ಲೋಕ ಅದಾಲತ್‌ನಲ್ಲಿ ಹಲವು ಪ್ರಕರಣ ಇತ್ಯರ್ಥ

ಮುನಿಸನ್ನು ಬದಿಗಿರಿಸಿ ಒಂದಾದ ದಂಪತಿಗಳು

ಚಾಮರಾಜನಗರ, ಕೊಳ್ಳೇಗಾಲ, ಯಳಂದೂರು, ಗುಂಡ್ಲುಪೇಟೆ ನ್ಯಾಯಾಲಯಗಳಲ್ಲಿ ನಡೆದ ಲೋಕ ಅದಾಲತ್ ನಲ್ಲಿ ಕಳೆದ ಹಲವು ವರ್ಷಗಳಿಂದಲೂ ನ್ಯಾಯಾಲಯದಲ್ಲಿದ್ದ ಪ್ರಕರಣಗಳನ್ನು ರಾಜೀ ಸಂಧಾನದ ಮೂಲಕ ಇತ್ಯರ್ಥಪಡಿಸಲಾಯಿತು.

ಒಂದಾದ ದಂಪತಿಗಳು:

ಜಿಲ್ಲಾ ನ್ಯಾಯಾಲಯದ ಆವರಣದಲ್ಲಿರುವ ಪ್ರಧಾನ ಸಿವಿಲ್ ನ್ಯಾಯಾಧೀಶ ಮತ್ತು ಪ್ರಥಮ ದರ್ಜೆ ನ್ಯಾಯಿಕ ದಂಡಾಧಿಕಾರಿ ನ್ಯಾಯಾಲಯದಲ್ಲಿ ಮೂರು ದಂಪತಿಗಳು ತಮ್ಮ ಹಲವು ವರ್ಷಗಳ ಮುನಿಸನ್ನು ಬದಿಗಿರಿಸಿ ಒಂದಾದರು. ತಮ್ಮ ವಕೀಲರಗಳ ಮೂಲಕ ನ್ಯಾಯಾಲಯಕ್ಕೆ ಆಗಮಿಸಿದ ದಂಪತಿಗಳು ಪ್ರಧಾನ ಸಿವಿಲ್ ನ್ಯಾಯಾಧೀಶರಾದ ವೆಂಕಟೇಶ್ ಸಮ್ಮುಖದಲ್ಲಿ ರಾಜೀ ಸಂಧಾನದ ಮೂಲಕ ತಮ್ಮ ಹಲವು ವರ್ಷಗಳ ಪ್ರಕರಣವನ್ನು ಇತ್ಯರ್ಥಪಡಿಸಿಕೊಂಡರು.

ಚಾಮರಾಜನಗರದ ಗಾಳೀಪುರ ಬಡಾವಣೆಯ ಮತ್ತೊಂದು ದಂಪತಿ ಕೂಡ ರಾಜೀ ಸಂಧಾನದ ಮೂಲಕ ಒಂದಾದರು. ಬಡಾವಣೆಯ ನಿವಾಸಿಗಳಾದ ಶಫೀ ಉಲ್ಲಾ ಹಾಗೂ ಶಿಫಾನಬಾನು ಎಂಬ ದಂಪತಿ ಕಳೆದ ಒಂದು ವರ್ಷಗಳಿಂದಲೂ ಬೇರೆ ಬೇರೆ ವಾಸ ಮಾಡುತ್ತಿದ್ದರು. ಕಳೆದ ಒಂದು ವರ್ಷದ ಹಿಂದೆ ಶಿಫಾನಬಾನು ಎಂಬುವವರು ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಮೊರೆ ಹೋಗಿ ತನ್ನ ಗಂಡನಿಂದ ಜೀವನಾಂಶ ಕೊಡಿಸುವಂತೆ ಅರ್ಜಿ ಸಲ್ಲಿಸಿದ್ದರು. ಈ ವೇಳೆ ಪ್ರಾಧಿಕಾರದ ವತಿಯಿಂದ ಪ್ಯಾನಲ್ ವಕೀಲರಾದ ಪುಟ್ಟರಾಚಯ್ಯ ಅವರನ್ನು ನೇಮಕ ಮಾಡಲಾಗಿತ್ತು. ಶಫೀ ಉಲ್ಲಾ ಹಾಗೂ ಶಿಫಾನಬಾನು ಅವರ ನಡುವೆ ಮೂಡಿದ್ದ ಒಡಕನ್ನು ಬಗೆಹರಿಸುವ ಮೂಲಕ ರಾಜೀ ಮಾಡಿಸಿ ಮತ್ತೆ ದಂಪತಿ ಒಂದಾಗುವಂತೆ ನ್ಯಾಯಾಧೀಶರ ಸಮ್ಮುಖದಲ್ಲಿ ಪ್ರಕರಣವನ್ನು ಇತ್ಯರ್ಥಪಡಿಸಲಾಯಿತು.