ರೋಣದಲ್ಲಿ ಸಂಭ್ರಮದ ವಿಜಯದಶಮಿ ಆಚರಣೆ

ಕನ್ನಡಪ್ರಭ ವಾರ್ತೆ ರೋಣ

ಪಟ್ಟಣದ ಗಜೇಂದ್ರಗಡ ರಸ್ತೆಯಲ್ಲಿರುವ ನಾಗರ ಕಟ್ಟೆಯಲ್ಲಿನ ಶಮಿವೖಕ್ಷ (ಬನ್ನಿ ಗಿಡ)ಕ್ಕೆ ತಾಲೂಕು ಆಡಳಿತ ಹಾಗೂ ಪಾಟೀಲ ಮನೆತನದಿಂದ ವಿವಿದ ಪೂಜೆ ಕೈಂಕರ್ಯ ನೆರವೇರಿಸಲಾಯಿತು. ಪೂಜಾ ಕೈಂಕರ್ಯವನ್ನು ತಾಲೂಕು ಆಡಳಿತ ಪರವಾಗಿ ತಹಸೀಲ್ದಾರ ನಾಗರಾಜ ಕೆ. ಹಾಗೂ ಪಾಟೀಲ ಮನೆತನ ಪರವಾಗಿ ಗ್ಯಾರಂಟಿ ಯೋಜನೆಗಳ ಅನುಷ್ಠಾನ‌ ಸಮಿತಿ ತಾಲೂಕು ಅಧ್ಯಕ್ಷ ಮಿಥುನ ಜಿ. ಪಾಟೀಲ ಹಾಗೂ ರೈತರ ಸಮುದಾಯ, ಪಟ್ಟಣದ ಜತನೆ ಸಮಕ್ಷಮ ಶಮಿ ವೃಕ್ಷಕ್ಕೆ ಪೂಜೆ, ಮಂತ್ರಾಕ್ಷತೆ, ವಿವಿಧ ಪೂಜಾ ವಿಧಾನಗಳು ಆಚಾರ್ಯ ಪ್ರಹ್ಲಾದ ಜೋಶಿ ನೇತೃತ್ವದಲ್ಲಿ ಜರುಗಿತು.

ರೋಣ ಪಟ್ಟಣ ಸೇರಿದಂತೆ ತಾಲೂಕಿನ ಸಂದಿಗವಾಡ, ಹಿರೇಮಣ್ಣೂರ, ಸವಡಿ, ಜುಗಳೂರ, ಹಿರೇಹಾಳ, ಕೊತಬಾಳ, ಹುಲ್ಲೂರ, ಮುದೇನಗುಡಿ, ಚಿಕ್ಕಮಣ್ಣೂರ, ಮುಗಳಿ, ತಳ್ಳಿಹಾಳ, ಹೊನ್ನಿಗನೂರ, ಮಾಡಲಗೇರಿ, ನೈನಾಪೂರ, ಬೆಳವಣಕಿ, ಕೌಜಗೇರಿ, ಮಾಳವಾಡ, ಯಾವಗಲ್ಲ, ಹೊನ್ನಾಪೂರ, ಕುರಹಟ್ಟಿ, ಬಳಗೋಡ ಸೇರಿದಂತೆ ತಾಲೂಕಿನಾದ್ಯಂತ ಸಡಗರ, ಸಂಭ್ರಮದಿಂದ ಬನ್ನಿ ಹಬ್ಬ ಆಚರಿಸಲಾಯಿತು.