ಕೆಆರ್‌ಎಸ್‌ನಲ್ಲಿ ಡಿಕೆಶಿಯಿಂದ ಕಾವೇರಿ ಆರತಿ

ಕನ್ನಡಪ್ರಭ ವಾರ್ತೆ ಮಂಡ್ಯ:

ವಿವಿಧ ಸಂಘಟನೆಗಳ ವಿರೋಧದ ನಡುವೆಯೂ 2ನೇ ವರ್ಷವೂ ಕೃಷ್ಣರಾಜಸಾಗರ ಜಲಾಶಯದ ಬೃಂದಾವನ- ದೋಣಿ ವಿಹಾರ ಕೇಂದ್ರದ ಬಳಿ ನಿರ್ಮಿಸಲಾಗಿದ್ದ ವೇದಿಕೆಯಲ್ಲಿ ಕಾವೇರಿ ಮಾತೆಗೆ ಸ್ಥಳೀಯ 15 ಮಂದಿ ವೈದಿಕರ ತಂಡ ಮೊದಲ ಆರತಿ ಸಲ್ಲಿಸಿತು. ಸಂಜೆ 7.30ಕ್ಕೆ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರು ಪತ್ನಿ ಸಮೇತ ಕಾವೇರಿ ಮಾತೆಗೆ ವಿಶೇಷ ಪೂಜೆ ಸಲ್ಲಿಸಿದರು. ನಂತರ ವೈದಿಕರ ತಂಡ ಧೂಪಾರತಿ, ಕರ್ಪೂರದಾರತಿ, ಪುಷ್ಪಾರ್ಚನೆ ಸಲ್ಲಿಸಿ ನಂತರ ಮಹಾಮಂಗಳಾರತಿಯನ್ನು ನಾದ, ಸಂಗೀತ ಸಂಯೋಜನೆಯೊಂದಿಗೆ ನೆರವೇರಿಸಿದರು.

ಕಳೆದ ವರ್ಷ ಜಲಸಂಪನ್ಮೂಲ ಸಚಿವರಾಗಿದ್ದ ಡಿ.ಕೆ.ಶಿವಕುಮಾರ್ ಅವರು ಕಾವೇರಿ ಆರತಿ ಕಾರ್ಯಕ್ರಮಕ್ಕೆ ನಾಂದಿ ಹಾಡಿದ್ದರು. ಈ ಬಾರಿ ಮುಖ್ಯಮಂತ್ರಿಯಾಗಿ ‘ಜೀವನದಿ’ ಕಾವೇರಿ ಮಾತೆಗೆ ಶಾಸ್ತ್ರೋಕ್ತವಾಗಿ ಪುಚ್ಪಾರ್ಚನೆ ನೆರವೇರಿಸಿ, ಆರತಿ ಮಾಡುವ ಮೂಲಕ‌ ಕಾರ್ಯಕ್ರಮಕ್ಕೆ ವಿದ್ಯುಕ್ತ ಚಾಲನೆ ನೀಡಿದರು. ಈ ವೇಳೆ ನಾದಸ್ವರ, ಗಂಟೆ‌ ಮತ್ತು ಶಂಖನಾದ‌ ಮೊಳಗಿಸಲಾಯಿತು. ನೆರೆದಿದ್ದ ಸಾರ್ವಜನಿಕರು ಕೈಯಲ್ಲಿ ಹಿಡಿದಿದ್ದ ಹೂವಿನ ಎಸಳುಗಳನ್ನು ಕಾವೇರಿ ಪ್ರತಿಮೆ ಮತ್ತು ನೀರಿಗೆ ಅರ್ಪಿಸಿದರು. ಆ ಸಂದರ್ಭದಲ್ಲಿ ಪೇಪರ್ ಬ್ಲಾಸ್ಟ್ ಯಂತ್ರದ ಮೂಲಕ ಹೂವು ಹಾಗೂ ಕಾಗದ ಚೂರುಗಳನ್ನು ಕಾವೇರಿ ಪ್ರತಿಮೆ ಮೇಲೆ ಚಿಮ್ಮಿಸಲಾಯಿತು.

ಇದಕ್ಕೂ ಮೊದಲು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರನ್ನು ನಾದಸ್ವರ ಹಾಗೂ ಜನಪದ ಕಲಾತಂಡಗಳ ಪ್ರದರ್ಶನದೊಂದಿಗೆ ಸ್ವಾಗತಿಸಲಾಯಿತು. ಡೊಳ್ಳು ಕುಣಿತ, ಪೂಜಾ ಕುಣಿತ, ವೀರಗಾಸೆ, ಚಂಡೆಮದ್ದಳೆ, ಮಹಿಳಾ ನಗಾರಿ, ಜಗ್ಗಲಗಿ ಸೇರಿದಂತೆ ನಾನಾ ಜನಪದ ಕಲಾತಂಡಗಳ ಕಲಾವಿದರು ಕಲಾ ಪ್ರದರ್ಶನ ನೀಡಿ ಗಮನ ಸೆಳೆದರು.