ತೆಂಗು ಕೃಷಿಗೆ ಉತ್ತಮ ಭವಿಷ್ಯ: ಕೃಷಿಕ ಕುಪ್ಪು ಗೌಡ

ಕುಮಟಾ: ತೆಂಗು ಬೆಳೆಗೆ ಉತ್ತಮ ಭವಿಷ್ಯವಿದೆ. ರೈತರು ತೆಂಗನ್ನು ಹೆಚ್ಚು ಉತ್ಪಾದಿಸಬೇಕು. ತೆಂಗಿನ ಸದ್ಯದ ಬೆಲೆ ಕೂಡ ಆಶಾದಾಯಕವಾಗಿದೆ. ಇದೇ ಬೆಲೆಯನ್ನು ಕಾಯ್ದುಕೊಂಡಲ್ಲಿ ತೆಂಗು ಬೆಳೆಗಾರರು ಆರ್ಥಿಕವಾಗಿ ಪ್ರಗತಿ ಹೊಂದಲು ಸಾಧ್ಯ ಎಂದು ತೆಂಗು ಹಾಗೂ ಡ್ರ್ಯಾಗನ್ ಫ್ರುಟ್ ಕೃಷಿಕ ಕುಪ್ಪು ಗೌಡ ಹೇಳಿದರು.

ಕಾರ್ಯಕ್ರಮದಲ್ಲಿ ತೆಂಗು ಕೊಯ್ಲು ಕೃಷಿ ಕಾರ್ಮಿಕರಿಗೆ ಕೇರ್ ಸುರಕ್ಷಾ ವಿಮಾ ಗುರುತಿನ ಚೀಟಿಯನ್ನು ವಿತರಿಸಿದ ಸಹಾಯಕ ತೋಟಗಾರಿಕಾ ನಿರ್ದೇಶಕ ಲಿಂಗರಾಜ್ ಇತ್ನಾಳ್, ಎವಿಪಿ ಸಂಸ್ಥೆಯು ತಾಲೂಕಿನ ರೈತರಿಗೆ ಹೆಚ್ಚಿನ ಸೇವೆಯನ್ನು ನೀಡುವ ಉತ್ತಮ ಸಂಸ್ಥೆಯಾಗಿದೆ ಎಂದರು. ತೋಟಗಾರಿಕಾ ಇಲಾಖೆಯ ೨೦೨೫-೨೬ ನೇ ಸಾಲಿನ ಸಹಾಯಧನದ ಯೋಜನೆ ಮಾಹಿತಿ ನೀಡಿದರು.

ಕಾರ್ಯಕ್ರಮದಲ್ಲಿ ತೆಂಗು ಕೃಷಿಯ ಸಮಗ್ರ ಮಾಹಿತಿ ಪತ್ರ ಬಿಡುಗಡೆಗೊಳಿಸಲಾಯಿತು. ಸಂಸ್ಥೆಯ ನಿರ್ದೇಶಕ ಕೃಷ್ಣ ನಾಯ್ಕ, ಈಶ್ವರ ಎಂ. ಕೊಡಿಯಾ, ಸಿ.ಎಂ. ಪಟಗಾರ ವೇದಿಕೆಯಲ್ಲಿದ್ದರು. ರೈತರಾದ ಡಿ.ಕೆ.ಹೆಗಡೆ, ಸುರೇಶ್ ಭಟ್, ಸದಾನಂದ ಪಟಗಾರ, ಶಂಕರ ಗೌಡ ಇದ್ದರು. ಸಂಸ್ಥೆಯ ಎಚ್.ಶಿವರಾಮ್ ಸ್ವಾಗತಿಸಿ, ನಿರೂಪಿಸಿದರು. ಪ್ರತಿಭಾ ವಂದಿಸಿದರು.