ಮಕ್ಕಳಿಗೆ ಸೃಜನಶೀಲ, ಮೌಲ್ಯಯುತ ಶಿಕ್ಷಣ ನೀಡಿ

ಗದಗ: ಶಿಕ್ಷಣ ವ್ಯವಸ್ಥೆಯ ಬಹುಮುಖ್ಯ ಅಂಗಗಳಾಗಿರುವ ಶಿಕ್ಷಕರು ಸೃಜನಶೀಲ ಮತ್ತು ಮೌಲ್ಯಯುತ ಶಿಕ್ಷಣ ನೀಡುವುದರ ಮೂಲಕ ವಿದ್ಯಾರ್ಥಿಗಳ ಸರ್ವಾಂಗೀಣ ವ್ಯಕ್ತಿತ್ವ ವಿಕಸನಕ್ಕೆ ಶ್ರಮಿಸಬೇಕೆಂದು ಶಾಲಾ ಶಿಕ್ಷಣ ಇಲಾಖೆಯ ನಿವೃತ್ತ ಉಪನಿರ್ದೇಶಕ ಜಿ.ಎಂ. ಬಸವಲಿಂಗಪ್ಪ ಹೇಳಿದರು.

ಶಿಕ್ಷಕರ ಕಾರ್ಯವು ಕೇವಲ ಓದು, ಬರಹ ಮತ್ತು ಲೆಕ್ಕಾಚಾರ ಕಲಿಸುವುದಲ್ಲ, ಅವರ ನಿಜವಾದ ಕಾಯಕವೆಂದರೆ ವಿದ್ಯಾರ್ಥಿಗಳಲ್ಲಿರುವ ಪ್ರತಿಭೆ ಗುರುತಿಸಿ, ಪ್ರೋತ್ಸಾಹಿಸುವುದು. ಮಕ್ಕಳಲ್ಲಿ ಚಿಕಿತ್ಸಕ ಮನೋಭಾವನೆ ಬೆಳೆಸುವುದು ಇಂದಿನ ಅವಶ್ಯಕತೆ ಆಗಿದೆ. ನಮ್ಮ ಭಾರತೀಯ ಪರಂಪರಾಂಗತವಾಗಿ ಬಂದ ನೈತಿಕ ಮೌಲ್ಯ ಹೇಳಿಕೊಡುವುದರ ಜತೆಗೆ ಆಧುನಿಕ ತಂತ್ರಜ್ಞಾನ, ಪಾಠೋಪಕರಣ ಮತ್ತು ಕಲಿಕಾ ಸಾಧನ, ಸಲಕರಣಗಳನ್ನು ಶಿಕ್ಷಕರು ಪರಿಣಾಮಕಾರಿಯಾಗಿ ಬಳಸಿಕೊಂಡು ಪ್ರಭಾವಯುತವಾಗಿ ಬೋಧನೆ ಮಾಡಬೇಕು ಎಂದರು.