ಒಬಿಸಿಗೆ ವೀರಶೈವ, ಲಿಂಗಾಯತ ಸೇರಿಸುವುದೇ ಧ್ಯೇಯ: ಶಂಕರ ಮಹದೇವ ಬಿದರಿ

ಲಿಂಗಾಯಿತ- ವೀರಶೈವ ಎರಡು ಒಂದೇ, ಎಲ್ಲರೂ ಒಗ್ಗಟ್ಟಾಗಿ ಹಕ್ಕು ಪಡೆಯೋಣ

ವೀರಶೈವ ಅಥವಾ ಲಿಂಗಾಯತ ಎರಡು ಒಂದೇ ಆಗಿದ್ದು, ಎಲ್ಲರು ಒಗ್ಗಟ್ಟಾದಾಗ ಮಾತ್ರ ನಮ್ಮ ಬೇಡಿಕೆ ಹಾಗೂ ಆಶಯಗಳನ್ನು ಹಿಡೇರಿಸಿಕೊಳ್ಳಲು ಸಾಧ್ಯ, ಲಿಂಗಾಯಿತ ಸಮುದಾಯದವರನ್ನು ಒಬಿಸಿಗೆ ಸೇರಿಸುವುದು ನನ್ನ ಮೊದಲ ಆದ್ಯತೆಯಾಗಿದ್ದು, ಈ ಹಿನ್ನೆಲೆ ರಾಷ್ಟ್ರಮಟ್ಟದಲ್ಲೂ ಹೋರಾಟ ನಡೆಸುವ ಮೂಲಕ ಸಮಾಜದ ಬಂಧುಗಳಿಗೆ ನ್ಯಾಯ ದೊರಕಿಸುವುದೇ ನನ್ನ ಗುರಿಯಾಗಿದೆ ಎಂದು ನಿವೃತ್ತ ಪೊಲೀಸ್ ಅಧಿಕಾರಿ ಮತ್ತು ಅಖಿಲ ಭಾರತ ವೀರಶೈವ ಲಿಂಗಾಯತ ಮಹಾಸಭೆಯ ರಾಜ್ಯಾಧ್ಯಕ್ಷ ಶಂಕರ ಮಹದೇವ ಬಿದರಿ ಹೇಳಿದರು.

ಕೇಂದ್ರ ಸರ್ಕಾರ ಈಗಾಗಲೇ ಕೆಲ ಪಂಗಡಗಳನ್ನು ಒಬಿಸಿಗೆ ಸೇರಿದ್ದು, ರಾಷ್ಟ್ರಮಟ್ಟದಲ್ಲಿ ಹೋರಾಟ ನಡೆಸಿ ನಮ್ಮ ಸಮಾಜದ ಬಂಧುಗಳನ್ನು ಒಬಿಸಿ ಸೇರಿಸುವಂತೆ ರಾಷ್ಟ್ರಮಟ್ಟದಲ್ಲೂ ಹೋರಾಟಕ್ಕೆ ನಾವೆಲ್ಲರೂ ಸಜ್ಜಾಗೋಣ ಎಂದರು.

ಕುದೇರು ಮಠಾಧ್ಯಕ್ಷ ಗುರುಶಾಂತ ಸ್ವಾಮೀಜಿ ಆಶೀರ್ವಚನ ನೀಡಿ, ಮಾನವರಾದ ನಾವು ಅನ್ಯರಿಗೆ ಕೆಟ್ಟದ್ದು ಮಾಡುತ್ತೇವೆ, ಕೆಟ್ಟದ್ದು ಬಯಸುತ್ತಿವೆ ಎಂಬ ನಿಲುವನ್ನು ಬಿಡಬೇಕು. ಸೌಹಾರ್ದತೆಯುತವಾಗಿ ಸಹಬಾಳ್ವೆ ನಡೆಸುವ ದಿಕ್ಕಿನಲ್ಲಿ ನಾವೆಲ್ಲರೂ ಸಾಗೋಣ ಎಂದರಲ್ಲದೆ, ಈ ಸಂಘಟನೆ ಇನ್ನಷ್ಟು ಪ್ರಬಲವಾಗಿ ಬೆಳವಣಿಗೆಯಾಗಲಿ ಎಂದು ಆಶಿಸಿದರು.

ಸುತ್ತೂರು ಕ್ಷೇತ್ರ ಜೆಎಸ್ಎಸ್ ಸಂಸ್ಥೆಗಳ ಸಂಯೋಜನಾಧಿಕಾರಿ ವಿ.ಎಲ್.ತ್ರಿಪುರಾಂತಕ, ವೀರಶೈವ ಲಿಂಗಾಯತ ನೌಕರರ ಬಸವ ಸೇವಾ ಸಮಿತಿ ಅಧ್ಯಕ್ಷ ಎಸ್‌.ಮಲ್ಲೇಶಪ್ಪ, ಬಸವ ಸೇವಾ ಪತ್ತಿನ ಸಹಕಾರ ಸಂಘ ಅಧ್ಯಕ್ಷ ನಂಜುಂಡಸ್ವಾಮಿ (ನಂದೀಶ್), ಉಪಾಧ್ಯಕ್ಷ ಎಸ್‌.ಸೋಮಶೇಖರಪ್ಪ, ಬಸವ ಮಹಾಮನೆ ಟ್ರಸ್ಟ್ ಕಾರ್ಯದರ್ಶಿ ಜಿ.ವೀರಭದ್ರಸ್ವಾಮಿ ಇತರರು ಇದ್ದರು.