ಚುನಾವಣೆಗೆ ಸ್ಪರ್ಧೆ ಮಾಡಿ 10 ಎಕರೆ ಭೂಮಿ ಮಾರಿಕೊಂಡ ಹಡಪದ

- ಹತ್ತು ಚುನಾವಣೆಗಳಲ್ಲಿ ಸ್ಪರ್ಧೆ ಮಾಡುತ್ತಲೇ ಇದ್ದಾರೆ

- ವ್ಯವಸ್ಥೆಯ ಭ್ರಷ್ಟತೆ ವಿರುದ್ಧ ಸಾಂಕೇತಿಕ ಹೋರಾಟ ಸೋಮರಡ್ಡಿ ಅಳವಂಡಿ

ವಿಧಾನಸಭೆ ಮತ್ತು ಲೋಕಸಭಾ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಿಯೇ ಬರೋಬ್ಬರಿ 10 ಎಕರೆ ಭೂಮಿ ಕಳೆದುಕೊಂಡು ಈಗ ಜೋಪಡಿಯಲ್ಲಿದ್ದಾರೆ. ಹಾಗೊಂದು ವೇಳೆ ಇವರು, ತಮಗೆ ಇದ್ದ ಭೂಮಿ ಕಾಪಾಡಿಕೊಂಡು ಬಂದಿದ್ದರೇ ಈಗ ಕೋಟ್ಯಧೀಶ ಆಗಿರುತ್ತಿದ್ದರು.

1999ರಲ್ಲಿ ಪ್ರಥಮ ಬಾರಿ ವಿಧಾನಸಭಾ ಚುನಾವಣೆಯಲ್ಲಿ ಕೊಪ್ಪಳ ಕ್ಷೇತ್ರದಿಂದ ಸ್ಪರ್ಧೆ ಮಾಡುತ್ತಾರೆ. ಆಗ ಅಖಾಡಕ್ಕೆ ಇಳಿದ ಸಂಗಣ್ಣ ಕರಡಿ ಅವರಿಗೆ ಆತ್ಮೀಯರಾಗಿರುತ್ತಾರೆ. ಅವರ ಕೋರಿಕೆಯ ಮೇರೆಗೆ ನಾಮಪತ್ರ ಹಿಂದೆ ಪಡೆಯತ್ತಾರೆ. ಆದರೆ, ಸಂಗಣ್ಣ ಕರಡಿ ಅವರು ಕೊಟ್ಟ ಮಾತಿನಂತೆ ಇವರನ್ನು ಯಾವುದಕ್ಕೂ ನಾಮನಿರ್ದೇಶನ ಮಾಡುವುದಿಲ್ಲ.

ಐದು ಬಾರಿ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಿದ್ದಾರೆ. ಲೆಕ್ಕಪತ್ರ ನೀಡದ್ದಕ್ಕೆ ಸ್ಪರ್ಧೆ ಮಾಡಲು ಅವಕಾಶ ಸಿಗದಂತೆ ಆಗಿದ್ದರಿಂದ ಎರಡು ಬಾರಿ ತಮ್ಮ ಪತ್ನಿಯನ್ನು ಅಖಾಡಕ್ಕೆ ಇಳಿಸಿದ್ದಾರೆ. ಆಗಲೂ ಗೆಲ್ಲಲು ಆಗಿಲ್ಲ.

ಹತ್ತು ಎಕರೆ ಭೂಮಿ ಮಾರಾಟ:

ನಗರಕ್ಕೆ ಹೊಂದಿಕೊಂಡು ಇರುವ ಈ ಭೂಮಿಯ ಬೆಲೆ ಈಗ ಎಕರೆಗೆ ಒಂದೂವರೆ ಕೋಟಿ ಇದೆ. ಭೂಮಿ ಉಳಿಸಿಕೊಂಡಿದ್ದರೇ ಇವರು ಹತ್ತಾರು ಕೋಟಿಯ ಒಡೆಯರಾಗುತ್ತಿದ್ದರು.

ಇವರ ತಂದೆಯವರು ಗವಿಸಿದ್ದೇಶ್ವರ ಮಹಾಸ್ವಾಮಿಗಳಿಗೆ ಕ್ಷೌರಿಕ ಸೇವೆ ಮಾಡುತ್ತಿದ್ದರಂತೆ. ಇದಕ್ಕಾಗಿ ಇವರಿಗೆ ಶ್ರೀ ಶಿವಶಾಂತವೀರ ಮಹಾಸ್ವಾಮಿಗಳು ಹತ್ತು ಎಕರೆ ಭೂಮಿ ನೀಡಿದ್ದರಂತೆ. ಇದೇ ಭೂಮಿ ಇವರ ಉಪಜೀವನಕ್ಕೆ ಇದ್ದಿದ್ದು. ಈ ಭೂಮಿಯನ್ನು ಮಾರಾಟ ಮಾಡಿ, ಚುನಾವಣೆಯಲ್ಲಿ ಸ್ಪರ್ಧೆ ಮಾಡಿ, ಬಂದಿದ್ದ ಹಣ ಖರ್ಚು ಮಾಡಿದ್ದಾರೆ. ಈಗ ಜೋಪಡಿಯೊಂದರಲ್ಲಿ ಜೀವನ ನಡೆಸುತ್ತಿದ್ದಾರೆ.