ಮುಂಗಾರು ವೈಫಲ್ಯ: ಹಬ್ಬಗಳಿಗೆ ಬರಗಾಲದ ಬಿಸಿ

ಮಂಜುನಾಥ ಕೆ.ಎಂ.

ಹಬ್ಬದ ಸಡಗರ ಕಸಿದ ಬರ: ಕಳೆದ ಮೂರು ವರ್ಷಗಳಿಂದ ನಿರೀಕ್ಷಿತ ಮಟ್ಟದಲ್ಲಿ ಬೆಳೆ ಕೈಗೆ ಸಿಗದೆ ಕಂಗಾಲಾಗಿರುವ ರೈತಾಪಿ ವರ್ಗಕ್ಕೆ ಈ ಬಾರಿಯ ಮುಂಗಾರು ಮತ್ತೊಂದು ಆಘಾತ ನೀಡಿದೆ. ಜೂನ್‌-ಜುಲೈನಲ್ಲಿ ಉತ್ತಮ ಮಳೆಯಾಗಿ ಜಮೀನುಗಳಲ್ಲಿ ಹಸಿರು ಹೊದಿಕೆ ಮೂಡಬೇಕಿತ್ತು. ಹೊಲಗಳಲ್ಲಿ ಭತ್ತ, ಮೆಣಸಿನಕಾಯಿ ಸೇರಿದಂತೆ ವಿವಿಧ ಬೆಳೆಗಳು ನಳನಳಿಸಬೇಕಿತ್ತು.

ಮಲೆನಾಡು ಭಾಗದಲ್ಲಿಯೇ ಮಳೆಯ ಕೊರತೆ ಕಂಡುಬಂದಿರುವುದು ಜಿಲ್ಲೆಯ ಕೃಷಿಗೆ ದೊಡ್ಡ ಹೊಡೆತ ನೀಡಿದೆ. ತುಂಗಭದ್ರಾ ಜಲಾಶಯಕ್ಕೆ ನಿರೀಕ್ಷಿತ ಪ್ರಮಾಣದಲ್ಲಿ ಒಳಹರಿವು ಆಗದೆ ನೀರಿನ ಮಟ್ಟ ಆತಂಕಕಾರಿ ಸ್ಥಿತಿಗೆ ತಲುಪಿತ್ತು. ಈಚೆಗೆ ಜಲಾಶಯಕ್ಕೆ ಒಳಹರಿವು ಹೆಚ್ಚುತ್ತಿರುವುದು ಒಂದಷ್ಟು ಆಶಾಭಾವ ಮೂಡಿಸಿದೆಯಾದರೂ, ಕಾಲುವೆಗಳಿಗೆ ನೀರು ಹರಿಸುವಷ್ಟರಲ್ಲಿ ಮುಂಗಾರು ಹಂಗಾಮಿನ ಬಹುಮುಖ್ಯ ಅವಧಿ ಕಳೆದುಹೋಗುವ ಸಾಧ್ಯತೆ ಇದೆ. ಹೀಗಾಗಿ, ಈಗ ದೊರೆಯುವ ನೀರು ಎಷ್ಟರ ಮಟ್ಟಿಗೆ ಬೆಳೆಗಳನ್ನು ಉಳಿಸಲಿದೆ ಎಂಬ ಪ್ರಶ್ನೆ ರೈತರನ್ನು ಕಾಡುತ್ತಿದೆ.

ಕೃಷಿ ಆದಾಯ ಕುಸಿದಿರುವ ಪರಿಣಾಮ ಅದರ ನೇರ ಹೊಡೆತ ಗ್ರಾಮೀಣ ಆರ್ಥಿಕತೆಯ ಮೇಲೂ ಬಿದ್ದಿದೆ. ರೈತರ ಕೈಗೆ ಹಣ ಬಾರದಿದ್ದರೆ ಕೃಷಿ ಕಾರ್ಮಿಕರು, ಸಣ್ಣ ವ್ಯಾಪಾರಿಗಳು, ಬಟ್ಟೆ ಅಂಗಡಿಗಳು, ಹಬ್ಬದ ಸಾಮಗ್ರಿ ಮಾರಾಟಗಾರರು ಸೇರಿದಂತೆ ಅನೇಕ ವಲಯಗಳ ವಹಿವಾಟು ಕುಗ್ಗುತ್ತದೆ. ಹಬ್ಬದ ಸಂದರ್ಭದಲ್ಲಿ ಸಾಮಾನ್ಯವಾಗಿ ಕಂಡುಬರುವ ಖರೀದಿ ಉತ್ಸಾಹ ಈ ಬಾರಿ ಕಾಣಿಸಿಕೊಳ್ಳುತ್ತಿಲ್ಲ.

ಹಬ್ಬಗಳು ಬಂದರೆ ಹೊಸ ಬಟ್ಟೆ, ಸಿಹಿ, ಹಣ್ಣು, ಪೂಜಾ ಸಾಮಗ್ರಿ ಖರೀದಿಸುವುದು ಗ್ರಾಮೀಣ ಬದುಕಿನ ಸಹಜ ಸಂಪ್ರದಾಯ. ಆದರೆ, ಈ ಬಾರಿ ಕೈಯಲ್ಲಿ ಹಣವಿಲ್ಲದ ಕಾರಣ ರೈತ ಕುಟುಂಬಗಳು ಸಣ್ಣಪುಟ್ಟ ಖರ್ಚಿಗೂ ಲೆಕ್ಕ ಹಾಕುವಂತಾಗಿದೆ. ಎಷ್ಟೇ ಬರ ಇದ್ದರೂ ಪ್ರಮುಖ ಹಬ್ಬಗಳಲ್ಲಿ ತೊಡಗಿಸಿಕೊಳ್ಳಲೇಬೇಕು. ಆದರೆ, ಈ ಬಾರಿ ಅತ್ಯಂತ ಸರಳವಾಗಿ ಹಬ್ಬ ಆಚರಿಸುವುದು ಅನಿವಾರ್ಯವಾಗಿದೆ ಎಂದು ಎನ್ನುತ್ತಾರೆ ರೈತರು ಹಾಗೂ ಕೃಷಿ ಕಾರ್ಮಿಕರು.