ಶೀಘ್ರದಲ್ಲೇ ಹುಡಾ ವ್ಯಾಪ್ತಿ ವಿಸ್ತರಣೆ

ಶಿವಾನಂದ ಗೊಂಬಿ

ಹಿಂದೆ ಅಂದರೆ ಪ್ರಾಧಿಕಾರ ರಚನೆಯಾದಾಗ 1988ರಲ್ಲೇ ಎಷ್ಟು ಅದರ ವ್ಯಾಪ್ತಿಯೆಂಬುದು ನಿರ್ಧಾರವಾಗಿತ್ತು. ಅದಾದ ಬಳಿಕ ಅದನ್ನು ವಿಸ್ತರಿಸಿರಲಿಲ್ಲ. ವಿಸ್ತರಿಸುವ ಪ್ರಯತ್ನ ನಡೆದಿತ್ತು ಆದರೆ, ಅದು ಪೂರ್ಣವಾಗಿ ಫಲಕಂಡಿರಲಿಲ್ಲ. ಅರ್ಧಕ್ಕಷ್ಟೇ ಸ್ಥಗಿತವಾಗಿತ್ತು. ಆದರೆ, ಹುಬ್ಬಳ್ಳಿ- ಧಾರವಾಡ ನಗರವೂ ನಾಗಾಲೋಟದಲ್ಲಿ ಬೆಳೆಯುತ್ತಿರುವ ಮಹಾನಗರ.

ಎಷ್ಟು ವ್ಯಾಪ್ತಿ?: ನಗರಾಭಿವೃದ್ಧಿ ಪ್ರಾಧಿಕಾರದ ವ್ಯಾಪ್ತಿಗೆ ಮುಂಚೆ 46 ಹಳ್ಳಿಗಳು ಬರುತ್ತಿದ್ದವು. ಹುಡಾದ ವ್ಯಾಪ್ತಿ 402.08 ಚದುರ ಕಿಮೀ ಇತ್ತು. ಇದೀಗ ಹೊಸ ಎಲ್‌ಪಿಎ ಪ್ರಕಾರ ಮತ್ತೆ 46 ಹಳ್ಳಿಗಳು ಸೇರ್ಪಡೆಯಾಗಲಿವೆ. ಹುಬ್ಬಳ್ಳಿ ತಾಲೂಕಿನ 13 ಹಳ್ಳಿಗಳು, ಕಲಘಟಗಿ ತಾಲೂಕಿನ 6, ಧಾರವಾಡ ತಾಲೂಕಿನ 27 ಹಳ್ಳಿಗಳು ಸೇರಿದಂತೆ 46 ಹಳ್ಳಿಗಳು ಸೇರ್ಪಡೆಯಾಗಲಿವೆ. ಇದರಿಂದಾಗಿ ಹುಡಾ ವ್ಯಾಪ್ತಿಗೆ 92 ಹಳ್ಳಿಗಳು ಬಂದಂತಾಗುತ್ತದೆ. ಇದರ ವ್ಯಾಪ್ತಿಯೂ 402.08 ಚದುರ ಕಿಮೀನಿಂದ 757.54 ಚದುರ ಕಿಮೀ ಆದಂತಾಗುತ್ತದೆ. ದುಪ್ಪಟ್ಟು ಏರಿಯಾವನ್ನು ಹುಡಾ ಹೊಂದಿದಂತಾಗುತ್ತದೆ.

ಹೊಸದಾಗಿ ಸೇರ್ಪಡೆಯಾಗಲಿರುವ ಹಳ್ಳಿಗಳಿವು: ಹುಬ್ಬಳ್ಳಿ ತಾಲೂಕಿನ ರೇವಡಿಹಾಳ, ದೇವರಗುಡಿಹಾಳ, ಪರಸಾಪುರ, ಬುದ್ನಾಳ, ಮಾವನೂರ, ಬುಡರಸಿಂಗಿ, ಸಿದ್ಧಾಪುರ, ಮುರಾರಹಳ್ಳಿ, ಅದರಗುಂಚಿ, ಹಳ್ಯಾಳ, ಶಹರ ವೀರಾಪುರ, ಕುಸುಗಲ್‌, ಸುಳ್ಳ. ಕಲಘಟಗಿ ತಾಲೂಕಿನ ದೇವಲಿಂಗಿಕೊಪ್ಪ, ದಾಸನೂರ, ದುಮ್ಮವಾಡ, ಕುರುವಿನಕೊಪ್ಪ, ಕಾಡನಕೊಪ್ಪ, ಚಳಮಟ್ಟಿ, ಧಾರವಾಡ ತಾಲೂಕಿನ ಕೋಟೂರ, ಅಗಸನಹಳ್ಳಿ, ಶಿಂಗನಹಳ್ಳಿ, ಹೆಗ್ಗೇರಿ, ವರವನಾಗಲಾವಿ, ಚಿಕ್ಕಮಲ್ಲಿಗವಾಡ, ದಡ್ಡಿಕಮಲಾಪುರ, ಮಂಡಿಹಾಳ, ಮುಗದ, ಕ್ಯಾರಕೊಪ್ಪ, ಜಂಜಲ (ಜುಂಜಲಕಟ್ಟಿ), ಬಾಡ, ಬೆನಕನಕಟ್ಟಿ, ನಾಯಕನಹುಲಿಕಟ್ಟಿ, ಶಿವಳ್ಳಿ, ಮಾರಡಗಿ, ನವಲೂರ ತಡೆಬಿಳ, ಅಲ್ಲಾಪುರ, ಗೊಂಗಡಿಕೊಪ್ಪ, ಗೋವನಕೊಪ್ಪ, ದಂಡಿಕೊಪ್ಪ, ಕಮಲಾಪುರ, ದಾಸನಕೊಪ್ಪ, ದೇವಗಿರಿ ಎಂ. ನರೇಂದ್ರ, ಗೋವನಕೊಪ್ಪ ಎಂ. ನರೇಂದ್ರ, ನೀರಲಕಟ್ಟಿ ಹೀಗೆ 42 ಹಳ್ಳಿಗಳು ಹೊಸದಾಗಿ ಸೇರ್ಪಡೆಯಾಗಲಿವೆ.

ನಗರದ ಹೊರವಲಯಗಳಲ್ಲಿ ಹೊಸದಾಗಿ ಸಾಕಷ್ಟು ಲೇಔಟ್‌ಗಳು ಆಗಿವೆ. ಆದರೆ, ಅವು ಹುಡಾ ವ್ಯಾಪ್ತಿಗೆ ಬರಲ್ಲ. ನಗರದ ಪಕ್ಕದಲ್ಲೇ ಇದ್ದರೂ ಸೇರ್ಪಡೆಯಾಗುತ್ತಿರಲಿಲ್ಲ. ಹುಡಾ ವ್ಯಾಪ್ತಿಗೆ ಅಕ್ಕಪಕ್ಕದ ಹಳ್ಳಿಗಳನ್ನು ಸೇರ್ಪಡೆ ಮಾಡುವುದರಿಂದ ಮಾಸ್ಟರ್‌ ಪ್ಲ್ಯಾನ್‌ ರಿವೈಸ್‌ ಮಾಡಲು, ವ್ಯವಸ್ಥಿತವಾಗಿ ನಗರವನ್ನು ಬೆಳೆಸಲು ಅನುಕೂಲವಾಗಲಿದೆ ಎಂದು ಹುಡಾ ಅಧ್ಯಕ್ಷ ಶಾಕೀರ ಸನದಿ ಹೇಳಿದರು.