ವಿದ್ಯುತ್‌ ಸಂಪರ್ಕ ನೀಡಲು 48 ವರ್ಷ ಬೇಕಾಯ್ತು

ಕನ್ನಡಪ್ರಭ ವಾರ್ತೆ ಸಕಲೇಶಪುರ

ಕಟ್ಟಾಯ ಹೋಬಳಿಯ ವ್ಯಾಪ್ತಿಯಲ್ಲಿ ಬರುವ ರಾವುತನಹಳ್ಳಿ, ಮುಟ್ಟನಹಳ್ಳಿ, ತಮ್ಮಗಾನಹಳ್ಳಿ, ಕಲ್ಲಹಳ್ಳಿ ಸೇರಿದಂತೆ ಹಲವು ಗ್ರಾಮಗಳ ಐನೂರು ಎಕೆರೆ ಪ್ರದೇಶಕ್ಕೆ ಯಗಚಿ ಹಿನ್ನೀರಿನಿಂದ ನೀರು ಪೊರೈಸುವ ಏತ ನೀರಾವರಿ ಯೋಜನೆಗೆ ೧೯೭೧ರಲ್ಲಿ ಭೂಮಿಪೂಜೆ ನೆರವೇರಿಸಲಾಗಿತ್ತು. ೧೯೭೬ರಲ್ಲಿ ಕಾಮಗಾರಿ ಪೂರ್ಣಗೊಳಿಸಲಾಗಿತ್ತು. ಆದರೆ, ಯೋಜನೆಗೆ ವಿದ್ಯುತ್ ಪೂರೈಕೆಯಾಗದ ಕಾರಣ ಕಾಮಗಾರಿ ಉದ್ಘಾಟನೆ ಸಾಧ್ಯವಾಗಿರಲಿಲ್ಲ.

ಕನಿಷ್ಠ ಮಳೆ ಬೀಳುವ ಕಟ್ಟಾಯ ಹೋಬಳಿಯಲ್ಲಿ ಮಳೆಯಾಶ್ರಿತ ಬೆಳೆ ಮಾಡುವುದಕ್ಕೆ ಮಾತ್ರ ಇಲ್ಲಿನ ಜನರು ಸೀಮಿತಗೊಂಡಿದ್ದರು. ರಾವುತಹಳ್ಳಿ ಏತ ನೀರಾವರಿ ಯೋಜನೆ ಜಾರಿಗೊಳಿಸಿ ಎಂಬ ಹೋರಾಟ ನಿರಂತರವಾಗಿ ನಡೆಯುತ್ತಿದ್ದರೂ ಯಾವುದೇ ಆಡಳಿತಗಾರರು ಇತ್ತ ಗಮನಹರಿಸಿರಲಿಲ್ಲ. ಆದರೆ, ಯೋಜನೆ ನೆನಗುದಿಗೆ ಬಿದ್ದಿರುವುದನ್ನು ಗಮನಿಸಿದ್ದ ಆಲೂರು-ಸಕಲೇಶಪುರ-ಕಟ್ಟಾಯ ವಿಧಾನಸಭಾ ಕ್ಷೇತ್ರದ ಶಾಸಕ ಸಿಮೆಂಟ್ ಮಂಜು ಕೇವಲ ೭ ಲಕ್ಷ ರು. ವೆಚ್ಚದಲ್ಲಿ ಯೋಜನೆಗೆ ನಿರಂತರ ವಿದ್ಯುತ್ ಸಂಪರ್ಕ ವ್ಯವಸ್ಥೆ ಮಾಡುವ ಮೂಲಕ ಯೋಜನೆ ಉದ್ಘಾಟನೆಗೊಳಿಸಿದ್ದಾರೆ.

ಯೋಜನೆ ಜಾರಿಗೊಂಡು ಅರ್ಧ ಶತಮಾನ ಕಳೆದಿರುವ ಪರಿಣಾಮ ನೀರಾವರಿ ಕಲ್ಪಿಸುವ ಉದ್ದೇಶದಿಂದ ನಿರ್ಮಾಣಗೊಂಡಿರುವ ಕಾಲುವೆಗಳು ಭಾರಿ ಪ್ರಮಾಣದಲ್ಲಿ ಹಾನಿಗೊಂಡಿದ್ದು ಅಂದುಕೊಂಡಂತೆ ನೀರು ಹರಿಯುವುದು ಸಾಧ್ಯವಾಗಿಲ್ಲ. ಪರಿಣಾಮ ಯೋಜನೆ ಉದ್ಘಾಟನೆಗೊಂಡರು ಯೋಜನಾ ವ್ಯಾಪ್ತಿಯ ಎಲ್ಲ ರೈತರ ಭೂಮಿಗೂ ನೀರು ದೊರೆಯುವುದು ದುಸ್ಥರವಾಗಿದ್ದು ಕಾಲುವೆಗಳ ದುರಸ್ಥಿಗೆ ಅನುದಾನ ಬೇಕಿದೆ. ದೀಪದ ಕೆಳಗೆ ಕತ್ತಲು:

ಹಾಸನ ನಗರಕ್ಕೆ ಕುಡಿಯುವ ನೀರು ಪೂರೈಸುವ ಉದ್ದೇಶದಿಂದ ಗೂರೂರು ಗ್ರಾಮ ಸಮೀಪ ಅಮೃತ್ ಯೋಜನೆಯಡಿ ಹೊಸದಾಗಿ ನಿರ್ಮಾಣಗೊಂಡಿರುವ ಕುಡಿಯುವ ನೀರು ಪೊರೈಕೆ ಘಟಕದಿಂದಾಗಿ ೧೯೯೫ ರಲ್ಲಿ ಗೊರೂರು ಡ್ಯಾಮ್‌ನಿಂದ ಹಾಸನ ನಗರಕ್ಕೆ ನೀರು ಪೂರೈಸುವ ಉದ್ದೇಶದಿಂದ ೩೦ ಕೋಟಿ ರು. ವೆಚ್ಚದಲ್ಲಿ ಗೊರೂರು ಗ್ರಾಮದಲ್ಲಿ ನಿರ್ಮಾಣಗೊಂಡಿದ್ದ ಹಳೇ ನೀರು ಪೊರೈಕೆ ಘಟಕ ಈಗ ಯಾರಿಗೂ ಬೇಡದ ಕೂಸಾಗಿ ಪಾಳು ಬಿದ್ದಿದೆ. ಕೇವಲ ೩೦ ವರ್ಷಗಳ ಹಿಂದೆ ನಿರ್ಮಾಣಗೊಂಡಿರುವ ನೀರು ಪೂರೈಕೆ ಘಟಕ ಸುಸ್ಥಿತಿಯಲ್ಲಿದ್ದರೂ ಇದನ್ನು ಬಳಸಲಾಗುತ್ತಿಲ್ಲ. ಪರಿಣಾಮ ಕೊಟ್ಯಂತರ ರು. ಬೆಲೆಬಾಳುವ ಕಬ್ಬಿಣ ಕಳ್ಳರ ಪಾಲಾಗುತ್ತಿದೆ. ಈ ಘಟಕವನ್ನು ಬೇರೆ ನೀರಾವರಿ ಯೋಜನೆಗೆ ಬಳಸಿಕೊಳ್ಳಬಹುದು ಎಂಬುದು ಸಾರ್ವಜನಿಕರ ಅಭಿಪ್ರಾಯ.

ಐವತ್ತು ವರ್ಷಗಳ ಹಿಂದೆ ನಿರ್ಮಾಣಗೊಂಡಿದ್ದ ಏತನೀರಾವರಿ ಯೋಜನೆಯನ್ನು ಈಗ ಉದ್ಘಾಟಿಸುವ ಮೂಲಕ ಈ ಭಾಗದ ಬಹುವರ್ಷದ ನೀರಿನ ಸಮಸ್ಯೆಯನ್ನು ನೀಗಿಸಲಾಗಿದೆ.