ಅಂಗನವಾಡಿಗಳಿಗೆ ಸ್ವಂತ ಕಟ್ಟಡ ನಿರ್ಮಿಸಲು ಸೂಚನೆ

ಹೊನ್ನಾವರ: ಇಲ್ಲಿಯ ತಾಪಂ ಸಭಾಭವನದಲ್ಲಿ ರಾಜ್ಯ ಮೀನುಗಾರಿಕೆ, ಬಂದರು ಮತ್ತು ಒಳನಾಡು ಜಲಸಾರಿಗೆ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯ ಅಧ್ಯಕ್ಷತೆಯಲ್ಲಿ ತ್ರೈಮಾಸಿಕ ಕೆಡಿಪಿ ಸಭೆ ನಡೆಯಿತು.ಸಭೆ ಪ್ರಾರಂಭದಲ್ಲೇ ಗರಂ ಆದ ಸಚಿವರು, ವ್ಯವಸ್ಥೆ ಬಗ್ಗೆ ಬೇಜಾರಾಗಿದ್ದೇನೆ. ಕೆಲವು ಇಲಾಖೆಯಲ್ಲಿ ಏಜೆಂಟರಿಂದ ಮಾತ್ರ ಕೆಲಸವಾಗುತ್ತಿದೆ ಎಂಬ ಮಾತುಕೇಳಿ ಬರುತ್ತಿದೆ. ಇದು ಎಲ್ಲ ಅಧಿಕಾರಿಗಳಿಗೂ ಕೊನೆಯ ಎಚ್ಚರಿಕೆ. ಕೆಲಸ ಮಾಡುವ ಮನಸ್ಸಿದ್ದರೆ ಇಲ್ಲೇ ಮುಂದುವರಿಯಿರಿ. ಇಲ್ಲ ನಾನೇ ನಿಮ್ಮನ್ನು ವರ್ಗಾಯಿಸಲು ವ್ಯವಸ್ಥೆ ಮಾಡುತ್ತೇನೆ ಎಂದು ಹೇಳಿದರು.

ಉಳಿದ 35 ಅಂಗನವಾಡಿಗಳಿಗೆ ತಕ್ಷಣದಲ್ಲೇ ಸ್ಥಳ ಗುರುತಿಸಬೇಕು. ಎಲ್ಲ ಇಲಾಖೆಗಳೂ ಅಂಗನವಾಡಿಗಳಿಗೆ ಸ್ವಂತ ಕಟ್ಟಡ ಸ್ಥಳಕ್ಕೆ ಸಹಕಾರ ನೀಡಬೇಕು ಎಂದು ಸಚಿವರು ಕಟ್ಟನಿಟ್ಟಾಗಿ ಸೂಚಿಸಿದರು. 40 ವರ್ಷಗಳಿಂದ ಅಂಗನವಾಡಿಗಳಿಗೆ ಸ್ವಂತ ಕಟ್ಟಡ ಕೊಡಲಾಗದಿರುವುದು ನಾಚಿಕೆಗೇಡು ಎಂದು ಸಚಿವರು ಹೇಳಿದರು.

ನಮ್ಮ ಕ್ಲಿನಿಕ್‌ಗೆ ವಿಳಂಬ ಮಾಡದೇ ಕಟ್ಟಡ ಗುರುತಿಸಲು ಸಚಿವರು ಸೂಚಿಸಿದರು. ಹೊನ್ನಾವರ ಪಪಂ ವ್ಯಾಪ್ತಿಗೆ ಕರ್ಕಿ, ಹಳದೀಪುರ, ಮುಗ್ವಾ ಗ್ರಾಪಂಗಳನ್ನು ಸೇರ್ಪಡೆ ಮಾಡಿಕೊಂಡು ನಮ್ಮ ಕ್ಲಿನಿಕ್ ಆರಂಭಿಸುವಂತೆ ಸಲಹೆ ವ್ಯಕ್ತವಾಯಿತು.

ತಾಲೂಕಿಗೆ ೮೫ ಫುಟ್ ಬ್ರಿಡ್ಜ್ ಅವಶ್ಯಕತೆ ಇರುವ ಬಗ್ಗೆ ಪಿಡಬ್ಲ್ಯುಡಿ ಇಲಾಖೆ ಚರ್ಚೆಯಲ್ಲಿ ಇಲಾಖಾ ಅಧಿಕಾರಿ ಎಂ.ಎಸ್. ನಾಯ್ಕ ಅವರು ತಿಳಿಸಿದರು. ಬಂದರು ಇಲಾಖೆಗೆ ಒಟ್ಟು ₹೨.೪೭ ಕೋಟಿ ಮಂಜೂರಾಗಿದೆ. ಕರ್ಕಿ ಗ್ರಾಮದ ಪಾವಿನಕುರ್ವಾಕ್ಕೆ ''''''''ಸೀವಾಲ್ '''''''' ನಿರ್ಮಾಣಕ್ಕೆ ಅನುದಾನ ಮಂಜೂರಾಗಿರುವ ಬಗ್ಗೆ ಇಲಾಖೆ ಅಧಿಕಾರಿಗಳು ತಿಳಿಸಿದರು.

₹೧೦ ಕೋಟಿ ವೆಚ್ಚದಲ್ಲಿ ಮೀನು ಮಾರುಕಟ್ಟೆ ನಿರ್ಮಾಣಕ್ಕೆ ಯೋಜನೆ ರೂಪಿಸಲಾಗಿದೆ. ಬಂದರು ಇಲಾಖೆ, ಮೀನುಗಾರಿಕೆ ಇಲಾಖೆಗಳು ಹೊನ್ನಾವರ ಬಂದರು ಪ್ರದೇಶದಲ್ಲಿ ಅಂಗಡಿ ಮಳಿಗೆ ಕಟ್ಟಿ ಈಗಾಗಲೇ ಅನಾದಿ ಕಾಲದಿಂದ ಅಲ್ಲಿರುವವರಿಗೆ ಬಾಡಿಗೆ ಕೊಡಬಹುದು ಎಂದು ಸಚಿವರು ಬಂದರು ಇಲಾಖಾಧಿಕಾರಿಗೆ ಸೂಚಿಸಿದರು.

ತಹಸೀಲ್ದಾರ್‌ ಪ್ರವೀಣ ಕರಾಂಡೆ, ತಾಪಂ ಕಾರ್ಯನಿರ್ವಹಣಾಧಿಕಾರಿ ಚೇತನಕುಮಾರ, ತಾಪಂ ಆಡಳಿತಾಧಿಕಾರಿ ಎನ್.ಆರ್. ಹೆಗಡೆ ಉಪಸ್ಥಿತರಿದ್ದರು. ಕೆಡಿಪಿ ನಾಮನಿರ್ದೇಶಿತ ಸದಸ್ಯರು, ವಿವಿಧ ಇಲಾಖಾಧಿಕಾರಿಗಳು ಭಾಗವಹಿಸಿದ್ದರು. ಸುಧೀಶ ನಾಯ್ಕ ವಂದಿಸಿದರು.