ಗ್ಯಾರಂಟಿ ಹಣ ಸಂಗ್ರಹಕ್ಕಾಗಿ ರೈತರಿಗೆ ಸರ್ಕಾರ ಬರೆ

ನೀರಾವರಿ ಪಂಪ್‌ಸೆಟ್‌ಗೆ ಕೃಷಿಕರ ಸ್ವಂತ ಹಣದಲ್ಲಿ ವಿದ್ಯುತ್‌ ಸಂಪರ್ಕದ ಆದೇಶ ಹಿಂಪಡೆಯಲಿ: ಲೋಕಿಕೆರೆ ನಾಗರಾಜ ತಾಕೀತು

ಗ್ಯಾರಂಟಿ ಯೋಜನೆಗೆ ಹಣ ಹೊಂದಿಸಲು ಕೃಷಿ ಪಂಪ್‌ಸೆಟ್‌ಗಳಿಗೆ ಟ್ರಾನ್ಸ್‌ಫಾರ್ಮರ್‌ ಸಹಿತ ಮೂಲ ಸೌಲಭ್ಯ ಒದಗಿಸುವ ಯೋಜನೆ ರದ್ದುಪಡಿಸಿ, ರೈತರು ಸ್ವಂತ ಖರ್ಚಿನಲ್ಲಿ ವಿದ್ಯುತ್ ಸಂಪರ್ಕ ಪಡೆಯಬೇಕೆಂಬ ಆದೇಶ ಹೊರಡಿಸಿರುವುದು ಬರದಿಂದ ತತ್ತರಿಸಿದ ರೈತರ ಗಾಯದ ಮೇಲೆ ಬರೆ ಎಳೆದಂತಾಗಿದೆ ಎಂದು ಬಿಜೆಪಿ ರೈತ ಮೋರ್ಚಾ ಜಿಲ್ಲಾಧ್ಯಕ್ಷ ಲೋಕಿಕೆರೆ ನಾಗರಾಜ ಆಕ್ರೋಶ ವ್ಯಕ್ತಪಡಿಸಿದರು.

ಕಳೆದೊಂದು ದಶಕದಿಂದ ಅಕ್ರಮ ಸಕ್ರಮ ಜಾರಿಯಲ್ಲಿತ್ತು. ರೈತರು ಸುಮಾರು 20 ಸಾವಿರ ರು. ಶುಲ್ಕ ಪಾವತಿಸಿ, ಪಂಪ್‌ಸೆಟ್‌ ವಿದ್ಯುತ್ ಸಂಪರ್ಕ ಪರವಾನಗಿ ಪಡೆದರೆ, ವಿದ್ಯುತ್ ಕಂಪನಿಗಳೇ ವಿದ್ಯುತ್ ಸಂಪರ್ಕ ಕಲ್ಪಿಸಬೇಕಿತ್ತು. ಆದರೆ, ಕಾಂಗ್ರೆಸ್ ಸರ್ಕಾರದ ಹೊಸ ನೀತಿಯಿಂದ ವಿದ್ಯುತ್ ಜಾಲ ಎಷ್ಟೇ ದೂರ ಇದ್ದರೂ, ರೈತರು ತಮ್ಮ ಸ್ವಂತ ಹಣದಲ್ಲಿ ವಿದ್ಯುತ್ ಕಂಬ, ತಂತಿ ಹಾಕಿಸಬೇಕಿದೆ. ಅಲ್ಲದೇ, ಲಕ್ಷಾಂತರ ರು. ಖರ್ಚು ಮಾಡಿ, ಟ್ರಾನ್ಸಫಾರ್ಮರ್ ಪಡೆಯಬೇಕಾದ ಸಂದಿಗ್ಧ ಸ್ಥಿತಿ ನಿರ್ಮಿಸಲಾಗಿದೆ ಎಂದು ದೂರಿದರು.

ರೈತ ಮೋರ್ಚಾ ರಾಜ್ಯ ಸಮಿತಿ ಮುಖಂಡ, ಎಪಿಎಂಸಿ ಮಾಜಿ ಅಧ್ಯಕ್ಷ ಬಿ.ಎಂ.ಸತೀಶ ಕೊಳೇನಹಳ್ಳಿ, ಕಡ್ಲೇಬಾಳು ಧನಂಜಯ, ಮಾಜಿ ಮೇಯರ್ ಎಚ್‌.ಎನ್‌.ಗುರುನಾಥ, ಅಣಜಿ ಗುಡ್ಡೇಶ, ಎಪಿಎಂಸಿ ಮಾಜಿ ಅಧ್ಯಕ್ಷ ಎಚ್‌.ಜಿ. ಗಣೇಶಪ್ಪ ಕುಂದುವಾಡ, ಬಾತಿ ರೇವಣಸಿದ್ದಪ್ಪ, ಕಡ್ಲೇಬಾಳು ಬಸವರಾಜ, ಅಣಬೇರು ಶಿವಪ್ರಕಾಶ ಇತರರಿದ್ದರು.

ಬಿಜೆಪಿ ತಂದ ರೈತ ಪರ ಯೋಜನೆಗಳಾದ ಕಿಸಾನ್ ಸಮ್ಮಾನ್‌ ನಿಧಿ, ರೈತ ವಿದ್ಯಾನಿಧಿ, ಭೂ ಚೇತನ, ಭೂ ಸಿರಿ ಸೇರಿ ಅನೇಕ ಯೋಜನೆಗಳ ಅನುದಾನದ ನೆಪವೊಡ್ಡಿ, ಕಾಂಗ್ರೆಸ್ ಸರ್ಕಾರ ರದ್ದುಪಡಿಸಿದೆ. ವಿದ್ಯುತ್ ಅಭಾವ, ರೈತರ ಸರಣಿ ಆತ್ಮಹತ್ಯೆ, ಬರ ಪೀಡಿತ ಪ್ರದೇಶದ ರೈತರ ನೆರವಿಗೆ ಬರಬೇಕಾದ ಕಾಂಗ್ರೆಸ್ ಸರ್ಕಾರವಾಗಲೀ, ಜಿಲ್ಲಾ ಉಸ್ತುವಾರಿ ಸಚಿವರೂ ಬರ ಪೀಡಿತ ಪ್ರದೇಶಕ್ಕೆ ಹೋಗಿ ರೈತರ ಅಹವಾಲು, ರೈತರಿಗೆ ಧೈರ್ಯ ತುಂಬುವ ಕೆಲಸ ಮಾಡಿಲ್ಲ ಎಂದು ಲೋಕಿಕೆರೆ ನಾಗರಾಜ ದೂರಿದರು.