ಒಡವೆ ದುಬಾರಿ, ವರದಕ್ಷಿಣೆಗೆ ವಧು ಪಾಲಕರ ಒಲವು!

ಶಿವಾನಂದ ಅಂಗಡಿಕನ್ನಡಪ್ರಭ ವಾರ್ತೆ ಹುಬ್ಬಳ್ಳಿನಿರೀಕ್ಷೆಗೂ ಮೀರಿ ಹಳದಿ ಲೋಹ ಬಂಗಾರದ ಬೆಲೆ ಲಕ್ಷ ರು. ದಾಟಿದ್ದು, ಹೆಣ್ಣುಮಕ್ಕಳ ಮದುವೆಗೆ ಸಿದ್ಧತೆ ಕೈಗೊಂಡಿದ್ದ ಪಾಲಕರಿಗೆ ಒಡವೆಗಳ ಖರೀದಿಯೇ ಅತೀ ವೆಚ್ಚದಾಯಕವಾಗಿ ಪರಿಣಮಿಸಿದ್ದು, ಚಿನ್ನದ ಬದಲು ಹಣ (ವರದಕ್ಷಿಣೆ) ನೀಡಲು ವಧುವಿನ ಪಾಲಕರು ಒಲವು ತೋರುತ್ತಿರುವುದು ಅಲ್ಲಲ್ಲಿ ಕೇಳಿ ಬರುತ್ತಿದೆ.

ಕಳೆಗುಂದಿದ ಮದುವೆಗಳು: ಹೆಣ್ಣು ಹೆತ್ತವರು ಮಗಳ ಮದುವೆ ನಿಶ್ಚಯವಾಗುತ್ತಿದ್ದಂತೆ ಜವಳಿ, ಬಾಂಡೆ ಸಾಮಾನು, ಚಿನ್ನದ ಒಡವೆ ಮಾಡಿಸಲು ಬಂಗಾರ ಖರೀದಿಸುವುದು ಸಾಮಾನ್ಯ. ಇದಕ್ಕಾಗಿ ಲಕ್ಷೋಪಲಕ್ಷ ಹಣ ಖರ್ಚಾಗುತ್ತದೆ. ಚಿನ್ನದ ದರ ಈಗ ಹುಬ್ಬಳ್ಳಿಯಲ್ಲಿ 10 ಗ್ರಾಂಗೆ (22 ಕ್ಯಾರೆಟ್‌) ₹ 93,000 ಸಾವಿರ ಇದ್ದರೂ ಕೂಡಾ ಆಭರಣ ತಯಾರಿಯ ಮಜೂರಿ ₹11 ಸಾವಿರ ಪ್ಲಸ್‌ ಜಿಎಸ್‌ಜಿ ₹ 3 ಸಾವಿರ ಸೇರಿ ₹1 ಲಕ್ಷ ಪಾವತಿಸಬೇಕಾಗಿದೆ. ಅಳಿಯನಿಗೆ ಬಂಗಾರ ಆಭರಣ ಕೊಡುವ ಜತೆಗೆ ಮಗಳಿಗೊಂದು ಚಿನ್ನದ ಮಾಂಗಲ್ಯ ಸರ ಇಲ್ಲವೇ ಬೇರೆ ಆಭರಣ ಮಾಡಿಕೊಟ್ಟರಾಯಿತು ಎಂದು ಹಣ ಕೂಡಿಟ್ಟವರಿಗೆ ಆ ಹಣ ಯಾತಕ್ಕೂ ಸಾಲುತ್ತಿಲ್ಲ. ''''''''ಚಿನ್ನಾಭರಣದ ಗೊಡವೆ ಏಕೆ ಇನ್ನಷ್ಟು ಹಣ ತೆಗೆದುಕೊಳ್ಳಿ'''''''' ಎಂದು ವರನ ಕಡೆಯವರಿಗೆ ಮನವೊಲಿಸುತ್ತಿರುವ ಸಂಗತಿಗಳು ಬೆಳಕಿಗೆ ಬರುತ್ತಿವೆ.ಹಾಲ್ ಮಾರ್ಕ್‌ ಚಿನ್ನದ ಆಭರಣಗಳ ಮಾರಾಟಕ್ಕೆ ಹುಬ್ಬಳ್ಳಿ ಹೆಸರುವಾಸಿ. ಇಲ್ಲಿಯ ದುರ್ಗದಬೈಲನ ಜವಳಿ ಗಲ್ಲಿಯಲ್ಲಿ ಸಾಲು ಸಾಲು ಬಂಗಾರ ಆಭರಣ ಅಂಗಡಿಗಳಿವೆ. ಸರಾಫಗಟ್ಟಿ ಸೇರಿ 150ಕ್ಕೂ ಹೆಚ್ಚು ಜ್ಯುವೆಲ್ಲರಿ ಅಂಗಡಿಗಳಿದ್ದು, 180ಕ್ಕೂ ಹೆಚ್ಚು ವ್ಯಾಪಾರಸ್ಥರು ಜ್ಯುವೆಲ್ಲರಿ ಅಸೋಸಿಯೇಶನ್‌ದಲ್ಲಿ ನೋಂದಣಿ ಮಾಡಿಸಿದ್ದಾರೆ. ಜತೆಗೆ ಸ್ವರ್ಣ ಜ್ಯುವೆಲ್ಲರಿ, ಭೀಮಾ ಗೋಲ್ಡ್, ಸಾಯಿ ಗೋಲ್ಡ್‌ ಪ್ಯಾಲೇಸ್‌, ಕಲ್ಯಾಣ ಜ್ಯುವೆಲ್ಲರಿ, ಜೋಯಾಲುಕ್ಕಾಸ್, ಮಲಬಾರ್ ಗೋಲ್ಡ್‌, ಕೆಜಿಪಿ ಜ್ಯುವೆಲ್ಲರಿ ಹೀಗೆ ಬೃಹತ್‌ ಬಂಗಾರದ ಆಭರಣ ಮಳಿಗೆಗಳು ಹುಬ್ಬಳ್ಳಿ ಮಾರುಕಟ್ಟೆಗೆ ಗ್ರಾಹಕರನ್ನು ಆಕರ್ಷಿಸುತ್ತಿವೆ. ಬೇರೆ ಬೇರೆ ಜಿಲ್ಲೆಗಳಿಂದ ಇಲ್ಲಿಗೆ ಬಂಗಾರ ಖರೀದಿಗೆ ಗ್ರಾಹಕರು ಆಗಮಿಸುತ್ತಾರೆ. ಹೀಗಾಗಿ ಮದುವೆ ಹಂಗಾಮಿನಲ್ಲಿ ಜ್ಯುವೆಲ್ಲರಿ ಮಳಿಗೆಗಳು ಗ್ರಾಹಕರಿಂದಲೇ ಗಿಜಿಗುಡುತ್ತಿವೆ. ಆದರೆ ಚಿನ್ನದ ಬೆಲೆ ಏರಿಕೆಯಿಂದಾಗಿ ವ್ಯಾಪಾರಕ್ಕೆ ಶೇ. 30ರಿಂದ 50ರಷ್ಟು ಹೊಡೆತ ಬಿದ್ದಿದೆ ಎನ್ನುತ್ತಾರೆ ವ್ಯಾಪಾರಸ್ಥರು.