ಮಧುಗಿರಿಯಲ್ಲಿ ನಿರಂತರ ಜಡಿ ಮಳೆಗೆ ಜನ, ಜಾನುವಾರು ಹೈರಾಣ

ಮುಂದುವರಿದ ವರುಣಾರ್ಭಟ । ರೈತರು, ಕೂಲಿ ಕಾರ್ಮಿಕರು ಕಂಗಾಲು । ನಿತ್ಯದ ಜೀವನ ನಿರ್ವಹಣೆ ತೊಂದರೆ । ಮಧುಗಿರಿ ರಸ್ತೆಗಳು ಜಲಾವೃತ

ತಾಲೂಕಿನಲ್ಲಿ ವರುಣಾರ್ಭಟ ಮುಂದುವರಿದಿದ್ದು ರೈತರು, ಕೃಷಿಕರು ಹಾಗೂ ಕೂಲಿ ಕಾರ್ಮಿಕರು ಕಂಗಲಾಗಿದ್ದಾರೆ. ಜನತೆ ಹೊರಗೆ ಬರಲಾರದೆ ಬಹುತೇಕ ಎಲ್ಲ ಕೃಷಿ ಚಟುವಟಿಕೆಗಳು, ಕೈ ಕಸುಬುಗಳು ದಿಢೀರನೇ ನಿಂತು ಹೋಗಿ ನಿತ್ಯದ ಜೀವನ ನಿರ್ವಹಣೆಗೆ ಪರದಾಡುವಂತಾಗಿದೆ. ಈ ಜಡಿ ಮಳೆಯಿಂದಾಗಿ ರೈತರು ಸಾಕಿರುವ ಕುರಿ, ಮೇಕೆ ಹಾಗೂ ದನಕರುಗಳಿಗೆ ಮೇವು ಹೊಂದಿಸಲಾಗದೇ ಪರದಾಡುವ ದೃಶ್ಯ ಮನ ಕಲಕುವಂತಿದೆ.

ಇನ್ನೂ ಮುಸುಕಿನಜೋಳ ರಾಗಿ ಬೆಳೆಗಳು ಹೊಲಗಳಲ್ಲಿಯೇ ಮೊಳಕೆ ಹೊಡೆಯುವಂತಾಗಿದೆ. ಇತ್ತ ದನ ಕರುಗಳ ಮೇವಿಗೆ ಶೇಂಗಾ ಬಳ್ಳಿ ಅನುಕೂಲವಾಗುತ್ತದೆ ಎಂದುಕೊಂಡಿದ್ದ ರೈತನಿಗೆ ಈಗ ಸುರಿಯುತ್ತಿರುವ ಜಡಿ ಮಳೆಗೆ ಎಲ್ಲ ಶೇಂಗಾ ಮೇವು ಕಪ್ಪಾಗಿ ಹೊಲದಲ್ಲಿಯೇ ಕೊಳೆಯುತ್ತಿದೆ.ಇನ್ನೂ ಈ ಜಡಿ ಮಳೆಗೆ ಕೆಲವು ಬೆಳೆಗಳು ನೀರಿಡಿದು ಹಾನಿಗೆ ಒಳಗಾಗಿ ಅವಾಸನದತ್ತ ಸಾಗಿವೆ.

ಪೋಷಕರು ಮಕ್ಕಳಿಗೆ ಶಾಲಾ -ಕಾಲೇಜುಗಳು ರಜೆ ಇರುವುದರಿಂದ ತಮ್ಮ ಮಕ್ಕಳನ್ನು ಕೆರೆ ಕೋಡಿ, ಬಾವಿ, ಕಲ್ಯಾಣಿಗಳತ್ತ ಬಿಡದಂತೆ ಮುನ್ನಚ್ಚರಿಕೆ ವಹಿಸಬೇಕಿದೆ. ಈ ಜಡಿ ಮಳೆಗೆ ತಾಲೂಕಿನಲ್ಲಿ ಮೂರು ಮನೆಗಳು ಹಾನಿಗೊಳಗಾಗಿದ್ದು ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ, ಕೊಡಿಗೇನಹಳ್ಳಿ ಹೋಬಳಿ ಅಡವಿನಾಗೇನಹಳ್ಳಿಯಲ್ಲಿ ಎರೆಡು ವಾಸದ ಮನೆಗಳು, ಐ.ಡಿ.ಹಳ್ಳಿ ಹೋಬಳಿಯ ದಾದಗೊಂಡನಹಳ್ಳಿಯಲ್ಲಿ ಒಂದು ವಾಸದ ಮನೆಯ ಗೋಡೆ ಕುಸಿತವಾಗಿದೆ. ನಿರಂತರವಾಗಿ ಎಡಬಿಡದೆ ಸುರಿಯುತ್ತಿರುವ ಜಡಿ ಮಳೆಯಿಂದಾಗಿ ಜನರು ಮನೆ ಬಿಟ್ಟು ಹೊರಗೆ ಬಂದಿಲ್ಲ.