ಹಂಪಿ ಉತ್ಸವ: ಶಿಲ್ಪ ಅರಳಿಸುತ್ತಿರುವ ಶಿಲ್ಪಿಗಳು

ಕೃಷ್ಣ ಎನ್. ಲಮಾಣಿ

ಹಂಪಿ ಉತ್ಸವ ಫೆಬ್ರವರಿ 2, 3, 4ರಂದು ನಡೆಯಲಿದೆ. ಹಂಪಿ ಉತ್ಸವಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಫೆ. 2ರಂದು ವಿಧ್ಯುಕ್ತವಾಗಿ ಚಾಲನೆ ನೀಡಲಿದ್ದಾರೆ. ಹಂಪಿ ಉತ್ಸವಕ್ಕಾಗಿ ನಾಲ್ಕು ವೇದಿಕೆಗಳನ್ನು ನಿರ್ಮಿಸಲಾಗುತ್ತಿದೆ. ಇನ್ನೂ ಹಂಪಿಯ ಗಜಶಾಲೆ ಆವರಣದಲ್ಲಿ ಧ್ವನಿ ಮತ್ತು ಬೆಳಕು ಕಾರ್ಯಕ್ರಮ ಕೂಡ ನಡೆಯಲಿದೆ. ಈ ಮಧ್ಯೆ ನಾಡಿನ ಕಲಾ ಪ್ರಪಂಚವನ್ನು ಜಗತ್ತಿಗೆ ಉಣಬಡಿಸಲು ಶಿಲ್ಪಕಲಾ ಶಿಬಿರ ಆಯೋಜನೆ ಮಾಡಲಾಗಿದೆ. ಇನ್ನೂ ವಿಜಯನಗರ ವಾಸ್ತುಶಿಲ್ಪ ಶೈಲಿ, ಚಾಲುಕ್ಯ ಶೈಲಿ ಮತ್ತು ಹೊಯ್ಸಳ ಶೈಲಿಗಳಲ್ಲಿ ಶಿಲ್ಪಿಗಳು ಶಿಲ್ಪಗಳನ್ನು ಅರಳಿಸುತ್ತಿದ್ದಾರೆ. ಹಾಗಾಗಿ ಹಂಪಿಯಲ್ಲಿ ವಿಜಯನಗರದ ಗತವೈಭವ ಮರುಕಳಿಸುವ ಕಾರ್ಯ ನಡೆದಿದೆ. ಜನವರಿ 31ರ ವರೆಗೆ ಶಿಲ್ಪಿಗಳು ಶಿಲ್ಪಗಳನ್ನು ಕೆತ್ತನೆ ಮಾಡಲಿದ್ದಾರೆ.

ವಿವಿಧ ಶೈಲಿಯ ಶಿಲ್ಪ: ಹೊಸಪೇಟೆಯ ಮಲಪನಗುಡಿಯ ಕೊಟ್ರೇಶ್‌ ಆಚಾರ್‌ ವಿಜಯನಗರ ವಾಸ್ತು ಶಿಲ್ಪಶೈಲಿಯಲ್ಲಿ ಉಗ್ರ ನರಸಿಂಹನ ವಿಗ್ರಹ ಕೆತ್ತನೆ ಮಾಡುತ್ತಿದ್ದಾರೆ. ಹೊಸಪೇಟೆಯ ಅನಂತಶಯನಗುಡಿ ಗ್ರಾಮದ ವಿನೋದ್‌ ಚಾಲುಕ್ಯ ಶೈಲಿಯಲ್ಲಿ ಗಂಧರ್ವ ವಿಗ್ರಹ ಕೆತ್ತನೆ ಮಾಡುತ್ತಿದ್ದಾರೆ. ಕೊಟ್ಟೂರಿನ ಉಜ್ಜಯಿನಿಯ ಅವಿನಾಶ್‌ ಚಾಲುಕ್ಯ ಶೈಲಿಯಲ್ಲಿ ದೇವಿ ವಿಗ್ರಹ ಅರಳಿಸುತ್ತಿದ್ದಾರೆ. ಹೂವಿನಹಡಗಲಿಯ ದೊಡ್ಡ ಬಸವರಾಜ ಹೊಯ್ಸಳ ಶೈಲಿಯಲ್ಲಿ ನೃತ್ಯಗಾರ್ತಿ ಶಿಲ್ಪ ಅರಳಿಸುತ್ತಿದ್ದಾರೆ.

ಹಗರಿಬೊಮ್ಮನಹಳ್ಳಿಯ ಪಂಪಾಪತಿ ಗೌತಮಬುದ್ಧನ ವಿಗ್ರಹ ಕೆತ್ತನೆ ಮಾಡುತ್ತಿದ್ದಾರೆ. ಹೊಸಪೇಟೆಯ ಮರಿಯಮ್ಮನಹಳ್ಳಿ ತಾಂಡಾದ ಕೃಷ್ಣ ನಾಯ್ಕ ಹೊಯ್ಸಳ ಶೈಲಿಯಲ್ಲಿ ಸೂರ್ಯದೇವ ವಿಗ್ರಹ ಅರಳಿಸುತ್ತಿದ್ದಾರೆ. ಗದಗ ಜಿಲ್ಲೆಯ ಗಜೇಂದ್ರಗಡದ ಮುತ್ತುರಾಜ ಚಾಲುಕ್ಯ ಶೈಲಿಯಲ್ಲಿ ಅವಲೋಕೇಶ್ವರನ ವಿಗ್ರಹ ಕೆತ್ತನೆ ಮಾಡುತ್ತಿದ್ದಾರೆ.ವಿವಿಧ ಶೈಲಿ: ಹಂಪಿ ಉತ್ಸವದಲ್ಲಿ ಶಿಲ್ಪಕಲೆಗೆ ಆದ್ಯತೆ ನೀಡಲಾಗಿದೆ. ಇದರ ದ್ಯೋತಕವಾಗಿ ಶಿಲ್ಪಕಲಾ ಶಿಬಿರವನ್ನು ಆಯೋಜನೆ ಮಾಡಲಾಗಿದ್ದು, ಹತ್ತು ಜನ ಶಿಲ್ಪಿಗಳು ವಿವಿಧ ಶೈಲಿಯಲ್ಲಿ ಕೃಷ್ಣ ಶಿಲೆಯಲ್ಲಿ ಶಿಲ್ಪಗಳನ್ನು ಕೆತ್ತನೆ ಮಾಡುತ್ತಿದ್ದೇವೆ. ಉತ್ಸವದಲ್ಲಿ ಪ್ರದರ್ಶನಕ್ಕೂ ಆಯೋಜನೆ ಮಾಡಲಾಗುತ್ತಿದೆ ಎಂದು ಶಿಲ್ಪಿ ಕೊಟ್ರೇಶ್‌ ಆಚಾರ್‌ ತಿಳಿಸಿದರು.