ಇತಿಹಾಸ ಜನಸಾಮಾನ್ಯರ ದಿನನಿತ್ಯದ ಬದುಕಿನ ನೈಜ ದಾಖಲೆ

ಸಂಡೂರು: ಇತಿಹಾಸವೆಂದರೆ ಕೇವಲ ರಾಜರ ಆಳ್ವಿಕೆ ಮತ್ತು ಯದ್ಧಗಳ ಕಥೆಯಲ್ಲ. ಅದು ಅಂದಿನ ಜನಸಾಮಾನ್ಯರ ದಿನ ನಿತ್ಯದ ಬದುಕು ಹಾಗೂ ಬವಣೆಗಳ ನೈಜ ದಾಖಲೆಯೂ ಹೌದು. ಇತಿಹಾಸದ ಇಂತಹ ಆಳವಾದ ಒಳನೋಟ ಯುವ ಸಂಶೋಧಕರು ಮತ್ತು ವಿದ್ಯಾರ್ಥಿಗಳು ಸರಿಯಾಗಿ ಗ್ರಹಿಸಿ ದಾಖಲಿಸಬೇಕು ಎಂದು ಹೊಸಪೇಟೆಯ ವಿಜಯನಗರ ಮಹಾವಿದ್ಯಾಲಯದ ಇತಿಹಾಸ ವಿಭಾಗದ ವಿಶ್ರಾಂತ ಪ್ರಾಧ್ಯಾಪಕ ಡಾ. ಎಚ್.ಎಂ. ಚಂದ್ರಶೇಖರ ಶಾಸ್ತ್ರಿ ಅಭಿಪ್ರಾಯಪಟ್ಟರು.

ವಿಜಯನಗರ ಸಾಮ್ರಾಜ್ಯದ ಕಾಲಘಟ್ಟದಲ್ಲಿ ನಗರಗಳ ಬೆಳವಣಿಗೆ, ಯೋಜನಾಶೈಲಿ, ವ್ಯಾಪಾರ ವಾಣಿಜ್ಯ ಹಾಗೂ ವಾಸ್ತುಶಿಲ್ಪಗಳು ಅತ್ಯುನ್ನತ ಮಟ್ಟದಲ್ಲಿದ್ದವು. ಅಂದಿನ ನಗರ ನಿರ್ಮಾಣ ಕೌಶಲ್ಯ ಹಾಗೂ ವೈಭವ ಸಮಕಾಲೀನ ವಿದೇಶಿ ಪ್ರವಾಸಿಗರು ಮುಕ್ತಕಂಠದಿಂದ ಕೊಂಡಾಡಿದ್ದಾರೆ ಎಂದು ತಿಳಿಸಿದರು.

ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಕನ್ನಡ ಸಾಹಿತ್ಯ ಅಧ್ಯಯನ ವಿಭಾಗದ ಹಿರಿಯ ಸಹಾಯಕ ಪ್ರಾಧ್ಯಾಪಕ ಡಾ. ಗೋವಿಂದ ಮಾತನಾಡಿ,ವಿಜಯನಗರ ಕಾಲದ ಸಾಹಿತ್ಯ ಮತ್ತು ಶಾಸನಗಳು ಅಂದಿನ ಶ್ರೀಮಂತ ಸಂಸ್ಕೃತಿ, ಸಮೃದ್ಧ ಜನಜೀವನ ಹಾಗೂ ನಗರ ಬದುಕಿನ ವೈಭವ ಕಣ್ಣಿಗೆ ಕಟ್ಟುವಂತೆ ಬಿಂಬಿಸುತ್ತವೆ. ಇಂತಹ ಚಾರಿತ್ರಿಕ ಮೌಲ್ಯ ಇಂದಿನ ಯುವ ಪೀಳಿಗೆಗೆ ಸದಾ ಸ್ಫೂರ್ತಿಯಾಗಬೇಕು ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಇತಿಹಾಸ ಮತ್ತು ಪುರಾತತ್ವ ಅಧ್ಯಯನ ವಿಭಾಗದ ಉಪನ್ಯಾಸಕ ಡಾ. ನರಸಿಂಹಮೂರ್ತಿ ಟಿ.ಎಸ್, ಡಾ.ವಿರುಪಾಕ್ಷಪ್ಪ ಎಂ ಹಾಗೂ ಕನ್ನಡ ವಿಭಾಗದ ಅಧ್ಯಾಪಕ ಡಾ ಮಲ್ಲಯ್ಯ ಸಂಡೂರು, ಡಾ. ಗುಡ್ಡಪ್ಪ, ಡಾ.ರೇಣುಕಾ ಪೂಜಾರಿ, ಕ್ರೀಡಾ ಸಹಾಯಕ ನಿರ್ದೇಶಕ ಶಿವರಾಮಪ್ಪ ರಾಗಿ ಸೇರಿದಂತೆ ಇತಿಹಾಸ ಹಾಗೂ ಕನ್ನಡ ವಿಭಾಗದ ಪ್ರಾಧ್ಯಾಪಕರು, ಸಂಶೋಧನಾರ್ಥಿಗಳು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು. ಜ್ಯೋತಿ ಪ್ರಾರ್ಥಿಸಿದರು. ಕರಿಬಸವರಾಜ ಸ್ವಾಗತಿಸಿದರು. ರವಿಚಂದ್ರ ನಿರೂಪಿಸಿದರೆ, ಡಿ.ಎಸ್. ಮಂಜುನಾಥ್ ವಂದಿಸಿದರು.