ಅಯೋಧ್ಯೆಗೆ ಹೊರಟ ಗಾಂಧಿ ವೇಷಧಾರಿ ಮುತ್ತಣ್ಣನಿಗೆ ಗೌರವ ಸನ್ಮಾನ

ಜನವರಿಯಲ್ಲಿ ರಾಮಮಂದಿರ ಉದ್ಘಾಟನೆ ನಿಮಿತ್ತ ಕರ್ಕಿಕಟ್ಟಿಯಿಂದ ಮುತ್ತಣ್ಣ ಪಾದಯಾತ್ರೆ

ಸಾನ್ನಿಧ್ಯವಹಿಸಿದ್ದ ಬೈರನಹಟ್ಟಿಯ ದೊರೆಸ್ವಾಮಿ ವಿರಕ್ತಮಠದ ಶಾಂತಲಿಂಗ ಸ್ವಾಮೀಜಿ ಮಾತನಾಡಿ, ದೇಶಪ್ರೇಮ, ಪರಿಸರಪ್ರೇಮ ಇಟ್ಟುಕೊಂಡು ಅನೇಕ ಜಾಗೃತಿ ಜಾಥಾ, ಅಭಿಯಾನ ಮಾಡಿರುವ ಕರ್ಕಿಕಟ್ಟಿ ಗ್ರಾಮದ ಆಧುನಿಕ ಗಾಂಧಿ ಎಂದೇ ಹೆಸರುವಾಸಿಯಾಗಿರುವ ಮುತ್ತಣ್ಣ ತಿರ್ಲಾಪರ ಅವರ ಅಯೋಧ್ಯೆ ಪಾದಯಾತ್ರೆ ಸುಗಮವಾಗಿರಲಿ ಮತ್ತು ಅನೇಕ ಸಾಧು ಸಂತರ ಕೃಪೆ, ಜಿಲ್ಲೆಯ, ರಾಜ್ಯದ, ದೇಶದ ಹಾಗೂ ಕರ್ಕಿಕಟ್ಟಿ ಗ್ರಾಮದ ಎಲ್ಲ ಜನರ ಆಶೀರ್ವಾದ ಅವರ ಮೇಲಿರಲಿ ಎಂದು ಹಾರೈಸಿದರು.

ಈ ಸಂದರ್ಭದಲ್ಲಿ ಮಾಜಿ ಸೈನಿಕರು, ಸೈನಿಕರು, ಗ್ರಾಮದ ಗುರು ಹಿರಿಯರು, ಗ್ರಾಮದ ಮಹಿಳೆಯರು ಆರತಿ ಮಾಡಿ, ಗ್ರಾಮದ ಮನೆಮನೆಯಿಂದ ಹಿರಿಯರು, ಮಹಿಳೆಯರು, ಯುವಕರು ನಡೆದು ಶುಭ ಹಾರೈಸಿದರು. ಈ ಸಂದರ್ಭದಲ್ಲಿ ನಾನು ಇಲ್ಲಿಂದ ಅಯೋಧ್ಯೆಗೆ ಹೋಗುವ ದಾರಿಯುದ್ದಕ್ಕೂ ಪರಿಸರ ರಕ್ಷಣೆ ಜಾಗೃತಿ, ದುಶ್ಚಟಗಳ ನಿರ್ಮೂಲನೆ, ಸ್ವಾತಂತ್ರ್ಯ ಹೋರಾಟಗಾರರ ತ್ಯಾಗ, ಮಹಾನ್ ವ್ಯಕ್ತಿಗಳ ಬಗ್ಗೆ ಜಾಗೃತಿ ಅಭಿಯಾನ ಮಾಡುತ್ತಾ ಹೋಗುತ್ತೇನೆ ಎಂದು ತಿರ್ಲಾಪುರ ಮುತ್ತಣ್ಣ ಹೇಳಿದರು.