ಮುಂದಿನ ಪೀಳಿಗೆಗೆ ಸಂಸ್ಕಾರ, ಸಂಸ್ಕೃತಿ ಅರಿವು ಮೂಡಿಸೋಣ: ಎಚ್.ಆರ್. ಗವಿಯಪ್ಪ

ಹೊಸಪೇಟೆ: ಮುಂದಿನ ಪೀಳಿಗೆಗೆ ಸಂಸ್ಕಾರ, ಸಂಸ್ಕೃತಿ ಅರಿವು ಮೂಡಿಸಬೇಕಿದೆ. ಹಾಗಾಗಿ ನಗರದಲ್ಲೂ ಊರಮ್ಮ ದೇವಿ ಜಾತ್ರೆಯನ್ನು ಅದ್ಧೂರಿಯಾಗಿ ಆಚರಿಸೋಣ. ಜಾತ್ರೆಗೆ ವೈಯಕ್ತಿಕವಾಗಿ ₹10 ಲಕ್ಷ ದೇಣಿಗೆ ನೀಡುವೆ ಎಂದು ಶಾಸಕ ಎಚ್.ಆರ್. ಗವಿಯಪ್ಪ ಹೇಳಿದರು.

ಕೊಟ್ಟೂರು ಸಂಸ್ಥಾನ ಮಠದ ಶ್ರೀ ಕೊಟ್ಟೂರು ಬಸವಲಿಂಗ ಸ್ವಾಮೀಜಿ ಮಾತನಾಡಿ, ಹಿಂದೂ ಧರ್ಮ ವ್ಯಕ್ತಿ, ಜಾತಿ ಪರವಾದ ಧರ್ಮ ಅಲ್ಲ. ಮಾನವೀಯತೆಯ ಸಂಸ್ಕೃತಿಯನ್ನು ಸಾರುವ ಮಾನವ ಧರ್ಮವೇ ಹಿಂದೂ ಧರ್ಮ. ಧರ್ಮದ ಬಗ್ಗೆ ಅರಿವಿಲ್ಲದವನಿಗೆ ಉಳಿವಿಲ್ಲ. ಧರ್ಮವೆಂದರೆ ಆಚರಣೆಯಲ್ಲಿರಬೇಕು. ಹಿಂದೂ ಎಂದರೆ ಹಿಂಸೆಯಿಂದ ಹಿಂದೆ ಸರಿಯುವವನು. ಮಾನವಧರ್ಮ ನಶಿಸುತ್ತಿರುವ ಈ ದಿನಗಳಲ್ಲಿ ಪುನಃ ಮಾನವವೀಯತೆಯೆಡೆಗೆ ಸೆಳೆಯುವುದೇ ಸರ್ವಧರ್ಮವಾಗಿದೆ. ಆದ್ದರಿಂದ ಊರಮ್ಮ ದೇವಿ ಜಾತ್ರೆಯನ್ನು ಸರ್ವಧರ್ಮ ಜಾತ್ರೆಯಾಗಿ ಆಚರಿಸಬೇಕಿದೆ ಎಂದರು.

ದೇವಸ್ಥಾನದ ಜೀರ್ಣೋದ್ಧಾರ ಅಭಿವೃದ್ಧಿ ಸಮಿತಿಯ ಅಧ್ಯಕ್ಷ ಬಂಡೆ ಶ್ರೀನಿವಾಸ್ ಮಾತನಾಡಿ, ನಗರದ 34ನೇ ವಾರ್ಡ್‌ನ ಗ್ರಾಮದೇವತೆ ಊರಮ್ಮ ದೇವಿಯ ಜಾತ್ರಾ ಮಹೋತ್ಸವವನ್ನು ಏ. 2 ಮತ್ತು 3ರಂದು ಆಯೋಜಿಸಲಾಗಿದೆ. ಆದ್ದರಿಂದ ಮಾ. 26ರಿಂದ ಏಪ್ರಿಲ್‌ 1ರ ವರೆಗೆ ದೇವಸ್ಥಾನದಲ್ಲಿ ವಿವಿಧ ಬಗೆಯ ಧಾರ್ಮಿಕ ಕೈಂಕರ್ಯಗಳು ನಡೆಯಲಿವೆ. ಆದ್ದರಿಂದ ದೇವಿಯ ಜಾತ್ರೆಯನ್ನು ಜಾತಿ ಧರ್ಮಕ್ಕೆ ಸೀಮಿತಗೊಳಿಸದೆ, ತನು-ಮನ-ಧನದಿಂದ ಗ್ರಾಮ ದೇವತೆ ಆರಾಧನೆ ಮಾಡಬೇಕಿದೆ ಎಂದರು. ವಿವಿಧ ಸಮಾಜಗಳ ಮುಖಂಡರು ಇದ್ದರು.