ನ್ಯಾರ್ಶಿ ಟು ನರಕ; ೨೫ ವರ್ಷವಾದ್ರೂ ಡಾಂಬರು ಕಾಣದ ರಸ್ತೆ

- ಎಚ್.ಕೆ.ಬಿ.ಸ್ವಾಮಿ

ವಾಹನ ಚಾಲನೆಯ ರಸ್ತೆಯಲ್ಲಿ ಗುಂಡಿಗಳು ಆಕ್ರಮಣ ಮಾಡಿಕೊಂಡಿರುವ ಡಾಂಬರು ರಸ್ತೆ ವಾಹನಗಳಷ್ಟೇ ಅಲ್ಲ ಕಾಲು ನಡುಗೆಗೂ ಯೋಗ್ಯವಲ್ಲದೇ ಯಮಧೂತವಾಗಿ ಪರಿಣಮಿಸಿದೆ.

ನ್ಯಾರ್ಶಿ ಗ್ರಾ.ಪಂ. ವ್ಯಾಪ್ತಿಯ ಮಣ್ಣತ್ತಿ, ಸಂಬಾಪುರ, ಚನ್ನಪಟ್ಟಣ, ಪುರದೂರು ಮಾರ್ಗವಾಗಿ ಮೂಡದೀವಳಿಗೆ, ಕಮರೂರು ಮೊದಲಾದ ಗ್ರಾಮಗಳಿಗೆ ಸಂಪರ್ಕಿಸಲು ೧೦ ಕಿ.ಮೀ. ಕ್ರಮಿಸಬೇಕಿದೆ. ನ್ಯಾರ್ಶಿ ಕ್ರಾಸ್‌ನಿಂದ ಆರಂಭವಾಗುವ ಈ ಮಾರ್ಗದ ೧೦ ಕಿ.ಮೀ. ದೂರ ಸಾಗಿದರೂ ಸಪಾಟು ರಸ್ತೆಯೇ ಸಿಗುವುದಿಲ್ಲ. ಗುಂಡಿ-ಗೊಟರುಗಳೇ ಆವರಿಸಿವೆ, ಅಲ್ಲದೇ ಹರೀಶಿ ಗ್ರಾ.ಪಂ. ಸೇರಿದಂತೆ ಸುಮಾರು ೨೦ಕ್ಕೂ ಅಧಿಕ ಗ್ರಾಮಗಳ ರೈತರು ಮತ್ತು ಗ್ರಾಮಸ್ಥರು ಇದೇ ಮಾರ್ಗವಾಗಿ ಸೊರಬ ಮತ್ತು ಉತ್ತರಕನ್ನಡ ಜಿಲ್ಲೆಯ ಶಿರಸಿಗೆ ತಮ್ಮ ವಾಣಿಜ್ಯ ವ್ಯವಹಾರ, ಸರ್ಕಾರಿ ಕಛೇರಿ ಮತ್ತು ವಿದ್ಯಾರ್ಥಿಗಳು ಶಾಲಾ-ಕಾಲೇಜಿಗೆ ಬಸ್ ಮತ್ತು ದ್ವಿಚಕ್ರ ವಾಹನದಲ್ಲಿ ತೆರಳಬೇಕಿದೆ.

ಕಳೆದ ೨೫ ವರ್ಷಗಳ ಹಿಂದೆ ನಿರ್ಮಾಣವಾದ ಡಾಂಬರು ರಸ್ತೆ ಇದುವರೆವಿಗೂ ಮರು ಡಾಂಬರೀಕರಣ ಕಂಡಿಲ್ಲ. ನಿರ್ಮಾಣ ವಾಗಿ ೩ ವರ್ಷಗಳಲ್ಲೇ ಲೋಕೋಪಯೋಗಿ ಇಲಾಖೆ ಗುಂಡಿ ಬಿದ್ದ ರಸ್ತೆಗೆ ಆಗಾಗ್ಗೆ ಬರಿಯ ಮಣ್ಣು-ಜಲ್ಲಿ ಹಾಕಿ ಗುಂಡಿ ಮುಚ್ಚು ಕೆಲಸ ಮಾಡಿದ್ದಾರೆ. ಆದರೆ ಕಳೆದ ಐದು ವರ್ಷಗಳಿಂದ ರಸ್ತೆಯನ್ನೇ ಆಕ್ರಮಿಸಿಕೊಂಡಿರುವ ಗುಂಡಿಗಳನ್ನು ಮುಚ್ಚುವ ಕೆಲಸ ವೂ ಆಗಿಲ್ಲ. ಅತ್ತ ಶಾಸಕರು ಮತ್ತು ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳು ನಿರ್ಲಕ್ಷ್ಯ ಧೋರಣೆ ಅನುಸರಿಸಿದ್ದಾರೆ ಎಂದು ಗ್ರಾಮಸ್ಥರು ದೂರಿದ್ದಾರೆ. ಪ್ರತಿದಿನ ನೂರಾರು ವಾಹನಗಳು ಸಂಚರಿಸುವ ದುರ್ಗಮ ರಸ್ತೆಗೆ ಡಾಂಬರೀಕರಣ ಮಾಡುವಂತೆ ಜಿಲ್ಲಾ ಉಸ್ತುವಾರಿ ಸಚಿವ ಮಧು ಬಂಗಾರಪ್ಪ ಅವರಿಗೆ ಸುಮಾರು ೨೦ ಗ್ರಾಮಗಳ ಗ್ರಾಮಸ್ಥರು ಮನವಿ ಮಾಡಿದ್ದಾರೆ.

ನ್ಯಾರ್ಶಿ ಗ್ರಾ.ಪಂ. ಅಧ್ಯಕ್ಷ ಧನಂಜಯ ನಾಯ್ಕ ಮಾತನಾಡಿ, ಕಳೆದ ೨೫ ವರ್ಷಗಳ ಹಿಂದೆ ಲೋಕೋಪಯೋಗಿ ಇಲಾಖೆ ಇಂದ ನಿರ್ಮಾಣಗೊಂಡ ೧೧ ಕಿ.ಮೀ. ರಸ್ತೆ ಕಳಪೆ ಗುಣಮಟ್ಟ ದಿಂದ ಕೇವಲ ಒಂದೆರಡು ವರ್ಷದಲ್ಲಿಯೇ ಹಾಳಾಗಿ ಗುಂಡಿಗಳಿಂದ ಆವೃತ್ತವಾಗಿದೆ. ಇತ್ತೀಚೆಗೆ ಉಸ್ತುವಾರಿ ಸಚಿವ ಮಧು ಬಂಗಾರಪ್ಪ ಅವರ ಗಮನಕ್ಕೂ ತರಲಾಗಿದೆ. ಡಾಂಬರೀಕರಣ ಮಾಡುವ ಭರವಸೆ ನೀಡಿದ್ದಾರೆ ಎಂದರು.