ಹಂಪಿಯಲ್ಲಿ ದೇಶ, ವಿದೇಶಿಗರ ಹೋಳಿ ಸಂಭ್ರಮ!

ಸಾಣಾಪುರ ಕಹಿ ಘಟನೆ ಮರೆಸಿದ ರಂಗಿನಾಟ/ ವಿಶ್ವಕ್ಕೆ ಏಕತೆ ಸಂದೇಶ ರವಾನೆ

ಕನ್ನಡಪ್ರಭ ವಾರ್ತೆ ಹೊಸಪೇಟೆ

ಕೊಪ್ಪಳದ ಸಾಣಾಪುರ ಘಟನೆ ಬಳಿಕ ಹಂಪಿಯಲ್ಲಿ ಈ ಬಾರಿ ಹೋಳಿ ಸಂಭ್ರಮ ನಡೆಯುತ್ತದೆಯೋ ಇಲ್ಲವೋ ಎಂಬ ಆತಂಕ ಸ್ಥಳೀಯರಲ್ಲೂ ಮನೆ ಮಾಡಿತ್ತು. ಈ ಕಹಿ ಘಟನೆ ಮರೆಸುವ ರೀತಿಯಲ್ಲಿ ಸ್ವಯಂಪ್ರೇರಿತರಾಗಿ ಹೋಳಿ ಹಬ್ಬದ ರಂಗಿನಾಟವನ್ನಾಡಲು ದೇಶ, ವಿದೇಶಿ ಪ್ರವಾಸಿಗರು ರಥಬೀದಿಯಲ್ಲಿ ಜಮಾಯಿಸಿದರು. ಈ ಮೂಲಕ ಸ್ಥಳೀಯರಲ್ಲೂ ಹುರುಪು ತಂದರು.ಕಾಮದಹನ:

ಹಂಪಿಯ ಜನತಾ ಪ್ಲಾಟ್‌ನಿಂದ ರಥಬೀದಿಗೆ ತಮಟೆ ನಾದಕ್ಕೆ ಹೆಜ್ಜೆ ಹಾಕುತ್ತಲೇ ಬಂದ ದೇಶ, ವಿದೇಶಿ ಪ್ರವಾಸಿಗರು, ಹ್ಯಾಪಿ ಹೋಳಿ ಎನ್ನುತ್ತಾ ಕುಣಿದು ಕುಪ್ಪಳಿಸಿದರು. ವಿದೇಶಿಗರು ಪರಸ್ಪರ ಬಣ್ಣ ಎರಚಿಕೊಂಡು ಸಂಭ್ರಮಿಸಿದರು. ಬಳಿಕ ದೇಶಿ ಹಾಗೂ ಸ್ಥಳೀಯರು ಕೂಡ ಅವರ ಜೊತೆಗೂಡಿ ಹೋಳಿ ಹಬ್ಬ ರಂಗೇರಿಸಿದರು.

ಹೆಗಲುಗಳ ಮೇಲೆ ಮಕ್ಕಳನ್ನು ಎತ್ತಿಕೊಂಡು ತಮಟೆ ನಾದಕ್ಕೆ ಹೆಜ್ಜೆ ಹಾಕಿದ ದೇಶ, ವಿದೇಶಿ ಪ್ರವಾಸಿಗರು ಈ ಹಬ್ಬ ಎಲ್ಲರನ್ನೂ ಒಂದುಗೂಡಿಸುವ ಹಬ್ಬ ಆಗಿದೆ ಎಂಬ ಸಂದೇಶವನ್ನು ಕುಣಿತದ ಮುಖೇನ ನೀಡಿದರು.ಹೋಳಿ ಸಂಭ್ರಮ:

ಹಂಪಿಯಲ್ಲಿ ಹೋಳಿ ಆಚರಣೆಗೆ ಮುಕ್ತ ಅವಕಾಶ ನೀಡಿರುವುದು ಪ್ರವಾಸೋದ್ಯಮ ಬೆಳವಣಿಗೆಗೂ ಸಹಕಾರಿ ಆಗಲಿದೆ. ನಮ್ಮಂಥವರು ಸ್ಥಳೀಯರ ಜೊತೆಗೂಡಿ ಹಬ್ಬ ಆಚರಣೆ ಮಾಡುವುದೇ ಸಂಭ್ರಮ ಎಂದು ಹೇಳುತ್ತಾರೆ ಬೆಲ್ಜಿಯಂ ಪ್ರವಾಸಿ ರೋಸಿ.