ವರ್ತಮಾನ ಜತೆಗೆ ಪುರಾಣ ಸಂಗತಿಗಳ ಸಂವಹನ ಅಗತ್ಯ

ದಾಂಡೇಲಿ: ನಾವು ದೇವರು, ಧರ್ಮ ಹಾಗೂ ಪುರಾಣಗಳ ಸಂಗತಿಗಳನ್ನು ವರ್ತಮಾನದ ಜತೆಗೆ ಸಂಹವನ ಮಾಡಬೇಕಾದ ಅಗತ್ಯವಿದೆ ಎಂದು ಸಾಹಿತಿ ಶ್ರೀದೇವಿ ಕೆರೆಮನೆ ಹೇಳಿದರು.ದಾಂಡೇಲಿ ತಾಲೂಕು ಕಸಾಪ ತಿಂಗಳವಾರು ಸಾಹಿತ್ಯ ಸರಣಿ ಕಾರ್ಯಕ್ರಮದಡಿ ಹಮ್ಮಿಕೊಂಡ ಸಾಹಿತಿ ಪ್ರವೀಣ ನಾಯಕ ಅವರ ''''''''ಈ ಸಮಯ ಕಳೆದು ಹೋಗುತ್ತದೆ'''''''' ಎಂಬ ಕೃತಿ ಅವಲೋಕನ ಮಾಡಿ ಅವರು ಮಾತನಾಡಿದರು.

ಸಾಹಿತ್ಯ ಇಂತಹ ಸೂಕ್ಷ್ಮ ಸಂಗತಿಗಳ ಮೇಲೆ ಬೆಳಕು ಚೆಲುವ ಕೆಲಸ ಮಾಡಬೇಕಾಗಿದೆ. ಅಂತಹ ಅನೇಕ ವಿಚಾರಗಳು ಪ್ರವೀಣ ನಾಯಕ ಅವರ ಈ ಕೃತಿಯಲ್ಲಿ ಕಂಡುಬರುತ್ತವೆ.‌ ಪುರಾಣ ಪಾತ್ರಗಳು ಮತ್ತೆ ಅದರೊಳಗಿರುವ ವೈರುಧ್ಯಗಳ ಬಗ್ಗೆ ಬಿಡಿಬಿಡಿಯಾಗಿ ಪ್ರವೀಣ ನಾಯಕ ತಿಳಿಸಿ ಹೇಳಿದ್ದಾರೆ. ಎಲ್ಲ ವಯೋಮಾನದವರೂ ಓದಿ ಅರ್ಥೈಸಿಕೊಳ್ಳುವಷ್ಟು ಸುಲಭವಾಗಿದೆ ಎಂದರು.

ಕೃತಿಕಾರ ಪ್ರವೀಣ ಜಿ. ನಾಯಕ ಮಾತನಾಡಿ, ಸಾಹಿತ್ಯ ಯಾವತ್ತು ನಿಂತ ನೀರಾಗಬಾರದು, ಅದು ಹೊಸ ಆಲೋಚನೆಗಳ ಜತೆ ಮುನ್ನಡೆಯುತ್ತಿರಬೇಕು. ಹಿಂದೆ ಹೇಳಿದ್ದು, ನಡೆದಿದ್ದು ಎಲ್ಲವೂ ಈಗ ವಾಸ್ತವವಾಗುವುದಿಲ್ಲ. ಪುರಾಣ ಪಾತ್ರಗಳಲ್ಲಿ ಬರುವ ಸಂಘರ್ಷಗಳ ಬಗ್ಗೆ, ವೈರುಧ್ಯಗಳ ಬಗ್ಗೆ ಇಂದಿನ ಬರಹಗಾರರು ವಿಮರ್ಶೆ ಮಾಡಬೇಕಾದ ಅಗತ್ಯವಿದೆ ಎಂದರು.ಅಧ್ಯಕ್ಷತೆ ವಹಿಸಿದ್ದ ಜಿಲ್ಲಾ ಕಸಾಪ ಅಧ್ಯಕ್ಷ ಬಿ.ಎನ್. ವಾಸರೆ ಮಾತನಾಡಿ, ಸಾಹಿತ್ಯ ವೈಜ್ಞಾನಿಕ ಸತ್ಯಗಳನ್ನು ಹೇಳುವ ಕೆಲಸ ಮಾಡಬೇಕಾಗಿದೆ ಎಂದರು.

ಕಾರ್ಯಕ್ರಮದ ದಾಸೋಹಿಗಳಾಗಿದ್ದ ಪ್ರವೀಣ ಜಿ. ನಾಯಕ ಹಾಗೂ ನಾಗರೇಖಾ ಗಾಂವಕರ ದಂಪತಿಯನ್ನು ಕಸಾಪ ಪದಾಧಿಕಾರಿಗಳು ಗೌರವಿಸಿದರು.