ಜೀವನದ ಹೋರಾಟದ ಅರಿವು ಇಂದಿನ ಪೀಳಿಗೆಗೆ ತಿಳಿಯಲಿ: ಡಾ. ಗೋ.ರು. ಚನ್ನಬಸಪ್ಪ

ಧಾರವಾಡ: ಪಾಲಕರು ತಮ್ಮ ಮಕ್ಕಳಿಗೆ ಶರಣ- ಶರಣೆಯರ ವಚನಗಳನ್ನು ಕಲಿಸುವುದರ ಮೂಲಕ ಅವರ ಜೀವನದ ಹೋರಾಟದ ಅರಿವನ್ನು ಮೂಡಿಸುವುದು ಅಗತ್ಯವಾಗಿದೆ ಎಂದು ಹಿರಿಯ ಜಾನಪದ ವಿದ್ವಾಂಸ ನಾಡೋಜ ಡಾ. ಗೋ.ರು. ಚನ್ನಬಸಪ್ಪ ಹೇಳಿದರು.

12ನೇ ಶತಮಾನದಿಂದಲೇ ಮಹಿಳೆಯರ ಆತ್ಮಗೌರವಕ್ಕಾಗಿ ನಡೆದ ಹೋರಾಟವು ಅಕ್ಕನಿಂದ ಪ್ರಾರಂಭವಾದರೂ ಸಹ, ನಾಗರಿಕ ಸಮಾಜ ತಲೆತಗ್ಗಿಸುವಂತಹ ಘಟನೆಗಳು ಜರಗುತ್ತಿರುವ ಈ 21ನೇ ಶತಮಾನದಲ್ಲೂ ಅಕ್ಕನ ವಿಚಾರಧಾರೆಗಳು ಮಹಿಳೆಯರ ಆತ್ಮಬಲ, ಮನೋಬಲವನ್ನು ಹೆಚ್ಚಿಸುವಲ್ಲಿ ಸಹಕಾರಿಯಾಗಿವೆ ಎಂದರು.

ತತ್ವಜ್ಞಾನಿಯ ಆತ್ಮ- ಮೆದುಳಿನಲ್ಲಿ, ಕವಿಯ ಆತ್ಮ- ಹೃದಯದಲ್ಲಿ, ಗಾಯಕನ ಆತ್ಮ-ಕಂಠದಲ್ಲಿ ಇದ್ದರೆ ನೃತ್ಯಗಾರ್ತಿಯ ಆತ್ಮ-ಪೂರ್ತಿ ಶರೀರದಲ್ಲಿ ಇರುತ್ತದೆ. ಆದುದರಿಂದ ಭಾವನಾತ್ಮಕವಾಗಿ ನೃತ್ಯಗಾರ್ತಿ ನೀಡುವ ಸಂದೇಶ ಬಹುಕಾಲ ಮನದಲ್ಲಿ ಸ್ಥಿರವಾಗಿ ಉಳಿಯುತ್ತದೆ ಎಂದರು.

ಅಥಣಿ ಮೊಟಗಿ ಮಠದ ಪ್ರಭು ಚನ್ನಬಸವ ಸ್ವಾಮೀಜಿ ಮಾತನಾಡಿ, ಯುವಕ- ಯುವತಿಯರು ಆಧುನಿಕ ತಂತ್ರಜ್ಞಾನದ ವ್ಯಸನಕ್ಕೆ ಬಲಿಯಾಗಿ, ತಮ್ಮ ಜೀವನವನ್ನು ಕಳೆದುಕೊಳ್ಳುವ ಹಂತ ತಲುಪಿದ್ದಾರೆ. ಅವರನ್ನು ಸಂಗೀತ, ನೃತ್ಯ ಮುಂತಾದ ಕಲೆಗಳಲ್ಲಿ ತೊಡಗಿಸಿ, ಅವರಲ್ಲಿ ಆತ್ಮಸ್ಥೈರ್ಯ ಹೆಚ್ಚಿಸುವ ಭಾರತೀಯ ಸಂಸ್ಕೃತಿಯ ಅರಿವನ್ನು ಮೂಡಿಸುವಲ್ಲಿ ಪಾಲಕರ ಕರ್ತವ್ಯ ಬಹಳ ಮಹತ್ವದ್ದು, ಇಂತಹ ಕಾಯಕದಲ್ಲಿ ತೊಡಗಿಕೊಂಡಿರುವ ನಾಗರತ್ನ ಹಡಗಲಿ ದಂಪತಿಗಳು ಅಭಿನಂದನಾರ್ಹರು ಎಂದರು.