ಹಾವೇರಿ ಜಿಲ್ಲಾದ್ಯಂತ ನಾಗರ ಪಂಚಮಿ ಸಡಗರ

ಹಾವೇರಿ: ಪ್ರಮುಖ ಹಬ್ಬಗಳಲ್ಲಿ ಒಂದಾಗಿರುವ ನಾಗರ ಪಂಚಮಿ ಹಬ್ಬವನ್ನು ಭಾನುವಾರ ಜಿಲ್ಲಾದ್ಯಂತ ಮಹಿಳೆಯರು ಮತ್ತು ಮಕ್ಕಳು ಕಲ್ಲು ನಾಗರ ಮೂರ್ತಿಗಳಿಗೆ ಹಾಗೂ ಹುತ್ತಕ್ಕೆ ಹಾಲು ಎರೆಯುವ ಮೂಲಕ ಸಡಗರ ಸಂಭ್ರಮದಿಂದ ಆಚರಿಸಿದರು.

ಹಾವೇರಿಯ ವಿದ್ಯಾನಗರ, ಶಿವಯೋಗೀಶ್ವರ ನಗರ, ಹೊಸನಗರ, ಆನೆ ಪಾರ್ಕ, ಹುಕ್ಕೇರಿಮಠ, ಹೊಸಮಠ, ಸಿಂಧಗಿಮಠ, ಹರಸೂರ ಬಣ್ಣದಮಠ, ಬಸವೇಶ್ವರ ನಗರ, ಮಂಜುನಾಥ ನಗರ, ಅಶ್ವಿನಿನಗರ, ಶಿವಾಜಿನಗರ, ದಾನೇಶ್ವರಿ ನಗರ, ಇಜಾರಿ ಲಕಮಾಪೂರ ಸೇರಿದಂತೆ ನಗರದ ವಿವಿಧ ಬಡಾವಣೆಗಳಲ್ಲಿರುವ ಕಲ್ಲು ನಾಗರ ಮೂರ್ತಿಗಳಿಗೆ ಮತ್ತು ಗ್ರಾಮೀಣ ಪ್ರದೇಶದಲ್ಲಿ ಮಣ್ಣಿನ ಹುತ್ತಗಳಿಗೆ ಹಾಲೆರೆಯುವ ಮೂಲಕ ಶ್ರದ್ದಾ ಭಕ್ತಿಯಿಂದ ಹಬ್ಬವನ್ನು ಆಚರಿಸಿದರು.

ಮಕ್ಕಳ ಕೈಯಲ್ಲಿ ಬುಗುರಿ: ಪಂಚಮಿ ಹಬ್ಬದಲ್ಲಿ ಚಿಕ್ಕಮಕ್ಕಳು ಜೋಕಾಲಿ ಆಟವನ್ನು ಸಂಭ್ರಮಿಸುವುದರ ಜತೆಗೆ ಒಣಕೊಬ್ಬರಿ ಬಟ್ಟಲುಗಳಲ್ಲಿ ದಾರ ಕಟ್ಟಿಕೊಂಡು ಬುಗರಿಯಂತೆ ತಿರುಗಿಸಿ ಆಟವಾಡಿದರು. ನೂಲು ತುಂಡಾದ ಬಳಿಕ ಲಾಡುಗಳೊಂದಿಗೆ ಒಣಕೊಬ್ಬರಿ ಬಟ್ಟಲುನ್ನು ತಿಂದು ಸಂತೋಷಪಟ್ಟರು.

ಜೋಕಾಲಿ ಹಬ್ಬ: ಪಂಚಮಿ ಹಬ್ಬದ ಸಂಭ್ರಮದಲ್ಲಿ ಚಿಕ್ಕಮಕ್ಕಳು ಮನೆಗಳಲ್ಲಿ ಕಟ್ಟಿದ ಜೋಕಾಲಿ ಆಡುವಲ್ಲಿ ತಲ್ಲೀನರಾಗಿದ್ದರೆ, ದೊಡ್ಡವರು ಬಯಲಿನ ದೊಡ್ಡ ಮರಗಳಿಗೆ ಕಟ್ಟಿದ ಜೋಕಾಲಿ ಜೀಕುತ್ತಾ ಖುಷಿಪಟ್ಟರು. ಇನ್ನೂ ಗ್ರಾಮೀಣ ಮಹಿಳೆಯರೂ ಜೋಕಾಲಿ ಆಡಿದ್ದು ಕಂಡುಬಂದಿತು. ವಿಶೇಷವಾಗಿ ಹೊಸದಾಗಿ ಮದುವೆಯಾದ ಹೆಣ್ಣು ಮಕ್ಕಳು ಅತ್ಯಂತ ಸಂಭ್ರಮದಿಂದ ತವರು ಮನೆಗೆ ಆಗಮಿಸಿ ಹಬ್ಬದ ಆಚರಣೆಯಲ್ಲಿ ಪಾಲ್ಗೊಂಡು ನಾಗದೇವರುಗಳಿಗೆ ಹಾಲೆರೆದು, ಜೋಕಾಲಿ ಆಡುವುದರ ಮೂಲಕ ಹಬ್ಬವನ್ನು ಸಂಭ್ರಮಿಸಿದ್ದು ವಿಶೇಷವಾಗಿತ್ತು.

ಪಂಚಮಿ ಹಬ್ಬದ ಹಿನ್ನೆಲೆ ಜಿಲ್ಲೆಯ ವಿವಿಧೆಡೆ ನಾಗದೇವತೆಗಳ ಮೂರ್ತಿಗಳಿಗೆ ಸುಮಂಗಲಿಯರು ಹಾಲೆರೆದು ವಿಶೇಷ ಪೂಜೆ ಸಲ್ಲಿಸಿ ಭಕ್ತಿಭಾವ ಮೆರೆದರು.