ಜನಸಾಮಾನ್ಯರ ಸಮಸ್ಯೆಗೆ ಅಧಿಕಾರಿಗಳು ಸ್ಪಂದಿಸಲಿ: ಶಾಸಕ ನೇಮಿರಾಜ ನಾಯ್ಕ

ಕೊಟ್ಟೂರು: ಸಮಸ್ಯೆಗಳ ಮೂಟೆ ಹೊತ್ತು ಬರುವ ಜನರ ಆಶೋತ್ತರಗಳಿಗೆ ಕೂಡಲೇ ಸ್ಪಂದಿಸಬೇಕು ಎಂದು ಶಾಸಕ ಕೆ.ನೇಮಿರಾಜ ನಾಯ್ಕ್ ಹೇಳಿದರು.ಪಟ್ಟಣದ ಎಪಿಎಂಸಿ ಆವರಣದ ಬಯಲು ಸಭಾಂಗಣದಲ್ಲಿ ಕೊಟ್ಟೂರು ತಾಲೂಕು ಆಡಳಿತ ಶುಕ್ರವಾರ ಆಯೋಜಿಸಿದ ಜಿಲ್ಲಾಧಿಕಾರಿ ಜನ ಸ್ಪಂದನ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.

ಗೈರಾದ ಪಿಡಿಒಗಳ ಸಸ್ಪೆಂಡ್‌ಗೆ ಸೂಚನೆ: ನಂತರ ಜಿಲ್ಲಾಧಿಕಾರಿ ಎಂ.ಎಸ್. ದಿವಾಕರ್ ಜನತೆಯಿಂದ ಸಮಸ್ಯೆ ಆಲಿಸಿದರು. ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳನ್ನು ಕರೆದು ಸ್ಥಳದಲ್ಲಿಯೇ ಸಮಸ್ಯೆ ಬಗೆಹರಿಯುವಂತೆ ಸೂಚಿಸಿದರು. ಜನಸ್ಪಂದನೆಗೆ ಗೈರಾದ ತಾಲೂಕಿನ ಕೋಗಳಿ, ನಿಂಬಳಗೇರಿ ಗ್ರಾಪಂ ಪಿಡಿಒಗಳನ್ನು ಸಸ್ಪೆಂಡ್ ಮಾಡಿ ಕಾರಣ ಕೇಳಿ ಕೂಡಲೇ ನೋಟಿಸ್ ನೀಡುವಂತೆ ತಾಪಂ ಇಒ ವೈ.ರವಿಕುಮಾರಗೆ ತಾಕೀತು ಮಾಡಿದರು.

ಜಿಲ್ಲಾಧಿಕಾರಿಗೆ ಸಲ್ಲಿಕೆಯಾದ ಅರ್ಜಿಗಳಲ್ಲಿ ಆಹಾರ-3, ಕಂದಾಯ-61, ಪಶುಪಾಲನೆ-1, ಭೂಮಾಪನ-3, ಸಾರಿಗೆ-3, ಪಪಂ-19, ಎಪಿಎಂಸಿ-1, ಆರೋಗ್ಯ-1, ಸಿಡಿಪಿಒ-4, ತೋಟಗಾರಿಕೆ-1, ತಾಪಂ-10, ಜೆಸ್ಕಾಂ-4, ಶಿಕ್ಷಣ-2, ಕೃಷಿ-12 ಸೇರಿದಂತೆ ಸಲ್ಲಿಕೆಯಾದ ಅರ್ಜಿಗಳಲ್ಲಿ ಜಿಲ್ಲಾಧಿಕಾರಿ ಸ್ಥಳದಲ್ಲಿಯೇ 12 ಅರ್ಜಿ ವಿಲೇವಾರಿ ಮಾಡಿದರು. 113ಕ್ಕೂ ಹೆಚ್ಚು ಅರ್ಜಿಗಳು ಸಲ್ಲಿಕೆಯಾದವು.

ಸಭೆಯಲ್ಲಿ ಜಿಪಂ ಸಿಇಒ ನೋಂಗ್ಜಾಯ್ ಮೊಹಮದ್ ಅಲಿ ಅಕ್ರಮ್ ಶಾ, ಎಎಸ್ಪಿ ಸಲೀಂ, ಹರಪನಹಳ್ಳಿ ಉಪ ವಿಭಾಗ ಅಧಿಕಾರಿ ಚಿದಾನಂದ ಗುರುಸ್ವಾಮಿ, ತಾಪಂ ಇಒ ವೈ.ರವಿಕುಮಾರ್, ಡಿವೈಎಸ್ಪಿ ಮಲ್ಲಿಶೇಪ್ಪ ಮಲ್ಲಾಪುರ, ಪಪಂ ಮುಖ್ಯಾ ಅಧಿಕಾರಿ ನಸರುಲ್ಲ ಇದ್ದರು.