ನೇಕಾರಿಗೆ ಸರ್ಕಾರ ಸೌಲಭ್ಯ ನೀಡಲಿ

ಗದಗ: ನೇಕಾರರು, ಜವಳಿ ಉತ್ಪಾದಕರಿಗೆ ಸರ್ಕಾರ ಪ್ರೋತ್ಸಾಹ, ಸೌಲಭ್ಯ ನೀಡುವ ಮೂಲಕ ಪಾರಂಪರಿಕ ವೃತ್ತಿ ಮುನ್ನಡೆಗೆ ಅನುಕೂಲಕರ ವಾತಾವರಣ ನಿರ್ಮಿಸಬೇಕೆಂದು ಹಿರಿಯ ಜವಳಿ ಉತ್ಪಾದಕ ಬಲರಾಮ ಬಸವಾ ಹೇಳಿದರು.

ನೇಕಾರಿಕೆ ಮತ್ತು ಜವಳಿ ಉತ್ಪಾದನೆ ದೇಶದಲ್ಲಿಯೇ ಹೆಸರಾಗಿತ್ತು. ದೆಹಲಿಯ ಕೆಂಪುಕೋಟಿಯ ಮೇಲೆ ವಿರಾಜಮಾನವಾಗಿ ಹಾರಾಡಿದ ತ್ರಿವರ್ಣ ಧ್ವಜ ಬೆಟಗೇರಿಯ ನೇಕಾರರು ನೇಯ್ದಿದ್ದು ಎಂಬುದು ಐತಿಹಾಸಿಕ ದಾಖಲೆ. 4-5 ತಲೆಮಾರಿನಿಂದ ಸಾಗಿ ಬಂದಿರುವ ಕೈಮಗ್ಗ ಕಾಲಕ್ರಮೇಣ ಸುಧಾರಿಸುತ್ತ ಬಂದು ಆಧುನಿಕತೆಯ ಭರಾಟೆಯಲ್ಲಿ ಪಾವರ್‌ಲೂಮ್ ಆಗಿ ಪರಿವರ್ತನೆಗೊಂಡರೂ ಇನ್ನೂ ಕೈಮಗ್ಗಗಳು ಬೆಟಗೇರಿಯಲ್ಲಿ ಸದ್ದು ಮಾಡುತ್ತಿವೆ ಎಂದರು.

ಬಸವಾ ಸಮೂಹ ಸಂಸ್ಥೆಯ ಮಗ್ಗದ ಮನೆಯಲ್ಲಿ ನೇಕಾರಿಕೆ ವೃತ್ತಿಯಲ್ಲಿರುವವರಿಗೆ ಕೆಲವು ಸೌಲಭ್ಯ ನಮ್ಮ ಇತಿಮಿತಿಯಲ್ಲಿ ನೀಡಿದ್ದೇವೆ ಸರ್ಕಾರವೂ ಸೌಲಭ್ಯ ನೀಡುವಂತ್ತಾದರೆ ನೇಕಾರರೂ ಹಾಗೂ ಜವಳಿ ಉತ್ಪಾದಕರು ತಮ್ಮ ವೃತ್ತಿ ಮುಂದುವರೆಸಲು ಸಾಧ್ಯವಾಗುವದು. ನೇಕಾರರಿಗೆ ನೀಡುವ ಸನ್ಮಾನ ನಿಧಿಯನ್ನು 5 ಸಾವಿರದಿಂದ ₹20 ಸಾವಿರಕ್ಕೇರಿಸಬೇಕು. 60 ವರ್ಷ ಮೇಲ್ಪಟ್ಟ ನೇಕಾರ ಕುಟುಂಬಕ್ಕೆ ಭವಿಷ್ಯ ನಿಧಿ ರೂಪಿಸಬೇಕು, ನೇಕಾರರ ಮಕ್ಕಳಿಗೆ ಉನ್ನತ ಶಿಕ್ಷಣದವರೆಗೆ ಉಚಿತ ಶಿಕ್ಷಣ ಸೌಲಭ್ಯ ನೀಡಬೇಕೆಂದರು.

ಹಿರಿಯರಾದ ಸಂಕಣ್ಣ ಹಾದಿಮನಿ, ತುಕಾರಾಮ ಕಬಾಡಿ, ನಾಗಪ್ಪ, ಕುಮಾರ, ಸುಭಾಸ, ಲತಾ, ಕೃಷ್ಣಾ ಸೇರಿದಂತೆ ಇತರರು ಇದ್ದರು. ಶ್ರೀನಿವಾಸ ಸ್ವಾಗತಿಸಿದರು. ಅನೂಪ ಪರಿಚಯಿಸಿದರು. ರಾಕೇಶ ನಿರೂಪಿಸಿದರು. ಪ್ರಸನ್ನ ವಂದಿಸಿದರು.