ಪರಿಸರ ಸಂರಕ್ಷಣೆಗೆ ಮುಂದಿನ ಪೀಳಿಗೆ ಮುಂದಾಗಲಿ

ಸಿದ್ದಾಪುರ: ಪ್ರಕೃತಿ ಕೇವಲ ಮನುಷ್ಯನಿಗಾಗಿ ಮಾತ್ರ ಇಲ್ಲ. ಅಸಂಖ್ಯಾತ ಜೀವಿಗಳು ಸರಪಣಿಯ ರೀತಿಯಲ್ಲಿ ಈ ಪರಿಸರದಲ್ಲಿವೆ. ಇಂಬಳ, ನಿಸರಿಯಂಥ ಸಣ್ಣ, ಸಣ್ಣ ಜೀವಿಗಳೂ ಪರಿಸರಕ್ಕೆ ಪೂರಕವಾಗಿವೆ. ಕಾಡು ನಾಶವಾದರೆ ಅದು ಕೇವಲ ಕಾಡಿನ ಅವನತಿ ಅಲ್ಲ. ಅದು ಮನುಕುಲದ ನಾಶ. ಈ ಕುರಿತು ವಿದ್ಯಾರ್ಥಿಗಳು ಅರಿವು ಮಾಡಿಕೊಳ್ಳಬೇಕಿದೆ ಎಂದು ಕ್ಷೇತ್ರ ಶಿಕ್ಷಣಾಧಿಕಾರಿ ಎಂ.ಎಚ್. ನಾಯ್ಕ ಹೇಳಿದರು.

ಈಗ ಕಾಡು ಗಣನೀಯವಾಗಿ ಕಡಿಮೆಯಾಗುತ್ತಿದೆ.ಇದು ನಾಗರಿಕತೆಯೋ, ಅನಾಗರಿಕತೆಯೋ? ಅರ್ಥವಾಗುತ್ತಿಲ್ಲ. ಇಂದಿನ ಕೃಷಿ ಕ್ಷೇತ್ರದ ಮೇಲೆ ಕಾಡುಪ್ರಾಣಿಗಳ ದಾಳಿಗೆ ಮುಖ್ಯ ಕಾರಣ ಕಾಡು ನಶಿಸಿರುವದು. ನಾವು ಕಾಡು, ಪರಿಸರದ ಸಂಪನ್ಮೂಲ ಅಗತ್ಯವಿದ್ದಷ್ಟು ಬಳಸಿದಾಗ ಕಾಡು ಮತ್ತು ನಾಡು ಉಳಿಯುತ್ತದೆ. ಮುಂದಿನ ನಾಗರಿಕರಾಗುವ ಇಂದಿನ ವಿದ್ಯಾರ್ಥಿಗಳು ಪರಿಸರದ ಕುರಿತು ಕುತೂಹಲದ ಕಣ್ಣು ಹೊಂದಬೇಕು. ಇಂಥ ಕಾರ್ಯಕ್ರಮಗಳು ನೀಡುವ ಅರಿವಿನ ಮೂಲಕ ಜಾಗೃತಿ ಪಡೆದುಕೊಳ್ಳಬೇಕು ಎಂದರು.

ನಿವೃತ್ತ ಮುಖ್ಯ ಶಿಕ್ಷಕ ಎಂ.ಆರ್. ಭಟ್ಟ ಮಾತನಾಡಿ, ಪ್ರಕೃತಿ ಒಂದನ್ನೊಂದು ಅವಲಂಬಿಸಿಕೊಂಡ ಜೀವಜಾಲ. ಅದನ್ನು ಸಮರ್ಪಕವಾಗಿ ಉಳಿಸಿಕೊಳ್ಳುವದು ನಮ್ಮೆಲ್ಲರ ಕರ್ತವ್ಯ. ಮುಂದಿನ ಪೀಳಿಗೆಯ ಈಗಿನ ಕಿರಿಯರು ಆ ಬಗ್ಗೆ ಎಚ್ಚರ ವಹಿಸಬೇಕು ಎಂದರು.

ಅಧ್ಯಕ್ಷತೆ ವಹಿಸಿದ್ದ ಪ್ರೌಢಶಾಲಾ ಆಡಳಿತ ಮಂಡಳಿ ಅಧ್ಯಕ್ಷ ಆರ್.ಎಸ್. ಹೆಗಡೆ ಉಳ್ಳಾನೆ ಮನುಷ್ಯ ಸ್ವಾರ್ಥ ತೊರೆದು ಪರಿಸರದ ಉಳಿವಿಗೆ ಮುಂದಾಗಬೇಕು ಎಂದರು.

ಮುಖ್ಯಾಧ್ಯಾಪಕ ಜನಾರ್ಧನ ಸಿ. ಸ್ವಾಗತಿಸಿ ಪ್ರಾಸ್ತಾವಿಕ ಮಾತನಾಡಿದರು. ಶಿಕ್ಷಕಿ ವಿಜಯಲಕ್ಷ್ಮೀ ವಂದಿಸಿದರು. ಶಿಕ್ಷಕಿ ಸಂಧ್ಯಾ ಶಾಸ್ತ್ರೀ ನಿರೂಪಿಸಿದರು.