ಅಡಿಕೆಯೊಂದಿಗೆ ಬೇಡಿಕೆಯುಳ್ಳ ಉಪಬೆಳೆ ಬೆಳೆಯಿರಿ

ಯಲ್ಲಾಪುರ: ರೈತರು ವಾಣಿಜ್ಯ ಬೆಳೆಯಾದ ಅಡಿಕೆಯೊಂದಕ್ಕೆ ಗಮನಹರಿಸದೇ ಸಾಕಷ್ಟು ಬೇಡಿಕೆಯುಳ್ಳ ಕಾಳುಮೆಣಸು, ಏಲಕ್ಕಿ, ದಾಲ್ಚಿನ್ನಿ,ಲವಂಗ, ಜಾಯಿಕಾಯಿ ಬೆಳೆಗಳನ್ನು ಕೂಡಾ ಉಪಬೆಳೆಯಾಗಿ ಆಸಕ್ತಿಯಿಂದ ಬೆಳೆಸಬಹುದಾಗಿದೆ ಎಂದು ಅಪ್ಪಂಗಳದ ಭಾರತೀಯ ಸಾಂಬಾರು ಬೆಳೆಗಳ ಸಂಶೋಧನಾ ಸಂಸ್ಥೆಯ ಹಿರಿಯ ವಿಜ್ಞಾನಿ ಡಾ. ಹೊನ್ನಪ್ಪ ಹೇಳಿದರು.

ವಿವಿಧ ಸಾಂಬಾರು ಬೆಳೆಗಳನ್ನು ಬೆಳೆಯುವ ಅವಕಾಶವಿದ್ದರೂ ರೈತರಲ್ಲಿ ಆಸಕ್ತಿಯ ಕೊರತೆ ಕಂಡುಬರುತ್ತಿದೆ. ಆದ್ದರಿಂದ ರೈತರು ವೈವಿಧ್ಯಮಯ ಬೆಳೆಗಳನ್ನು ತಜ್ಞರ ಮಾರ್ಗದರ್ಶನದೊಂದಿಗೆ ವೈಜ್ಞಾನಿಕ ಆವಿಷ್ಕಾರಗಳ ಬಳಕೆಯೊಂದಿಗೆ ಬೆಳೆಯಲು ಮುಂದಾಗಬೇಕಿದೆ. ನಮ್ಮ ದೇಶವು ೪ ಬಿಲಿಯನ್ ಡಾಲರ್ ಮೊತ್ತದ ಮಸಾಲೆ ಬೆಳೆಗಳ ರಫ್ತಿನೊಂದಿಗೆ ವಿಶ್ವದಲ್ಲಿ ದಾಖಲೆಯ ಸ್ಥಾನ ಗಳಿಸಿದೆ. ಇಂತಹ ಸಂದರ್ಭದಲ್ಲಿ ರೈತರು ಗಮನಹರಿಸಿ ತಮ್ಮ ಬೆಳೆಗಳ ಉತ್ತಮ ಇಳುವರಿಗಾಗಿ ಸೂಕ್ತ ಪೋಷಕಾಂಶ ಬೆಳೆಗಳಿಗೆ ಪೂರೈಸಬೇಕಿದೆ. ಮುಖ್ಯವಾಗಿ ಅಡಿಕೆಗೆ ಆವರಿಸಿದ ಕೊಳೆರೋಗ ಮತ್ತು ಎಲೆಚುಕ್ಕೆ ರೋಗಗಳ ನಿವಾರಣೆಗಾಗಿ ಕೈಗೊಳ್ಳಬಹುದಾದ ಸರಳ ಮಾರ್ಗೋಪಾಯಗಳನ್ನು ವಿವರಿಸಿದರು.

ಶಿರಸಿಯ ಕೃಷಿ ವಿಜ್ಞಾನ ಕೆಂದ್ರದ ಡಾ. ಅರ್ಜುನ ಮಾತನಾಡಿ, ಇತ್ತೀಚಿನ ವರ್ಷಗಳಲ್ಲಿ ಮಲೆನಾಡಿನ ಅಡಿಕೆ ಮರಗಳಿಗೆ ಶಿಲೀಂಧ್ರದಿಂದ ೩ ರೀತಿಯ ಎಲೆಚುಕ್ಕೆ ರೋಗ ಆವರಿಸುತ್ತಿದೆ. ಗುಣಮಟ್ಟದ ಸುಣ್ಣ ಮತ್ತು ಮೈಲು ತುತ್ತಗಳಿಂದ ತಯಾರಿಸುವ ಬೋರ್ಡು ದ್ರಾವಣ ಸೂಕ್ತ ಕ್ರಮದಲ್ಲಿ ಸಿಂಪಡಿಸಬೇಕು. ಅಡಿಕೆಗೆ ಮಾರಕವಾಗಿರುವ ಬೇರುಹುಳು ಮತ್ತು ಕೊಳೆರೋಗದ ಹತೋಟಿಗೆ ಪ್ರತಿ ವರ್ಷವೂ ತಮ್ಮ ಜಮೀನಿನ ಮಣ್ಣು ಪರೀಕ್ಷೆಯನ್ನು ತಜ್ಞರ ಮೂಲಕ ಮಾಡಿಸಬೇಕು ಎಂದರು.