ಕನ್ನಡ ಸಾಹಿತ್ಯ ಲೋಕಕ್ಕೆ ಜಿ.ಸೂರಿ ಕೊಡುಗೆ ಅಪಾರ: ರವೀಶ್

ಕನ್ನಡಪ್ರಭ ವಾರ್ತೆ, ಚಿಕ್ಕಮಗಳೂರುತಮ್ಮದೇ ಶೈಲಿಯಲ್ಲಿ ನೂರಕ್ಕೂ ಹೆಚ್ಚು ಪುಸ್ತಕಗಳನ್ನು ರಚಿಸಿರುವ ಅಜ್ಜಂಪುರ ಜಿ.ಸೂರಿ ಜಿಲ್ಲೆ ಕಂಡ ಅತ್ಯುತ್ತಮ ಕನ್ನಡ ಹಾಗೂ ಸಾಹಿತ್ಯ ಪ್ರೇಮಿ ಎಂದು ಜಿಲ್ಲಾ ಶರಣ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ರವೀಶ್ ಕ್ಯಾತನಬೀಡು ಹೇಳಿದರು.ನಗರದ ಎನ್.ಎಂ.ಸಿ. ವೃತ್ತದ ಜಿಲ್ಲಾ ಕೈಗಾರಿಕಾ ಸರಬರಾಜು ಮತ್ತು ಮಾರಾಟ ಸಹಕಾರ ಸಂಘದ ಸಭಾಂಗಣದಲ್ಲಿ ಅಜ್ಜಂಪುರ ಜಿ.ಸೂರಿ ಸಾಂಸ್ಕೃತಿಕ ಪ್ರತಿಷ್ಠಾನ ಸಾಹಿತಿ ಅಜ್ಜಂಪುರ ಜಿ.ಸೂರಿ ಅವರ 87ನೇ ಜನ್ಮದಿನದ ಅಂಗವಾಗಿ ಏರ್ಪಡಿಸಿದ್ದ ಕಾರ್ಯಕ್ರಮದಲ್ಲಿ ಅವರು ಬದುಕು-ಬರಹ ಕುರಿತು ವಿಶೇಷ ಉಪನ್ಯಾಸ ನೀಡಿದರು. ಇತ್ತೀಚಿನ ಲೇಖಕರು ಸಾಹಿತ್ಯದ ಗಂಧ ಅರಿಯದೇ ಕೆಲವೇ ಪುಸ್ತಕಗಳನ್ನು ರಚಿಸಿ ಬೀಗುತ್ತಿದ್ದಾರೆ. ಆದರೆ ಸೂರಿಯವರು ಸುಮಾರು 150 ಪುಸ್ತಕ ಗಳನ್ನು ಸ್ವಯಂ ರಚಿಸಿದರೂ ಯಾವುದೇ ಅಹಂವಿಲ್ಲದೇ ವಿನಯದಿಂದ ನಡೆದುಕೊಂಡವರು. ಅಲ್ಲದೇ ಅವರ ಮಕ್ಕಳು, ಹಿರಿಯರೊಂದಿಗಿನ ಒಡನಾಟವೂ ಗೌರವದಿಂದ ಕೂಡಿರುತ್ತಿತ್ತು ಎಂದು ತಿಳಿಸಿದರು.

ಸಾಹಿತಿ ಡಿ.ಎಂ. ಮಂಜುನಾಥಸ್ವಾಮಿ ಮಾತನಾಡಿ, ಸಾಹಿತ್ಯ ಚಟುವಟಿಕೆ ಅಲ್ಲದೇ ನಾಟಿ ವೈದ್ಯರಾಗಿ ಪರಿಣಿತಿ ಜಿ.ಸೂರಿ ಹೊಂದಿದ್ದರು. ಜೊತೆಗೆ ಇಡೀ ಕುಟುಂಬವೇ ಭುವನೇಶ್ವರಿ ಸೇವೆಯಲ್ಲಿ ಇಂದಿಗೂ ತೊಡಗಿರುವುದು ಸಾಮಾನ್ಯವಲ್ಲ. ಕಲೆ, ಸಾಹಿತ್ಯ, ಕಾದಂಬರಿ, ಕಥೆಗಳು ರಚಿಸುವಲ್ಲಿ ಅನನ್ಯ ಸೇವೆ ನೀಡಿದವರು ಎಂದು ಹೇಳಿದರು.