ಇತರರಿಗೆ ಒಳಿತು ಮಾಡಿದರೆ ಮನೋಲ್ಲಾಸ: ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಸ್ವಾಮೀಜಿ

ಹೊನ್ನಾವರ: ನಾವು ಒಳಿತು ಮಾಡಿದರೆ ನಮಗೆ ಒಳಿತಾಗುತ್ತದೆ. ಸಂತೋಷ, ಆನಂದ, ಮನೋಲ್ಲಾಸದ ಕ್ಷಣ ಉಂಟಾಗುತ್ತದೆ. ಮನಸ್ಸು, ಹೃದಯ ಅರಿತು ನಡೆದರೆ ನಮ್ಮ ಸಂಕಲ್ಪ ಪೂರ್ಣಗೊಳ್ಳಲು ಸಾಧ್ಯವಾಗುತ್ತದೆ ಎಂದು ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಸ್ವಾಮೀಜಿ ತಿಳಿಸಿದರು.

ಸುಜ್ಞಾನೇಶ್ವರ ಸ್ವಾಮಿಗಳ ತಂದೆ ಗುರುನಾಥ, ತಾಯಿ ದೀಪ ಅವರ ತ್ಯಾಗ ಅಮೂಲ್ಯವಾದದು. ಎಷ್ಟು ಕೃತಜ್ಞತೆ ಹೇಳಿದರೂ ಸಾಲದು. ಶಿಷ್ಯ ಸ್ವೀಕಾರ ಎನ್ನುವುದಕ್ಕೆ ಸುಯೋಗ ಬೇಕು. ಅದು ಇಂದು ನೆರವೇರಿದೆ ಎಂದರು. ಸನ್ಯಾಸ ಸ್ವೀಕರಿಸಿದ ಶ್ರೀಮಠದ ನೂತನ ಉತ್ತರಾಧಿಕಾರಿ ಸುಜ್ಞಾನೆಶ್ವರ ಭಾರತಿ ಸ್ವಾಮೀಜಿ ಮಾತನಾಡಿ, ಭವ್ಯ ದೇವಾಲಯ, ಗುರುಪೀಠ, ಅನ್ನಛತ್ರ, ವೇದಶಾಲೆ ಶ್ರೀದೇವಿಯ ಅನುಗ್ರಹ, ಗುರುಕೃಪೆಯಿಂದ ಸಾಧ್ಯವಾಗಿದೆ. ಮೂಲಗುರುಗಳು ವೃಕ್ಷವಿದ್ದಂತೆ ಉಳಿದ ಗುರುಗಳು ವೃಕ್ಷದ ಕೊಂಬೆಯಂತೆ. ಮಠದಿಂದ ಬಡವರಿಗೆ, ಸಮಾಜಕ್ಕೆ ಅನೇಕ ಕಾರ್ಯಗಳಾಗಿ ಉನ್ನತ ಮಟ್ಟಕ್ಕೇರುವಂತಾಗಿದೆ. ಗುರುವಿನ ಮಾರ್ಗದರ್ಶನ, ಸಂಕಲ್ಪದಂತೆ ಕಾರ್ಯ ಮಾಡಲು ಪ್ರಯತ್ನ ಮಾಡುವೆ ಎಂದರು.

ಸಂಸ್ಕ್ರತ ಪ್ರಾಧ್ಯಾಪಕ ಪತಂಜಲಿ ವಿಣಾಕರ್ ಮಾತನಾಡಿ, ಸನ್ಯಾಸ ಸ್ವೀಕಾರ ಎಂದರೆ ತಮ್ಮ ಕುಟುಂಬವನ್ನು ಜತೆಗೆ ಸ್ವಾರ್ಥ, ಕ್ರೊಧ ಎಲ್ಲವನ್ನೂ ತ್ಯಜಿಸಿ ಬರುವಂತದ್ದಾಗಿರುತ್ತದೆ. ಆದರೆ ನಾವು ಇಂದು ನಮ್ಮ ಸಂಸಾರ ತಾಪತ್ರಯಗಳನ್ನು ಅವರ ಬಳಿ ನಿವೇದನೆ ಮಾಡುತ್ತೇವೆ ಎಂದರು.