ಬಸ್‌ಗಳೇ ಇಲ್ಲದ ಮುಂಡಗೋಡ ಬಸ್ ಡಿಪೋ

ಸಂತೋಷ ದೈವಜ್ಞ

ಒಂದು ಬಾರಿ ಕಟ್ಟಡ ಉದ್ಘಾಟನೆ, ಇನ್ನೊಂದು ಬಾರಿ ಬಸ್ ಕಾರ್ಯಾರಂಭ ಎಂದು ಹೇಳಿಕೊಂಡು ಎರಡೆರಡು ಬಾರಿ ಉದ್ಘಾಟನೆ ಮಾಡಲಾಗಿದೆ. ಆದರೆ ಬಸ್‌ಗಳನ್ನು ಮಾತ್ರ ನೀಡಲಾಗಿಲ್ಲ. ಇದರಿಂದ ದಿನ ಬೆಳಗಾದರೆ ವಿದ್ಯಾರ್ಥಿಗಳು ಸಾರ್ವಜನಿಕರು ಬಸ್‌ಗಾಗಿ ಪ್ರತಿಭಟನೆ ಮಾಡುವುದು ಇಲ್ಲಿ ಸಾಮಾನ್ಯವಾಗಿದೆ. ಇದೆಲ್ಲ ನೋಡಿದರೆ ಬಸ್ ಡಿಪೋ ಕೇವಲ ಪ್ರಚಾರಕ್ಕೆ ಸೀಮಿತವಾಗಿದೆ.

ಡಿಪೋಗೆ ಬೇಕಾದ ಅಗತ್ಯ ಬಸ್ ಹಾಗೂ ಮೂಲಭೂತ ಸೌಲಭ್ಯ ಒದಗಿಸಿ ಕಾರ್ಯಾರಂಭಿಸುವ ಗೋಜಿಗೆ ಯಾರು ಹೋಗಲಿಲ್ಲ. ಇದರಿಂದ ಸುಮಾರು ೧ ವರ್ಷಗಳ ಕಾಲ ಬಸ್ ಡಿಪೋ ಹಾಳು ಬಿದ್ದಿತ್ತು. ಈಗ ಡೀಸೆಲ್ ಟ್ಯಾಂಕ್ ನಿರ್ಮಾಣವಾಗಿದೆ. ಕಳೆದ ಒಂದೂವರೆ ತಿಂಗಳ ಹಿಂದೆ ಬಸ್ ಡಿಪೋದಿಂದ ಬಸ್ ಕಾರ್ಯಾರಂಭ ಎಂಬ ಶೀರ್ಷಿಕೆಯಡಿ ಶಾಸಕ ಶಿವರಾಮ ಹೆಬ್ಬಾರ ಹಸ್ತದಿಂದ ಮತ್ತೊಮ್ಮೆ ಉದ್ಘಾಟಿಸಿ ಚಾಲನೆ ನೀಡಲಾಯಿತು. ಇದರಿಂದ ಮುಂಡಗೋಡ ಜನತೆಯ ೩ ದಶಕಗಳ ಬೇಡಿಕೆಯಾಗಿದ್ದ ಬಸ್ ಡಿಪೋ ವಿಳಂಬವಾಗಿದೆ.

ತಕ್ಷಣ ಸಂಬಂಧಿಸಿದ ಸಾರಿಗೆ ಸಂಸ್ಥೆ ಇಲಾಖೆ ಅಧಿಕಾರಿಗಳು ಈ ಬಗ್ಗೆ ಗಮನಹರಿಸಿ ಬಸ್ ಡಿಪೋಗೆ ಬಸ್‌ಗಳನ್ನು ನೀಡಿ ವೇಳಾಪಟ್ಟಿ ತಯಾರಿಸಿ ಅಗತ್ಯ ರೂಟ್‌ಗಳಿಗೆ ಬಸ್ ಬಿಡಬೇಕೆಂಬುವುದು ಸಾರ್ವಜನಿಕರ ಆಗ್ರಹವಾಗಿದೆ.

ಬಸ್ ಡಿಪೋ ಉದ್ಘಾಟನೆಯಾಗಿ ಸುಮಾರು ಒಂದೂವರೆ ವರ್ಷ ಕಳೆದಿದೆ. ಮೂಲಭೂತವಾಗಿ ಬಸ್ ಕಾರ್ಯಾರಂಭಿಸದೇ ಇರುವುದರಿಂದ ಸಾರ್ವಜನಿಕರು ತೊಂದರೆ ಅನುಭವಿಸುತ್ತಿದ್ದಾರೆ. ಬಹುತೇಕ ಗ್ರಾಮೀಣ ಪ್ರದೇಶಕ್ಕೆ ಇಂದಿಗೂ ಬಸ್ ಸಂಪರ್ಕವಿಲ್ಲ. ತಕ್ಷಣ ಸಮರ್ಪಕ ಬಸ್ ಒದಗಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕು ಎನ್ನುತ್ತಾರೆ ನ್ಯಾಯವಾದಿ, ಸಾಮಾಜಿಕ ಕಾರ್ಯಕರ್ತ ಸಂಗಮೇಶ ಕೊಳ್ಳಾನವರ.