ಕನ್ನಡಪ್ರಭ ವಾರ್ತೆ ರಾಮದುರ್ಗ ನಮ್ಮ ಸುತ್ತಲಿನ ಪರಿಸರ ಸ್ವಚ್ಛತೆಗೆ ಮೊದಲು ಆಧ್ಯತೆ ನೀಡುವ ಮೂಲಕ ಪರಿಸರದ ರಕ್ಷಣೆಗೆ ಪ್ರತಿಯೊಬ್ಬರು ಕೊಡುಗೆ ನೀಡಲು ಶ್ರಮಿಸಬೇಕು ಎಂದು ಬ್ಲಾಕ್ ಯುವ ಕಾಂಗ್ರೆಸ್ ಅಧ್ಯಕ್ಷ ಅನಿಕೇತ ಪಟ್ಟಣ ಹೇಳಿದರು.
ಕನ್ನಡಪ್ರಭ ವಾರ್ತೆ ರಾಮದುರ್ಗ
ನಮ್ಮ ಸುತ್ತಲಿನ ಪರಿಸರ ಸ್ವಚ್ಛತೆಗೆ ಮೊದಲು ಆಧ್ಯತೆ ನೀಡುವ ಮೂಲಕ ಪರಿಸರದ ರಕ್ಷಣೆಗೆ ಪ್ರತಿಯೊಬ್ಬರು ಕೊಡುಗೆ ನೀಡಲು ಶ್ರಮಿಸಬೇಕು ಎಂದು ಬ್ಲಾಕ್ ಯುವ ಕಾಂಗ್ರೆಸ್ ಅಧ್ಯಕ್ಷ ಅನಿಕೇತ ಪಟ್ಟಣ ಹೇಳಿದರು.ಪಟ್ಟಣದ ಗುರುಭವನದಲ್ಲಿ ಮಕ್ಕಳ ದಿನಾಚರಣೆ ಅಂಗವಾಗಿ ಕನ್ನಡಪ್ರಭ, ಏಷಿಯಾನೆಟ್‌ ಸುವರ್ಣ ನ್ಯೂಸ್‌ ಮತ್ತು ಚಿತ್ರಕಲಾ ಪರಿಷತ್ ಸಹಯೋಗದಲ್ಲಿ ಹೈಸ್ಕೂಲ್ ವಿದ್ಯಾರ್ಥಿಗಳಿಗೆ ಆಯೋಜಿಸಿದ್ದ ತಾಲೂಕು ಮಟ್ಟದ ಚಿತ್ರಕಲಾ ಸ್ಪರ್ಧೆಯಲ್ಲಿ ವಿಜೇತರಿಗೆ ಬಹುಮಾನ ವಿತರಿಸಿ ಮಾತನಾಡಿದರು. ಪರಿಸರದಲ್ಲಿನ ಪ್ರಾಣಿ, ಪಕ್ಷಿಗಳನ್ನು ಪ್ರೀತಿಯಿಂದ ಕಾಣಬೇಕು. ಕನ್ನಡಪ್ರಭ ಮತ್ತು ಸುವರ್ಣ ನ್ಯೂಸ್‌ ಮಕ್ಕಳಲ್ಲಿ ಪರಿಸರ ಪ್ರಜ್ಞೆ ಮೂಡಿಸಲು ಚಿತ್ರಕಲಾ ಸ್ಪರ್ಧೆ ಹಮ್ಮಿಕೊಂಡಿರುವುದು ಶ್ಲಾಘನೀಯ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.ಕನ್ನಡ ಸಾಹಿತ್ಯ ಪರಿಷತ್ ತಾಲೂಕು ಅಧ್ಯಕ್ಷ ಪಾಂಡುರಂಗ ಜಟಗನ್ನವರ ಮಾತನಾಡಿ, ಪರಿಸರ ಮತ್ತು ಪ್ರಾಣಿ ಪಕ್ಷಿಗಳು ಮನುಷ್ಯನ ಜೀವನದ ಅವಿಭಾಜ್ಯ ಅಂಗವಾಗಿದ್ದು, ಕೆಲ ವನ್ಯಜೀವಿಗಳು ಪರಿಸರದಲ್ಲಿ ಸ್ಪಲ್ಪ ವ್ಯತ್ಯಾಸವಾದರೂ ಪರಿಸರದಲ್ಲಿ ಅಸಮತೋಲನವಾಗಿ ಅಲ್ಲೋಲ ಕಲ್ಲೋಲವಾಗುತ್ತದೆ ಎಂಬ ಅರಿವು ಪ್ರತಿಯೊಬ್ಬರಲ್ಲಿಯೂ ಇರಬೇಕು ಎಂದು ಹೇಳಿದರು.ಸರೋವರ, ಕಾಡು ಸೇರಿ ಎಲ್ಲ ಜೀವಿಗಳು ಚಿತ್ರಕಲೆಯಲ್ಲಿ ಅರಳಿದ್ದು, ಆ ಕಲ್ಪನೆಯಂತೆ ಪರಿಸರ ಸಂರಕ್ಷಣೆಗೆ ಎಲ್ಲರು ಮುಂದಾಗುವ ಮೂಲಕ ನಿಜ ಜೀವನದಲ್ಲಿ ಪರಿಸರದ ಬಗ್ಗೆ ಕಾಳಜಿವಹಿಸಬೇಕು ಎಂದು ಸಲಹೆ ನೀಡಿದರು.ಉಪರಣ್ಯ ಸಂರಕ್ಷಣಾಧಿಕಾರಿ ಪ್ರಲ್ಹಾದ ದೊಡ್ಡಪತ್ತಾರ ಮಾತನಾಡಿ, ನಿಮ್ಮ ಕಲ್ಪನೆಯಲ್ಲಿ ಅರಳಿರುವ ಚಿತ್ರದಂತೆ ಕಾಡಾಗಲಿ, ಪ್ರಾಣಿಗಳಾಗಲಿ, ಪಕ್ಷಿಗಳು ನಿಜ ಜೀವನದಲ್ಲಿ ನೋಡಲು ಸಿಗುತ್ತಿಲ್ಲ. ಆದರೆ, ಮನಸ್ಸು ಮಾಡಿದರೆ ಪರಿಸರ ಕಾಳಜಿ ವಹಿಸಿ ನಿಮ್ಮಲ್ಲಿ ಒಬ್ಬರು ಸಾಲು ಮರದ ತಿಮ್ಮಕ್ಕನಂತೆ ಪರಿಸರ ಪ್ರೇಮಿಗಳಾಗಲು ಸಾಧ್ಯವಿದೆ. ಗಿಡಮರ ಬೆಳಸಲು ಮೊದಲು ಆಧ್ಯತೆ ನೀಡುವಂತೆ ತಿಳಿಸಿದರು.ಜನಪರ ಟ್ರಸ್ಟ್ ಅಧ್ಯಕ್ಷ ಸುಭಾಸ ಘೋಡಕೆ ಮಾತನಾಡಿ, ಭವಿಷ್ಯದ ಪ್ರಜೆಗಳಾದ ವಿದ್ಯಾರ್ಥಿಗಳಿಗೆ ಪರಿಸರದ ಕಾಳಜಿ ಮೂಡಿಸುವ ಉದ್ಧೇಶದಿಂದ ಆಯೋಜಿಸಿರುವ ಸ್ಪರ್ಧೆಯಿಂದ ಪ್ರೇರಣೆಗೊಂಡು ಮೊದಲು ಪ್ರಾಣಿ ಸಂಗ್ರಹಾಲಯಕ್ಕೆ ಭೇಟಿ ನೀಡುವ ಮೂಲಕ ಪ್ರಾಣಿಗಳ ಬಗ್ಗೆ ತಿಳಿಯಬೇಕು ಎಂದರು.ನಿವೃತ್ತ ಚಿತ್ರಕಲಾ ಶಿಕ್ಷಕರಾದ ಸುರೇಶ ಕಲ್ಲೂರ ಮತ್ತು ಎಂ.ಸಿ.ಬಡಿಗೇರ ಸ್ಪರ್ಧೆಯ ನಿರ್ಣಾಯಕರಾಗಿ ಕಾರ್ಯನಿರ್ವಹಿಸಿದರು. ವೇದಿಕೆಯಲ್ಲಿ ಬಿಆರ್‌ಪಿ ಕೆ.ವೈ.ಪಾಟೀಲ ಇದ್ದರು. ಚಿತ್ರಕಲಾ ಸ್ಪರ್ಧೆಯಲ್ಲಿ ಪಟ್ಟಣದ ವಿವಿಧ ಹೈಸ್ಕೂಲ್‌ಗಳಿಂದ 90 ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಕನ್ನಡಪ್ರಭ ವರದಿಗಾರ ಈರಣ್ಣ ಬುಡ್ಡಾಗೋಳ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು.
ಬಾಕ್ಸ್ಚಿತ್ರಕಲಾ ಸ್ಪರ್ಧೆಯ ವಿಜೇತರು8ನೇ ತರಗತಿ ವಿಭಾಗದಲ್ಲಿ ಪ್ರಥಮ: ಬಸವೇಶ್ವರ ಆಂಗ್ಲ ಮಾಧ್ಯಮ ಶಾಲೆಯ ಶಾಫೀಯಾ ಬೈರೆಕದಾರ, ದ್ವಿತೀಯ: ಗರ್ಲ್ಸ್ ಹೈಸ್ಕೂಲ್‌ನ ಪೂಜಾ ನಾವಿ, ತೃತೀಯ: ಸಿ.ಡಿ.ಹಲ್ಯಾಳ ಹೈಸ್ಕೂಲ್‌ನ ಸಮರ್ಥ ಘೋರ್ಪಡೆ.
9ನೇ ತರಗತಿ ವಿಭಾಗ- ಪ್ರಥಮ: ಸರ್ಕಾರಿ ಉರ್ದು ಹೈಸ್ಕೂಲ್‌ನ ಮೂಜಾಂಬಿ ಮಖಾನದಾರ, ದ್ವಿತೀಯ: ಪಂಚಕಟ್ಟಿಮಠ ಶಾಲೆ ಪೂರ್ವಿ ಕುಲಕರ್ಣಿ, ತೃತೀಯ: ಗರ್ಲ್ಸ್ ಹೈಸ್ಕೂಲ್‌ನ ಸುಮಯ್ಯಾ ಜಾಮದಾರ.10ನೇ ತರಗತಿ ವಿಭಾಗದಲ್ಲಿ- ಪ್ರಥಮ: ಸಿ.ಡಿ.ಹಲ್ಯಾಳ ಹೈಸ್ಕೂಲ್‌ನ ಸಂದೀಪ ಇಟಿ, ದ್ವಿತೀಯ: ಬಸವೇಶ್ವರ ಆಂಗ್ಲ ಮಾಧ್ಯಮ ಶಾಲೆಯ ಪೂರ್ವಿ ಮಾಳದಕರ, ತೃತೀಯ: ಸ್ಟೇಟ್ ಹೈಸ್ಕೂಲ್‌ನ ಭುವನ ಚೊಳಚಗುಡ್ಡ ಪಡೆದಿದ್ದಾರೆ.
