ಧಾನ್ಯ ಸಂಗ್ರಹಿಸುವ ಉಗ್ರಾಣವೇ ವಸತಿ ಶಾಲೆಯಾಗಿ ಮಾರ್ಪಾಡು!

ನಾಗರಾಜ ಎಸ್.ಬಡದಾಳ್‌

ಭತ್ತ, ಮೆಕ್ಕೆಜೋಳ ಇತರೆ ಧಾನ್ಯ ಸಂಗ್ರಹಿಸಿಡುವ ಉಗ್ರಾಣವನ್ನೇ ಶಾಲೆಯಾಗಿ ಪರಿವರ್ತಿಸಿ, ಗೋದಾಮಿನ ವಿಶಾಲ ಒಳಾಂಗಣದಲ್ಲಿ ಗೋಡೆಗಳ ಕಟ್ಟಿ ವಸತಿ ಶಾಲೆ ನಡೆಸಿ ಅದೇ ಉಗ್ರಾಣದಲ್ಲಿ ಬಾಗಿಲುಗಳಿಲ್ಲದ ಶೌಚಾಲಯ, ಸ್ನಾನದ ಮನೆ ಸೌಲಭ್ಯ ನೀಡಿ ಸಮಾಜ ಕಲ್ಯಾಣ ಇಲಾಖೆಯು ಸಂವಿಧಾನ ಶಿಲ್ಪಿ ಡಾ.ಬಿ.ಆರ್‌.ಅಂಬೇಡ್ಕರ್‌ ವಸತಿ ಶಾಲೆ ಎಂಬ ಖ್ಯಾತಿಗೆ ಮಸಿ ಬಳಿಯುವ ಕೆಲಸ ಮಾಡುತ್ತಿದೆ.

ಮಕ್ಕಳಿಗಾಗಿ ಸರ್ಕಾರ ಕೋಟಿಗಟ್ಟಲೇ ಹಣ ಸುರಿಯುತ್ತಿದ್ದರೂ ಸೌಲಭ್ಯಗಳೇ ಮರೀಚಿಕೆಯಾಗಿವೆ. ಸರ್ಕಾರದ ಕರ್ನಾಟಕ ವಸತಿ ಶಿಕ್ಷಣ ಸಂಸ್ಥೆಗಳ ಸಂಘ(ಕ್ರೈಸ್‌)ದ ವ್ಯಾಪ್ತಿಗೊಳಪಡುವ ಶಾಲೆ ಇದು. 6ರಿಂದ 10ನೇ ತರಗತಿವರೆಗಿನ ಬಾಲಕ-ಬಾಲಕಿಯರು ಸೇರಿ ಸುಮಾರು 250 ಮಕ್ಕಳು ಓದುವ ಶಾಲೆಯಲ್ಲಿ ನೆಲದ ಮೇಲೆಯೇ ಕುಳಿತು ಪಾಠ ಆಲಿಸಬೇಕು. ಕೊಠಡಿಗಳ ಫ್ಯಾನ್ ಹಾಗೂ ಸೀಲಿಂಗ್ ಸ್ಥಿತಿ ನೋಡಿದರೆ ಯಾವಾಗ ಕಿತ್ತು ಮಕ್ಕಳ ಮೇಲೆ ಬೀಳುತ್ತವೋ ಎಂಬಂತಿವೆ. ಶಾಲೆಗೆ ಕೆಲಸಗಾರರಿದ್ದರೂ ಶಾಲಾ ಮಕ್ಕಳಿಂದಲೇ ಕೆಲಸ ಮಾಡಿಸುವುದು ಇಲ್ಲಿ ನಿಂತಿಲ್ಲ.

ಗೋದಾಮಿನ ಮೇಲ್ಚಾವಣಿಗ ಸಿಮೆಂಟ್‌, ತಗಡಿನ ಶೀಟುಗಳ ಕಾವಿನ ಜೊತೆಗೆ ಅಲ್ಲಲ್ಲಿ ಬಿಟ್ಟಿರುವ ಕಿಂಡಿಯಿಂದ ಬರುವ ಬೆಳಕೇ ಇಡೀ ಶಾಲೆಗೆ ಆಸರೆಯಾಗಿದೆ. ಗಾಳಿ, ಬೆಳಕು ಇಲ್ಲದೇ, ಪಾರಿವಾಳ, ಗುಬ್ಬಿ ಸೇರಿ ಪಕ್ಷಿಗಳು ಉಗ್ರಾಣದಲ್ಲಿ ಹಾರಾಡುತ್ತಾ ತರಗತಿಗಳು, ಅಡುಗೆ ಮನೆ, ಅಲ್ಲಿ ಓದಲು ಕುಳಿತ ಮಕ್ಕಳ ಮೇಲೆ ಹಿಕ್ಕೆ ಹಾಕುತ್ತಿರುತ್ತವೆ. ಕ್ರೈಸ್‌ನಿಂದ 2022ರಲ್ಲೇ ಉಗ್ರಾಣದಲ್ಲಿರುವ ನಡೆಸುತ್ತಿರುವ ಡಾ.ಬಿ.ಆರ್‌.ಅಂಬೇಡ್ಕರ್ ವಸತಿ ಶಾಲೆಯನ್ನು ಸೂಕ್ತ ಕಟ್ಟಡಕ್ಕೆ, ಮೂಲ ಸೌಕರ್ಯ ಕಡೆ ಸ್ಥಳಾಂತರಿಸ ಆದೇಶ ಬಂದಿದೆ. ಆದರೆ, ಅದ್ಯಾವುದಕ್ಕೂ ಶಾಲಾ ಮುಖ್ಯಸ್ಥರು, ಪ್ರಾಚಾರ್ಯರು, ಸಿಬ್ಬಂದಿಯಾಗಲೀ ಕಿವಿಗೊಟ್ಟಿಲ್ಲ ಎಂಬ ಮಾತು ಕೇಳಿ ಬರುತ್ತಿದೆ.