ಹುಬ್ಬಳ್ಳಿ ಹೂವಿನ ಮಾರುಕಟ್ಟೆಗೆ ಹೊಸ ಮಳಿಗೆ, ಶೆಡ್‌ಗಳಿಂದ ಮುಕ್ತಿ

ಶಿವಾನಂದ ಅಂಗಡಿ

ಸೋಮವಾರ ಶಾಸಕ ಪ್ರಸಾದ ಅಬ್ಬಯ್ಯ ಅವರು ಹೊಸ ಮಳಿಗೆಗಳನ್ನು ವ್ಯಾಪಾರಸ್ಥರ ಇಚ್ಛಿಯಂತೆ ಉದ್ಘಾಟಿಸಿದ್ದಾರೆ. ಎರಡ್ಮೂರು ದಿನಗಳಲ್ಲೇ ಮಳಿಗೆಗಳಿಗೆ ಹೂವಿನ ವ್ಯಾಪಾರ ಸ್ಥಳಾಂತರವಾಗಲಿದೆ.

ಮಳಿಗೆ ಸಿಗದ ವ್ಯಾಪಾರಸ್ಥರಿಗೆ ಸದ್ಯ ಶೆಡ್‌ಗಳಲ್ಲೇ ವ್ಯಾಪಾರ ಮಾಡಲು ಹೇಳಿದ್ದೇವೆ. ಆದರೆ, ಎರಡೆರಡು ಕಡೆ ಹೂವು ಮಾರಾಟಕ್ಕೆ ಸಮಸ್ಯೆಯಾದರೆ, ಹೊಸ ಮಳಿಗೆಗಳ ಜಾಗದಲ್ಲೇ ಮಳಿಗೆ ಸಿಗದ ವ್ಯಾಪಾರಸ್ಥರಿಗೆ ಅಗತ್ಯವಾದ ಸಹಾಯ ಮಾಡುತ್ತೇವೆ ಎಂದು ಹೇಳುತ್ತಾರೆ ಹೂವಿನ ವ್ಯಾಪಾರಸ್ಥರ ಸಂಘದ ಮುಖಂಡರು.ಮಾರುಕಟ್ಟೆಯಲ್ಲಿ ನಿತ್ಯ ಮಲ್ಲಿಗೆ ಪರಿಮಳ

ಗದಗ ತಾಲೂಕಿನ ಕದಾಂಪುರ, ಕಣವಿಹೊಸೂರು, ಲಕ್ಕುಂಡಿ, ಸಂಭಾಪುರ, ಪಾಪನಾಶಿ, ಹುಬ್ಬಳ್ಳಿ ಹಾಗೂ ಧಾರವಾಡ ತಾಲೂಕಿನಿಂದಲೂ ಹುಬ್ಬಳ್ಳಿಗೆ ನಿತ್ಯ ಸೇವಂತಿಗೆ, ಚೆಂಡುಹೂವು, ಗುಲಾಬಿ ಹೂವು, ಬಟನ್‌ ಗುಲಾಬಿ ಹೀಗೆ ತರಹೇವಾರಿ ಹೂವು ಆಗಮಿಸುತ್ತಿದ್ದು, ಸ್ಥಳೀಯವಾಗಿ ಹಾಗೂ ಬೇರೆ ಬೇರೆ ಕಡೆ ಸಂತೆ ಮಾರುಕಟ್ಟೆಯ ಮಾರಾಟಗಾರರು ಇಲ್ಲಿಂದಲೇ ಹೂವು ಖರೀದಿಸುತ್ತಾರೆ. ಇಲ್ಲಿಗೆ ಹೂವು ಬರುವ ಆಯಾ ಪ್ರದೇಶದಲ್ಲಿ ಸ್ಥಳೀಯವಾಗಿ ಹೂವಿನ ಮಾರುಕಟ್ಟೆಗಳು ಇವೆಯಾದರೂ ಹೆಚ್ಚಿನ ಪ್ರಮಾಣದಲ್ಲಿ ವಹಿವಾಟು ನಡೆಯದ ಕಾರಣ ಬೆಳೆಗಾರರು ಹುಬ್ಬಳ್ಳಿ ಮಾರುಕಟ್ಟೆಯನ್ನು ಆಶ್ರಯಿಸಿದ್ದಾರೆ.

ಹೂವಿನ ಮಾರುಕಟ್ಟೆ ವ್ಯಾಪಾರಸ್ಥರಿಗೆ ಲೀಸ್‌ ಮೇಲೆ ಜಾಗ ನೀಡಲಾಗಿದೆ. ವ್ಯಾಪಾರಸ್ಥರೇ ಮಳಿಗೆ ನಿರ್ಮಿಸಿಕೊಂಡಿದ್ದಾರೆ. 12 ಮಳಿಗೆ ಇವೆ. 20 ವ್ಯಾಪಾರಸ್ಥರು ಇದ್ದು, ಇನ್ನು 8 ಮಳಿಗೆ ರೆಡಿಯಾಗಬೇಕು ಎಂದು ಎಪಿಎಂಸಿ ಅಧಿಕಾರಿಗಳು ತಿಳಿಸಿದ್ದಾರೆ. ದಶಕಗಳಿಂದ ಶೆಡ್‌ಗಳನ್ನು ಹಾಕಿಕೊಂಡು ಹೂವಿನ ವ್ಯಾಪಾರ ಮಾಡಿದ್ದೇವೆ. ಹೂವು ತರುವ ವಾಹನಗಳಿಗೆ ಸರಿಯಾದ ಪಾರ್ಕಿಂಗ್‌ ವ್ಯವಸ್ಥೆ ಇರಲಿಲ್ಲ. ಮಳೆ ಬಂದರೆ ತಗ್ಗುಪ್ರದೇಶವಿರುವುದರಿಂದ ಎಲ್ಲೆಂದರಲ್ಲಿ ನೀರು ನಿಲ್ಲುತ್ತಿತ್ತು. ರೈತರಿಗೆ ಕುಳಿತಕೊಳ್ಳಲು ಸರಿಯಾದ ಜಾಗ ಇರಲಿಲ್ಲ. ಈಗ ಇಂಥ ಸಮಸ್ಯೆಗಳಿಗೆ ಮುಕ್ತಿ ದೊರೆತಿದೆ ಎಂದು ಹುಬ್ಬಳ್ಳಿ ಹೂವಿನ ವ್ಯಾಪಾರಸ್ಥರ ಸಂಘದ ಕಾರ್ಯದರ್ಶಿ ಯೂಸುಫ ಶಿರಹಟ್ಟಿ ಹೇಳಿದರು.