾತನಾಡಿಕೊಂಡು ಬರುತ್ತೇನೆ ಎಂದು ಹೇಳಿ ಶಿವರಾಜ್‌ ಕಛೇರಿ ಒಳಗೆ ಹೋಗಿದ್ದಾನೆ. ಆಗ ಹೊರಗಡೆ ಹೋಗಿದ್ದ ಸೇನಾ ಇಲಾಕೆಯ ಅಧಿಕಾರಿಗಳು ಹೊರಗಡೆ ಯುವಕರ ಗುಂಪು ನಿಂತಿರುವುದನ್ನು ಕಂಡು ಏಕೆ ನಿಂತಿದ್ದೀರೀ ಎಂದು ಪ್ರಶ್ನಿಸಿದಾಗ ಕೆಲಸದ ಬಗ್ಗೆ ಮಾತನಾಡಿದ್ದಾರೆ. ಆಗ ಅವರ ಬಳಿ ಮಾಹಿತಿ ಪಡೆದ ಸೇನಾ ಅಧಿಕಾರಿಗಳು ಶಿವರಾಜ್‌ ಪೂರ್ವಾಪರ ಜಾಲಾಡಿ ಈತ ಒಬ್ಬ ಫ್ರಾಡ್‌ ಎಂದು ಹೇಳಿ ಯುವಕರಿಗೆ ತಿಳಿಸಿ ಪೊಲೀಸರಿಗೆ ದೂರು ನೀಡುವಂತೆ ಸೂಚಿಸಿದ್ದಾರೆ .ಈತನ ಬಂಡವಾಳ ತಿಳಿಯುತ್ತಿದ್ದಂತೆ ಅಲ್ಲಿಂದ ವಾಪಾಸ್ಸಾದ ಯುವಕರು ಶ್ರೀರಾಂಪುರ ಪೊಲೀಸರಿಗೆ ದೂರು ನೀಡಿದ್ದಾರೆ. ಯುವಕರ ದೂರಿನ ಮೇರೆಗೆ ಶಿವರಾಜ್‌ ಹಾಗೂ ಇತರರನ್ನು ಬಂಧಿಸಿರುವ ಶ್ರೀರಾಂಪುರ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ. ಈತನ ಮೋಸದ ಜಾಲಕ್ಕೆ ಸಿಲುಕಿರುವವರು ಯಾರಾದರೂ ಇದ್ದರೆ ದೂರು ನೀಡುವಂತೆ ಹಾಗೂ ಇಂತಹ ಅಕಾಡೆಮಿಗಳ ಬಗ್ಗೆ ಪೂರ್ವಾಪರ ತಿಳಿಯದೆ ಈ ರೀತಿ ಮೋಸ ಹೋಗದಂತೆ ಶ್ರೀರಾಂಪುರ ಠಾಣೆ ಪಿಐ ಮಧುಕುಮಾರ್‌ ತಿಳಿಸಿದ್ದಾರೆ.ಈ ಸುದ್ದಿಗೆ ಪೂರಕ: