ಕಸಾಪದಿಂದ ಕನ್ನಡ ನಾಡು ನುಡಿಯ ಬಗ್ಗೆ ಅರಿವು

ಮುಂಡರಗಿ: ಹುಯಿಲಗೋಳ ನಾರಾಯಣರು ಸೇರಿದಂತೆ ಗದಗ ಜಿಲ್ಲೆಯ ಅನೇಕ ಮಹನೀಯರು ಕರ್ನಾಟಕ ಏಕೀಕರಣಕ್ಕಾಗಿ ಶ್ರಮಿಸಿದ್ದಾರೆ, ಗದುಗಿನ ಕುಮಾರವ್ಯಾಸ ಸಾಹಿತ್ಯ ದೇಶದಲ್ಲಿಯೇ ಮನೆ ಮಾಡಿದೆ. ಕಸಾಪ ಕನ್ನಡ ನಾಡು ನುಡಿಯ ಬಗ್ಗೆ ಅರಿವು ಮೂಡಿಸುವ ಕೆಲಸ ನಿರಂತರವಾಗಿ ಮಾಡುತ್ತಾ ಬಂದಿದೆ ಎಂದು ಡಂಬಳದ ಸಾಮಾಜಿಕ ಕಾರ್ಯಕರ್ತ ಗೋಣಿಬಸಪ್ಪ ಕೊರ್ಲಹಳ್ಳಿ ಹೇಳಿದರು.

ಕಸಾಪ ಕನ್ನಡ ಭಾಷೆ, ಸಂಸ್ಕೃತಿ, ಪರಂಪರೆ ಮತ್ತು ಜಾನಪದ ಕಲೆ ಇತರ ಹಲವಾರು ಸಾಂಸ್ಕೃತಿಕ ನೆಲೆಗಟ್ಟಿನಲ್ಲಿ ಕೆಲಸ ಮಾಡುತ್ತಿದೆ. ಶಾಲಾ-ಕಾಲೇಜುಗಳಲ್ಲಿ ಕೂಡಾ ಅನೇಕ ಸಾಹಿತಿಗಳ ಪರಿಚಯ ಮತ್ತು ನಾಡು ನುಡಿಗಾಗಿ, ಸಮಾಜಕ್ಕೆ ನೀಡಿದ ಕೊಡುಗೆ ಕುರಿತು ತಿಳಿಸುವ ಕಾರ್ಯ ನಡೆದಿದೆ. ವಿದ್ಯಾರ್ಥಿಗಳು ಇಂತಹ ಸಾಹಿತ್ಯ ಚಟುವಟಿಕೆಗಳಲ್ಲಿ ತೊಡಗಿಕೊಂಡು ತಮ್ಮ ಜ್ಞಾನ ಹೆಚ್ಚಿಸಿಕೊಳ್ಳಬೇಕು ಎಂದರು.

ಬದುಕು ಮತ್ತು ಬರಹ ಒಂದೇ ರೀತಿಯಲ್ಲಿರಿಸಿಕೊಂಡು ಜೀವನ ಸಾಗಿಸಿದ ವೆಂಕಟರಾಯರು ಹಂಪಿ ಕ್ಷೇತ್ರಕ್ಕೆ ಭೇಟಿ ನೀಡಿದ ಮೇಲೆ ಅದರ ಪ್ರಭಾವ ಬೀರಿಸಿಕೊಂಡು ರಾಜ್ಯದಲ್ಲಿ ಆಳಿ ಹೋದ ಅನೇಕ ರಾಜಮಹಾರಾಜರ ಜೀವನ ಚರಿತ್ರೆ ದಾಖಲಿಸಿದರು. ಅಂತವರ ಮೇಲೆ ಇನ್ನಷ್ಟು ಬೆಳಕು ಚೆಲ್ಲುವ ಅಧ್ಯಯನ ಮತ್ತು ವಿದ್ಯಾರ್ಥಿಗಳಿಗೆ ಅರಿವು ಮೂಡಿಸುವ ಕೆಲಸವಾಗಬೇಕು ಎಂದರು.

ಸಿ.ಕೆ. ಗಣಪ್ಪನವರ ಪ್ರಾಸ್ತಾವಿಕ ಮಾತನಾಡಿದರು. ಪ್ರಕಾಶ ತಳವಾರ ಸ್ವಾಗತಿಸಿದರು. ಎ.ಬಿ. ಬೇವಿನಕಟ್ಟಿ ನಿರೂಪಿಸಿ, ಎ.ಬಿ. ಹಿರೇಮಠ ವಂದಿಸಿದರು.