ಬದುಕು ಸುಂದರವಾಗಬೇಕಾದರೆ ನೊಂದವರಿಗೆ ಸ್ಪಂದಿಸಿ

ಚಿತ್ರದುರ್ಗ: ಅಲಂಕಾರಿಕ ಸಾಮಾಗ್ರಿ ಬಳಸಿ ಮುಖ ಸುಂದರವನ್ನಾಗಿಸುವುದು ಬಲು ಸುಲಭ. ಆದರೆ ಬದುಕು ಸುಂದರವಾಗಿರಬೇಕಾದರೆ ನೊಂದವರಿಗೆ ಸಹಾಯ ಮಾಡುವುದು ಅಗತ್ಯವೆಂದು ಮುರುಘಾ ಮಠದ ಉಸ್ತುವಾರಿ ಬಸವಪ್ರಭು ಸ್ವಾಮೀಜಿ ಹೇಳಿದರು.

ನಾವು ಮಾಡುವ ಸಂಪಾದನೆ 4 ಜನರಿಗೆ ಉಪಯೋಗವಾಗಬೇಕು. ಓದಿ ಪಡೆದ ಪದವಿ ಒಂದಿಷ್ಟು ಜನಕ್ಕೆ ಉಪಯೋಗವಾಗಬೇಕು. ಆಗ ಪದವಿಗೆ ಸಾರ್ಥಕತೆ ದೊರೆಯುತ್ತದೆ. ಕವಿ ಸಿದ್ಧಯ್ಯ ಪುರಾಣಿಕರು ಏನಾದರೂ ಆಗು ಮೊದಲು ಮಾನವನಾಗು ಎಂದಿದ್ದು ಮಾನವೀಯತೆಯನ್ನು ಬೆಳಸಿಕೊಳ್ಳಬೇಕು ಎಂದರು.

ಒಳ್ಳೆಯ ಸಂಸ್ಕಾರ ಕಲಿತು ಸಮಾಜಕ್ಕೆ ಒಳ್ಳೆಯದನ್ನು ಮಾಡಿ ಶ್ರೇಷ್ಠ ವ್ಯಕ್ತಿಗಳಾಗಬೇಕು. ಅಬ್ದುಲ್ ಕಲಾಂರಂತಹ ಮಹಾನ್ ವ್ಯಕ್ತಿಗಳನ್ನು ಆದರ್ಶವಾಗಿಟ್ಟುಕೊಳ್ಳಬೇಕು. ಅಬ್ದುಲ್ ಕಲಾಂರನ್ನು ಇಡೀ ಜಗತ್ತೇ ಪ್ರೀತಿಸುತ್ತಿತ್ತು. 2016ರಲ್ಲಿ ಶ್ರೀಮಠದ ಕಾರ್ಯಕ್ರಮಕ್ಕೆ ಅಬ್ದುಲ್ ಕಲಾಂ ಆಗಮಿಸಿ ಸಂಸ್ಥೆಯ ವಿದ್ಯಾರ್ಥಿಗಳ ಕುರಿತು ಸ್ಫೂರ್ತಿಯ ಮಾತುಗಳನ್ನಾಡಿದ್ದರು. ಎಸ್‌ಜೆಎಂಐಟಿ ಕಾಲೇಜನ್ನು ಜಗದ್ಗುರು ಮಲ್ಲಿಕಾರ್ಜುನ ಮಹಾಸ್ವಾಮಿಗಳು ಸ್ಥಾಪಿಸಿದರು. ಎಸ್.ಜೆಎಂ ತಾಂತ್ರಿಕ ಮಹಾವಿದ್ಯಾಲಯ ಕಳೆದ 43 ವರ್ಷಗಳಿಂದ ಸಾವಿರಾರು ವಿದ್ಯಾರ್ಥಿಗಳಿಗೆ ಉತ್ತಮ ಶಿಕ್ಷಣ ನೀಡುತ್ತಾ ಬಂದಿದೆ ಎಂದರು.

ಪ್ರಾಚಾರ್ಯ ಡಾ.ಭರತ್ ಮಾತನಾಡಿ, ತಂತ್ರಜ್ಞಾನದಲ್ಲಿ ಮುಂದುವರೆದ ರಾಷ್ಟ್ರಗಳಲ್ಲಿ ಆತ್ಮಹತ್ಯೆಗಳು ಹೆಚ್ಚಾಗುತ್ತಿರುವುದು ಆಂತಂಕಕಾರಿ ಬೆಳವಣಿಗೆಯಾಗಿದೆ. ಮಾನವೀಯ ಮೌಲ್ಯಗಳನ್ನು ಪಾಲಿಸುವವರ ಸಂಖ್ಯೆ ಕಡಿಮೆಯಾಗುತ್ತಿರುವುದು ಇದಕ್ಕೆ ಕಾರಣ. ಮನುಷ್ಯ ಕೇವಲ ಹಣಗಳಿಕೆ ಹಿಂದೆ ಬಿದ್ದು ಏಕಾಂಗಿತನಗೊಳಕ್ಕಾಗುತ್ತಿದ್ದಾನೆ. ಜೀವನದಲ್ಲಿ ಸಮಸ್ಯೆಗಳು ಎದುರಾದಾಗ ಮಾನಸಿಕ ಅಸಮತೋಲನದಿಂದ ಸೋಲುತ್ತಿದ್ದೇವೆ. ಮಾನಸಿಕ ಸಮತೋಲನ ಹೊಂದಿದದಲ್ಲಿ ಸಮಸ್ಯೆಗಳನ್ನು ಹಿಮ್ಮೆಟ್ಟಿಸಬಹುದು. ನಮ್ಮ ವಿದ್ಯಾಲಯದಲ್ಲಿ ವ್ಯಾಸಂಗ ಮಾಡಿದ ಹಿರಿಯ ವಿದ್ಯಾರ್ಥಿಗಳು ಇಸ್ರೋದ ಚಂದ್ರಯಾನ-3ರ ಯೋಜನೆಯ ಯಶಸ್ವಿಯ ಭಾಗವಾಗಿರುವುದು ಹೆಮ್ಮೆಯ ಸಂಗತಿ ಎಂದರು.