ಭೂಸ್ವಾಧೀನಾಧಿಕಾರಿ ಕಚೇರಿಗೆ ಬೀಗ ಜಡಿದು ಪ್ರತಿಭಟನೆ

ಹೂವಿನಹಡಗಲಿ: ಬಂಗಾರದಂತಹ ಭೂಮಿ ಕಳೆದುಕೊಂಡು ಪರಿಹಾರಕ್ಕಾಗಿ ಹತ್ತಾರು ಬಾರಿ ಕಚೇರಿ ಸುತ್ತಾಡಿದರೂ ಪರಿಹಾರ ಕೊಟ್ಟಿಲ್ಲ. ರೈತರ ಜೀವನಾಡಿ ಎಂದು ಹೇಳುವ ಸಿಂಗಟಾಲೂರು ಏತ ನೀರಾವರಿ ಯೋಜನೆಯ ಕಾಲುವೆಗೆ ಈವರೆಗೂ ಹನಿ ನೀರು ಹರಿದಿಲ್ಲ. ಇತ್ತ ಪರಿಹಾರ ಇಲ್ಲದೇ ಸಂಕಷ್ಟದ ಸ್ಥಿತಿಯಲ್ಲಿದ್ದೇವೆ. ಹಣ ಕೊಡುವವರಿಗೂ ಕಚೇರಿ ಬಿಟ್ಟು ಕದಲುವುದಿಲ್ಲ ಎಂದು ಬಿಗಿಪಟ್ಟು ಹಿಡಿದ ಸಂತ್ರಸ್ತರು ಪ್ರತಿಭಟಿಸಿದರು.

ವಿರೂಪಾಕ್ಷಪ್ಪ ಚೆನ್ನಮಲ್ಲಪ್ಪ ಅಲ್ಲಿಪುರ ಮಾತನಾಡಿ, ಮುಂಡವಾಡದ 52 ಎಕರೆ ಜಮೀನು ಮತ್ತು ಮುಖ್ಯ ಕಾಲುವೆ, ಉಪ ಕಾಲುವೆಗಾಗಿ 32 ಎಕರೆ ಜಮೀನಿನ ಪರಿಹಾರಕ್ಕಾಗಿ ಕಳೆದ 2013ರಿಂದ ಕಚೇರಿಗೆ ಅಲೆದರೂ ಪರಿಹಾರ ನೀಡಿಲ್ಲ. ಇದಕ್ಕೆ ಅಧಿಕಾರಿಗಳ ನಿರ್ಲಕ್ಷವೇ ಕಾರಣ. ಪರಿಹಾರ ನೀಡಲು ಲಂಚ ಕೇಳುತ್ತಿದ್ದಾರೆ. ನಮ್ಮ ನ್ಯಾಯಯುತ ಪರಿಹಾರ ಪಡೆಯಲು ನಾವು ಹಣ ನೀಡಲು ತಯಾರಿಲ್ಲ. ಅದಕ್ಕೆ ಪರಿಹಾರ ನೀಡುವುದು ವಿಳಂಬ ಮಾಡುತ್ತಿದ್ದಾರೆ ಎಂದು ಆರೋಪಿಸಿದರು.

ಸಂಗನಗೌಡ ಎಸ್‌.ಪಾಟೀಲ್‌ ಮಾತನಾಡಿ, ನಮ್ಮ ಭೂಮಿ ಸ್ವಾಧೀನ ಮಾಡಿಕೊಂಡು ಕೆಲ ರೈತರಿಗೆ, ಬೋಗಸ್‌ ನೋಟಿಸ್‌ ನೀಡಿ ಹಾದಿ ತಪ್ಪಿಸಿದ್ದಾರೆ. ಈ ಸರ್ಕಾರ ಮತ್ತು ಅಧಿಕಾರಿಗಳು ನಮಗೆ ಪರಿಹಾರ ಕೊಡಿ, ಇಲ್ಲವೇ ನಮ್ಮ ಕಾಗದ ಪತ್ರ ಕೊಡಿ ನಿಮ್ಮ ಕಚೇರಿಯ ಮುಂದೆ ಸುಟ್ಟು, ಆ ಭಸ್ಮ ನಿಮ್ಮ ಹಣೆಗೆ ಹಚ್ಚಿ ಹೋಗುತ್ತೇವೆ ಎಂದು ಆಕ್ರೋಶ ಹೊರ ಹಾಕಿದರು.

ಮುಂಡರಗಿ ವಿಭಾಗದ ಎಇಇ ರಮೇಶ ಮಾತನಾಡಿ, ಮುಂಡವಾಡ ರೈತರ ಪರಿಹಾರದ ಕಡತ ಅಂತಿಮ ಅವಾರ್ಡ್‌ ಹಂತಕ್ಕೆ ಬಂದಿವೆ. 33 ಎಕರೆ, 18 ಎಕರೆ, 15 ಎಕರೆ ಈ ಮೂರು ಕಡತಗಳು ವಿವಿಧ ಹಂತದಲ್ಲಿವೆ. ಇನ್ನು 20 ದಿನದೊಳಗೆ ಪರಿಹಾರ ನೀಡುತ್ತೇವೆ ಎಂದರು.