ನೂರಾರು ವರ್ಷಗಳ ಹಿಂದಿನ ಎತ್ತಿನ ಬಂಡಿಯಲ್ಲಿ ಸಮ್ಮೇಳನಕ್ಕೆ ರೈತ..!

ಸೀತಾರಾಮು ಕರಡಹಳ್ಳಿ

ತಾಲೂಕಿನ ಮರಡೀಪುರ ಗ್ರಾಮದ ಪ್ರಗತಿಪರ ರೈತ ಸಂತೋಷ್ ತಮ್ಮ ಕುಟುಂಬಸ್ಥರೊಂದಿಗೆ ಅಲಂಕರಿಸಿದ ನೂರಾರು ವರ್ಷಗಳ ಹಿಂದಿನ ಎತ್ತಿನ ಬಂಡಿಗಾಡಿಯಲ್ಲಿ ಮಂಡ್ಯದಲ್ಲಿ ಮೂರು ದಿನಗಳ ಕಾಲ ನಡೆಯುವ 87ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ತೆರಳುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.

ಹಳೇ ಕಾಲದ ಎತ್ತಿನ ಬಂಡಿಗಾಡಿಯನ್ನು ಬಹಳ ಜೋಪಾನವಾಗಿಟ್ಟುಕೊಂಡಿರುವ ಪ್ರಗತಿಪರ ರೈತ ಸಂತೋಷ್, ನವೀಕರಿಸಿದ ಬಂಡಿಗಾಡಿಗೆ ವಡಕೆಯಲ್ಲಿ ಮೇಲ್ಚಾವಣಿ ನಿರ್ಮಿಸಿ, ಚಾವಟಿಕೋಲು, ಸೀಮೆಎಣ್ಣೆ ಲ್ಯಾಟಿಲ್, ರೇಡಿಯೋ, ಕಬ್ಬಿಣದ ಪೆಟ್ಟಿಗೆ, ಗಾಲಿಗೆ ಹಾಕುವ ಆಯಿಲ್, ಕಂಬಳಿ, ಎತ್ತುಗಳಿಗೆ ಆಹಾರ, ಜೊತೆಯಲ್ಲಿ ತೆಗೆದುಕೊಂಡು ಹೋಗುವ ಸಾಮಗ್ರಿ ಇಡಲು ಹಟ್ಟಣೆ ಸೇರಿದಂತೆ ಪೂರ್ವಿಕರು ಬಂಡಿಗಾಡಿಗೆ ಏನೆಲ್ಲಾ ಬಳಸುತ್ತಿದ್ದರೋ ಅದೆಲ್ಲದರ ಜೊತೆಗೆ ತಮ್ಮ ಕುಟುಂಬಸ್ಥರೊಂದಿಗೆ ನುಡಿ ಹಬ್ಬಕ್ಕೆ ಒಂದು ದಿನ ಮುಂಚೆಯೇ ಗ್ರಾಮದಿಂದ ಹೊರಟರು.

ಅಲಂಕರಿಸಿದ ಬಂಡಿಗಾಡಿಗೆ ಸಂತೋಷ್ ಅವರ ತಂದೆ ಕುಚೇಲೇಗೌಡ ಪೂಜೆ ಸಲ್ಲಿಸಿ ಮಗ ಸಂತೋಷ್ ಸೊಸೆ ಪವಿತ್ರ ಮತ್ತು ಮೊಮ್ಮಗಳನ್ನು ಆಶೀರ್ವದಿಸಿ ಸಮ್ಮೇಳನ ಯಶಸ್ವಿಯಾಗಲೆಂದು ಹಾರೈಸಿ ಕಳುಹಿಸಿಕೊಟ್ಟರು.

ಈ ನುಡಿ ಹಬ್ಬಕ್ಕೆ ನಾವು ಕುಟುಂಬ ಸಮೇತ ತೆರಳುತ್ತಿದ್ದೇವೆ. ಅದೇ ರೀತಿ ನಾಡಿನ ಪ್ರತಿಯೊಬ್ಬ ಕನ್ನಡಾಭಿಮಾನಿಗಳು ಸಮ್ಮೇಳನಕ್ಕೆ ಬರಬೇಕು. ಆದಿಚುಂಚನಗಿರಿ ಮಠದ ಪೀಠಾಧ್ಯಕ್ಷ ನಿರ್ಮಲಾನಂದನಾಥಶ್ರೀಗಳ ಸಾನಿಧ್ಯ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಎನ್. ಚಲುವರಾಯಸ್ವಾಮಿ ಅವರ ನೇತೃತ್ವದಲ್ಲಿ ನಡೆಯುತ್ತಿರುವ ಮೂರು ದಿನಗಳ ಈ ಸಮ್ಮೇಳನ ಹೊಸ ಇತಿಹಾಸಕ್ಕೆ ನಾಂದಿಯಾಡಲಿ ಎಂದು ತಿಳಿಸಿದರು.

ಈ ವೇಳೆ ತಾಲೂಕು ಕಸಾಪ ಅಧ್ಯಕ್ಷ ಸಿ.ಆರ್.ಚಂದ್ರಶೇಖರ್, ಗೌರವ ಕಾರ್ಯದರ್ಶಿಗಳಾದ ಕೊಣನೂರು ಧನಂಜಯ, ಸಚ್ಚಿನ್‌ಕುಮಾರ್, ತಾಲೂಕು ಕಸಾಪ ಕೋಶಾಧ್ಯಕ್ಷ ಕೆಂಪೇಗೌಡ, ಪ್ರಗತಿಪರ ರೈತ ಪರಮೇಶ್ ಸೇರಿದಂತೆ ಹಲವರು ಇದ್ದರು.