ಗಣಿ ಲಾರಿ ಉಪಟಳ: ರಸ್ತೆಗಳೆಲ್ಲ ಕೆಸರುಮಯ

ಸಂಡೂರು: ತಾಲೂಕಿನ ಕಾಳಿಂಗೇರಿ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿ ಬರುವ ಯಶವಂತನಗರ ಬಳಿಯ ರೈಲ್ವೆ ಕ್ರಾಸಿಂಗ್‌ನಿಂದ ಅಂಕಮನಾಳು ಮಾರ್ಗದ ೨-೩ ಕಿ.ಮೀ. ರಸ್ತೆ ಗಣಿ ಲಾರಿಗಳ ನಿರಂತರ ಸಂಚಾರದಿಂದ ಬೇಸಿಗೆಯಲ್ಲಿ ಧೂಳುಮಯವಾದರೆ ಮಳೆಗಾಲದಲ್ಲಿ ಕೆಸರುಮಯವಾಗಲಿದೆ.

ಭಾನುವಾರ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ ಕೆಸರಿನಿಂದ ತುಂಬಿದ ಈ ಮಾರ್ಗದಲ್ಲಿ ಬರುವಾರ ಜಾರಿ ಪಕ್ಕದ ತಗ್ಗಿಗೆ ಜಾರಿ ನಿಂತಿದೆ. ಅದೃಷ್ಟವಶಾತ್ ಬಸ್‌ನಲ್ಲಿದ್ದವರಿಗೆ ಯಾವುದೇ ತೊಂದರೆಯಾಗಿಲ್ಲ.

ಅಂಕಮನಾಳು, ಹೀರಾಳು, ನಾಗೇನಳ್ಳಿ, ಚೋರುನೂರು, ಡಿ. ಮಲ್ಲಾಪುರ ಮುಂತಾದ ಗ್ರಾಮಗಳ ಜನತೆ ಈ ಮಾರ್ಗದ ಮೂಲಕವೇ ತಾಲೂಕು ಕೇಂದ್ರಕ್ಕೆ ಹೋಗಿ ಬರಬೇಕು. ಆದರೆ, ಈ ಮಾರ್ಗದಲ್ಲಿನ ಅದಿರು ಲಾರಿಗಳ ಅಬ್ಬರ ಹಾಗೂ ಕೆಸರಿನಿಂದ ಆವೃತವಾದ ಈ ರಸ್ತೆಯಲ್ಲಿ ಸಂಚರಿಸಲು ಜನತೆ ತುಂಬ ತೊಂದರೆಯನ್ನು ಅನುಭವಿಸುತ್ತಿದ್ದಾರೆ ಎಂದು ತಮ್ಮ ಅಸಮಾಧಾನ ವ್ಯಕ್ತಪಡಿಸಿದರು.

ಸಂಬಂಧಿಸಿದ ಅಧಿಕಾರಿಗಳು, ಗಣಿ ಕಂಪನಿಗಳವರು ಅಂಕಮನಾಳು ಹಾಗೂ ಯಶವಂತನಗರದ ಮಾರ್ಗಮಧ್ಯದ ರೈಲ್ವೆ ಕ್ರಾಸಿಂಗ್‌ವರೆಗಿನ ರಸ್ತೆಯ ಮೇಲೆ ನೀರು, ಕೆಸರು ಮಣ್ಣು ಸಂಗ್ರಹವಾಗದಂತೆ ಕ್ರಮ ಕೈಗೊಂಡು, ಜನರ ಸುಗಮ ಹಾಗೂ ಸುರಕ್ಷಿತ ಸಂಚಾರಕ್ಕೆ ವ್ಯವಸ್ಥೆ ಕಲ್ಪಿಸಬೇಕಿದೆ.