ಉತ್ತರ ಕನ್ನಡ ಭಗವದ್ಗೀತೆ ಜಿಲ್ಲೆ ಎಂದು ಘೋಷಿಸಲಿ: ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮೀಜಿ

ಯಲ್ಲಾಪುರ: ಉಕ ಜಿಲ್ಲೆಯನ್ನೇ ಭಗವದ್ಗೀತಾ ಜಿಲ್ಲೆಯೆಂದು ಘೋಷಿಸುವಂತಾಗಬೇಕು. ರಾಜ್ಯದಲ್ಲಿ ಉತ್ತಮವಾಗಿ ಅಭಿಯಾನ ನಡೆದಿದೆ. ಈ ವರ್ಷ ಜಿಲ್ಲೆಯಲ್ಲಿ ೮೦೦ ಕೇಂದ್ರ ಅದರಲ್ಲಿ ೪೦೦ ಕೇಂದ್ರ ಯಲ್ಲಾಪುರದಲ್ಲೇ ನಡೆದಿದೆ. ಇಲ್ಲಿನ ಸಂಘಟಕರು ಉತ್ತಮ ಕಾರ್ಯ ಮಾಡಿದ್ದಾರೆ ಎಂದು ಸೋಂದಾ ಸ್ವರ್ಣವಲ್ಲಿಯ ಶ್ರೀ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮೀಜಿ ನುಡಿದರು.

ಸಂಯಮ ನಮ್ಮನ್ನು ಜ್ಞಾನ ಮಾರ್ಗಕ್ಕೆ ಕೊಂಡೊಯ್ಯುತ್ತದೆ. ಅದನ್ನು ಮರೆತು ಆತುರತೆಗೆ ಬಲಿಯಾದರೆ ಬದುಕು ಅಧಃಪತನದತ್ತ ಸಾಗುತ್ತದೆ. ಗೀತೆಯನ್ನು ಓದಿ, ಅರ್ಥೈಸಿಕೊಂಡು, ಆಚರಿಸುವತ್ತ ಗಮನ ಹರಿಸಿ, ಬದುಕಿನ ಶ್ರೇಷ್ಠತೆ ರೂಪಿಸಿಕೊಳ್ಳಬೇಕು. ಮನಸ್ಸಿನ ನಿಯಂತ್ರಣ ಸಾಧಿಸಿದವ ಮಾತ್ರ ಯೋಗಿಯಾಗುತ್ತಾನೆ. ಗೀತೆ ವೈಜ್ಞಾನಿಕ ಚಿಂತನೆಯನ್ನೂ ಹೊಂದಿದೆ. ಸುಖ, ದುಃಖ, ಸಂಪತ್ತುಗಳು ಅನಿತ್ಯವಾದದ್ದು. ಜ್ಞಾನ ಮಾತ್ರ ನಿತ್ಯವಾದದ್ದು. ಆದ್ದರಿಂದ ಗೀತೆಯನ್ನು ನಿತ್ಯ ಜೀವನದಲ್ಲಿ ಪಠಿಸಿ, ಹಂತ ಹಂತವಾಗಿ ಅಧ್ಯಯನ ಮಾಡಿ, ಅದರ ಜ್ಞಾನದ ಅರಿವನ್ನು ಮಾಡಿಕೊಳ್ಳಬೇಕು ಎಂದರು.

ನೆಲೆಮಾವು ಮಠದ ಶ್ರೀಮಜ್ಜಗದ್ಗುರು ಮಾಧವಾನಂದ ಭಾರತೀ ಸ್ವಾಮೀಜಿ ಆಶೀರ್ವಚನ ನೀಡಿ, ಗೀತೆಯ ಸಾರ ಭವಿಷ್ಯದಲ್ಲಿಯೂ ಪ್ರಸ್ತುತ. ಬದುಕಿನ ಪಾಪ ಕಳೆದುಕೊಳ್ಳಲು ಗೀತಾ ಪಠಣ, ಗಂಗಾಸ್ನಾನ ಹಾಗೂ ಗಾಯತ್ರಿ ಪಠಣದಿಂದ ಸಾಧ್ಯ. ಗೀತೆಯಲ್ಲಿ ಹೇಳಿದಂತೆ ಧರ್ಮ ಮಾರ್ಗದಲ್ಲಿ ಸಾಗಿದಾಗ ಮಾತ್ರ ಬದುಕಿನ ಸಮರದಲ್ಲಿ ನಾವು ಜಯಿಸಬಹುದು ಎಂದರು.

ತಾಲೂಕು ಮಟ್ಟದ ಸ್ಪರ್ಧಾ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಜನರು ಏಕಕಂಠದಲ್ಲಿ ಭಗವದ್ಗೀತೆಯ ೯ನೇ ಅಧ್ಯಾಯವನ್ನು ಶ್ರೀಗಳ ಸಮ್ಮುಖದಲ್ಲಿ ಪಠಿಸಿದರು.

ಕಾರ್ಯಕ್ರಮಕ್ಕೂ ಮುನ್ನ ಮಾಗೋಡ ಕ್ರಾಸ್‌ನಿಂದ ಯತಿತ್ರಯರನ್ನು ಮೆರವಣಿಗೆಯ ಮೂಲಕ ದೇವಸ್ಥಾನದ ವರೆಗೆ ಕರೆತರಲಾಯಿತು. ಪೂರ್ಣಕುಂಭ, ಚಂಡೆವಾದನ, ವೇದಘೋಷ ಮೆರವಣಿಗೆಯ ಶೋಭೆ ಹೆಚ್ಚಿಸಿದವು.